Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 37: Uwoudhu Rọkẹ Egagọ

Ikuigbe avọ 37: Uwoudhu Rọkẹ Egagọ

KỌ WHA riẹ oware nọ uwou onana orọ? Oyehọ obọdẹ uwoudhu rọ kẹ egagọ Jihova. A re sei tabanakol re. Ukpe ọvo ahwo na a rehọ bọe re nọ a no Ijipti no. Kọ whọ riẹ iroro ohwo nọ a be te rehọ rọ bọe?

Uwoudhu egagọ na

Ẹjẹiroro Jihova. Okenọ Mosis ọ jobọ ehru Ugbehru Sainai, Jihova ọ jẹ ta epanọ ọ rẹ bọe ri kẹe. Ọ ta nọ a rue’i re, o sae lọhọ ẹkparino ohwohwo. Evaọ edhere ọnana a jẹ sae wha, ekwakwa riẹ kpohọ oria ofa, avẹ jọ etẹe wariẹ whẹe họ. Fikiere okenọ Ahwo-Izrẹl a ti noria ruọ oria eva itẹwọ na, yọ awha uwoudhu na lele oma.

Who te rri eva ukpẹ osese na, obọ oka uwoudhu na, whọ te ruẹ etehe hayo okọ. A re se onana etehe ọvọ na. O wo ikọ odhiwu hayo chẹrọb ivẹ nọ a rehọ oro ru, ọjọ okajọ ọdekọ oka ọfa. Ọghẹnẹ ọ tẹ wariẹ kere Ijaje Ikpe na fihọ itho ekpakpala ivẹ efa, keme Mosis okpe erọ ọsosuọ na no. A te fi itho nana họ eva etehe ọvọ na. Yọ afi akana e mana fihọ eva riẹ re. Whọ kareghẹhọ oware nọ mana orọ?

Erọn oniọvo Mosis họ ọ nọ Ọghẹnẹ ọ hae re ọ jọ ozerẹ okpehru. Ọ ye o je su ahwo na eva ẹgọ Jihova. Yọ emezae riẹ izerẹ re.

Enẹna kọ rri ukpẹ ulogbo evaọ uwoudhu na. Orro vi ukpẹ osese na isiava. Kọ whọ ruẹ etehe hayo okọ osese na, nọ iwiri jọ ibi kunye no ze na? Onana họ aruẹri oria nọ izerẹ na erẹjọ mahe eware nọ i re gbo orre awere nọ a re se insẹnse. Yọ ada ukpẹ oriẹ nọ o wo ikpẹ ihrẹ. Oware avesa eva ubroukpẹ na họ emẹjẹ. Ehru riẹ a fi ikulu ebrẹdi 12 họ.

Evaọ ogege ọrọ uwoudhu na egebule ologbo ọriẹ, hayo odhe nọ ọvọ avọ ame. Ọ ye izerẹ na a jẹ họ. Aruẹri ologbo na ọriẹ re. Etenẹ a jẹ mahe erao iwhowhu ro dhe idhe kẹ Jihova. Uwoudhu na onwane rọ odhodhe iwhre na, yọ iwoudhu Ahwo-Izrẹl e ware riẹe họ kpobi.

Ọnyano 25:8-40; 26:1-37; 27:1-8; 28:1; 30:1-10, 17-21; 34:1, 2; Ahwo Hibru 9:1-5.



Enọ

  • Ẹvẹ a re se uwou nọ o rrọ uwoho na, kọ eme a rẹ jariẹ ru?
  • Fikieme Jihova ọ rọ ta kẹ Mosis inọ a ru uwou-udhu na evaọ oghẹrẹ nọ a rẹ sae rọ fariẹe lọlọhọ?
  • Eme họ etehe nọ ọ rrọ ubrukpẹ osese nọ o rrọ obọ oka uwou-udhu na, kọ eme ọ rrọ eva etehe na?
  • Ono Jihova ọ salọ re ọ jọ ozerẹ okpehru, kọ eme ozerẹ okpehru na o re ru?
  • Fodẹ eware esa nọ e rrọ ubrukpẹ ulogbo orọ uwou-udhu na.
  • Eware ivẹ vẹ e rrọ ogege uwou-udhu na, kọ eme họ iruo rai?

Enọ efa

  • Se Ọnyano 25:8-40; 26:1-37; 27:1-8; gbe 28:1.

    Eme chẹrọb nọ ọ rrọ ‘etehe isẹri na’ o dikihẹ kẹ? (Ọny. 25:20, 22; Ikele. 7:89; 2 Iv. 19:15)

  • Se Ọnyano 30:1-10, 17-21; 34:1, 2; gbe Ahwo Hibru 9:1-5.

    Fikieme Jihova o ro fi ẹgba họ ẹfuọ ugboma kẹ izerẹ nọ i bi ruiruo evaọ uwou-udhu na, kọ ẹvẹ onana u re kpomahọ omai nẹnẹ? (Ọny. 30:18-21; 40:30, 31; Hib. 10:22)

    Ẹvẹ Pọl ukọ na o ro dhesẹ nọ uwou-udhu gbe ọvọ Uzi na i no iruo no eva oke nọ o ro kere ileta riẹ se Ileleikristi obọ Hibru? (Hib. 9:1, 9; 10:1)