Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 34: Oghẹrẹ Emu Ọkpokpọ

Ikuigbe avọ 34: Oghẹrẹ Emu Ọkpokpọ

WHỌ sae ta oware nọ ahwo na abe tọlọ no otọ na tha? Owọhọ nọ odhẹmu. Orẹ fuafo, oma kakae vẹvẹvẹ. Rekọ ame-no-dhẹmu hu; oware jọ nọ arẹ ria.

Ahwo-Izrẹl nọ a be whẹ mana

Amara ọvo ọvo ọvrẹ no nọ Ahwo-Izrẹl ano Ijipti no. A rọ eva igbruẹwọ. Emuore etenẹ otulo ho, fikiere ahwo na a te muhọ ẹgo, ta nọ: ‘Ma gwọlọ nọ Jihova ohe kpe omai fihọ obọ Ijipti. Ma jọ obei wo emu kpobi nọ ma gwọlọ.’

Fikiere Jihova ọ tẹ ta nọ: ‘Me bi ti ru emu rrọ oso no obọ idadeghe tha.’ Yọ ere Jihova o ghine ru. Okiokiọ riẹ nọ Ahwo-Izrẹl a ruẹ emu ọfuafo na nọ okie, ohwo ọ tẹ be nọ ohwo nọ: ‘Kinọ eme?’

Mosis ọ tẹ ta nọ: ‘Onana emu nọ Jihova ọ kẹ owhai re wha re.’ Ahwo a te sei MANA. Ọmere unu wọhọ omodaka sese nọ a rehọ ọnyọ ru.

‘Wha rẹ sae tọlọ epanọ omomọvo ọ rẹ sae re,’ ere Mosis ọ ta kẹ ahwo na. Kohiohiẹ kohiohiẹ enẹ a je ru. Rekọ nọ ọre o te lo gano, e mana nọ a tọlọ kiọkọ otọ na evẹ ghra.

Mosis ọ ta nọ: ‘Ohwo ọvo ọ rẹ sẹro ovuovo te okiokiọ họ.’ Rekọ otu ahwo jọ a gaviezọ họ. Wha riẹ oware nọ ovia? Ohiohiẹ ọfa e mana nọ a sẹro na etẹvọ avọ ihoi, jemu ore utuoma họ egbo!

Dede na, ẹdẹ ọvo eva ẹkpoka, Jihova ọ ta kẹ ahwo na nọ a kua akuava mana na. Onana yọ ẹdẹ avọ ezeza. Jihova ọ ta nọ a sẹro ejọ te okekiọ, keme o ti siobọ no ọvuọvo re okie eva ẹdẹ avọ ihrẹ hẹ. Nọ a sẹro e mana na te ẹdẹ avihrẹ, ihoi erẹ rua’e he yọ i re gbo orre utuoma gbe he! Onana oka ugbunu ofa!

Ikpe kpobi nọ Ahwo-Izrẹl a rọ jọ eva igbruẹwọ na Jihova ọ rehọ mana rọ kua’e.

Ọnyano 16:1-36; Ikelakele 11:7-9; Joshua 5:10-12.



Enọ

  • Evaọ uwoho na, eme ahwo na a be jọ otọ tọlọ na, kọ ẹvẹ a re sei?
  • Didi ithubro Mosis ọ kẹ ahwo na kpahe ẹtọlọ emana na?
  • Eme Jihova ọ ta kẹ ahwo na nọ a ru evaọ ẹdẹ avọ ezeza, kọ fikieme?
  • Didi oware igbunu Jihova o ru nọ a tẹ rawo emana na hẹrioke ruọ ẹdẹ avọ ihrẹ?
  • Ẹvẹ Jihova ọ rehọ emana ko ahwo na kri te?

Enọ efa

  • Se Ọnyano 16:1-36 gbe Ikelakele 11:7-9.

    Eme Ọnyano 16:8 u dhesẹ kpahe ẹgwọlọ nọ ma rẹ rọ rehọ adhẹẹ kẹ enọ Ọghẹnẹ o ro mu evaọ ukoko Ileleikristi na? (Hib. 13:17)

    Evaọ igbrẹwọ na, ẹvẹ a rọ kareghẹhọ emọ Izrẹl kẹdẹ kẹdẹ inọ a re fi eva họ Jihova? (Ọny. 16:14-16, 35; Izie. 8:2, 3)

    Otofa ẹwoho vẹ Jesu ọ kẹ emana na, kọ ẹvẹ ma bi ro wo erere no ‘ebrẹdi nana nọ o no odhiwu ze’ na? (Jọn 6:31-35, 40)

  • Se Joshua 5:10-12.

    Bro ikpe emọ Izrẹl a re emana, ẹvẹ onana o rọ dawo ai, kọ eme ma rẹ sae jọ ikuigbe nana wuhrẹ? (Ọny. 16:35; Ikele. 11:4-6; 1 Kọr. 10:10, 11)