Kpohọ eme nọ e riẹ eva

Kpohọ oria izoẹme

Ikuigbe avọ 35: Jihova Ọkẹ Izi Riẹ

Ikuigbe avọ 35: Jihova Ọkẹ Izi Riẹ

OWỌHỌNỌ emera ivẹ evrẹ nọ a no Ijipti, nọ Ahwo-Izrẹl a ro te ugbehru Sainai, nọ a re se Horẹb re. Oria ovo nana Jihova ọ jẹ tẹme kẹ Mosis evaọ ẹwọ nọ ọ jẹ to. Ahwo na awohọ etenẹ jẹ ria umuthoke.

Nọ ahwo a jẹ hẹrẹ obọ otọ na, Mosis ọ tẹ gadiẹ ugbehru na. Evaọ ehru ugbehru na Jihova ọ jẹ ta kẹ Mosis nọ Ọ gwọlọ Ahwo-Izrẹl re ayo eme Riẹ jẹ jọ uvi ahwo Riẹ. Nọ Mosis o nwo-tọ, ọ tẹ vuẹ Ahwo-Izrẹl oware nọ Jihova ọ ta kae. Ahwo na a tẹ ta nọ a re ti yo ẹme kẹ Jihova, keme a gwọlọ jọ ahwo riẹ.

Jihova o te ru oware ugbunu. O ru ehru ugbehru na kunye iwiri, jeru egbrara va. Ọ zoma ta kẹ ahwo na nọ: ‘Mẹ họ Jihova Ọghẹnẹ rai nọ ọ reho whai no Ijipti ze.’ Ọ tẹ ta kae: ‘Wha rẹ gọ eghẹnẹ efa ha ajokpa nọ mẹ ọvo.’

Ewẹ itho ivẹ

Ọghẹnẹ ọ kẹ Ahwo-Izrẹl ijaje izii, hayo izi efa. Ozọ umu ahwo na gaga. A tẹ ta kẹ Mosis nọ: ‘Whọ ta k’omai, ke me ozọ o rro mai emuo nọ ma ti whu orọnọ Ọghẹnẹ ọ ta k’omai.’

Uwremu riẹ Jihova ọ vuẹ Mosis: ‘Nya bru omẹ ze obọ ugbehru na. Mẹ rẹ te k’owhẹ itho ekpakpala ivẹ nọ me kere izi nọ mẹ gwọlọ nọ ahwo na akoko fihọ.’ Fikiere Mosis o te zihe kpobọ ugbehru na. Edẹ gbe eso 40 ọ ria etẹe.

Ọghẹnẹ o wo izi buobu, buobu kẹ ahwo riẹ. Mosis okere izi nana họ otọ. Ọghẹnẹ ọ kẹ Mosis itho ekpakpala ivẹ. Eva enana, Ọghẹnẹ oma riẹ okere izi 10 nọ ọ ta kẹ ahwo na kpobi fihọ. A serai nọ Ijaje Ikpe.

Mosis evaọ ugbehru Sainai

Ijaje Ikpe na yọ izi nọ iwo uzou re. Yọ ere izi efa buobu nọ Ọghẹnẹ ọ kẹ Ahwo-Izrẹl e rọ re. Ovo jọ izi enana họ: ‘Whọ rẹ rehọ udu ra kpobi, iroro ra kpobi, uzuazọ ra kpobi je gbe ogaga ra kpobi you Jihova.’ Ofa họ: ‘Who re you omọfa epanọ who you oma ra.’ Ọmọ Ọghẹnẹ, Jesu Kristi, ọ ta nọ enana họ izi ivẹ nọ emae rro nọ Jihova ọ rọ kẹ ahwo riẹ Izrẹl. Okeofa ma ti wuhrẹ eware buobu kpahe Ọmọ Ọghẹnẹ gbe iwuhrẹ riẹ.

Ọnyano 19:1-25; 20:1-21; 24:12-18; 31:18; Iziewariẹ 6:4-6; Iruo-Izerẹ 19:18; Matiu 22:36-40.



Enọ

  • Oware wọhọ emerae ivẹ nọ a no Ijipti no, diẹse emọ Izrẹl a wohọ?
  • Eme Jihova ọ ta nnọ ọ gwọlọ nọ ahwo riẹ a ru, kọ didi uyo a kẹ?
  • Fikieme Jihova ọ rọ kẹ Mosis itho ekpakpala ivẹ?
  • U te no Ijaje Ikpe na no, izi efa vẹ Jihova ọ rọ kẹ emọ Izrẹl?
  • Izi ivẹ vẹ Jesu Kristi ọ ta nnọ e mae rro?

Enọ efa

  • Se Ọnyano 19:1-25; 20:1-21; 24:12-18; gbe 31:18.

    Ẹvẹ eme nọ a kere fihọ Ọnyano 19:8 i ro fi obọ họ kẹ omai wo otoriẹ oware nọ omaromudhe Oleleikristi o rrọ? (Mat. 16:24; 1 Pita 4:1-3)

  • Se Iziewariẹ 6:4-6; Iruo-Izerẹ 19:18; gbe Matiu 22:36-40.

    Ẹvẹ Ileleikristi a re ro dhesẹ uyoyou rai kẹ Ọghẹnẹ gbe ọrivẹ? (Mak 6:34; Iruẹru 4:20; Rom 15:2)