Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 44: Rehab Osi Ekiotọ Na No

Ikuigbe avọ 44: Rehab Osi Ekiotọ Na No

AHWO ọnana arọ eva ukpokpoma. A rẹ dhẹ kpo, hayo a re kpai no. Ekiotọ Ahwo-Izrẹl arọ, yọ aye nọ obi fiobọhọ kae na họ Rehab. Etenẹ Rehab ọ be jọ ria evaọ uwou nọ orọ ehru ugbẹhẹ okpẹwho Jeriko. J’oma kiẹ via, onosoriẹ nọ ahwo ọnana a jẹ rọ ukpokpoma.

Ahwo-Izrẹl a wọ no re a te fa Ethẹ Jọdan vrẹ kpobọ otọ Kenan na. Rekọ tao re a te ru ere, Joshua o te vi ekiotọ ivẹ vrẹ. Ọ tẹ ta kae nọ: ‘Wha nya i riwi otọ na gbe okpẹwho Jeriko na.’

Rehah avọ ekiotọ Izrẹl

Okenọ ekiotọ na a te obọ Jeriko, a tẹ nya kpobọ uwou ọ Rehab. Rekọ ohwo jọ ọ tẹ vuẹ ovie Jeriko nọ: ‘Imava Ahwo-Izrẹl a nyaze obonẹ evaọ aso ọnana re akiẹ otọ na riwi.’ Nọ ovie na oyo onana, o te vi ahwo kpobọ Rehab, a tẹ kẹe uzi nọ: ‘Ahwo nọ arọ evaọ uwou ra na, rehae ze!’ Rekọ Rehab o si ekiotọ na no họ ehru uwou riẹ. Fikiere ọ tẹ ta nọ: ‘Ahwo jọ a ghinẹ nyaze obọ uwou mẹ, rekọ mẹ riẹ obonọ a nọ ze he. A nwani si owọ no, avọ oke nọ ubi kpo na, tao re a tete wuhu unuẹthẹ okpẹwho na. Wha te lai kpatakpata, wha re ti lai muẹ!’ Fikiere a te mu ahwo na họ ele.

Okenọ akpo no, Rehab ọ tẹ dhẹ kpatakpata kpobọ ehru uwou na. Ọ tẹ ta kẹ ekiotọ na nọ, ‘mẹ riẹ nọ Jihova ọ te kẹ owhai otọ onana. Ma yo epanọ ọ rehọ ru Abade Ọwawae kpọ okenọ wha jẹ nyano Ijipti, gbe epanọ wha ro kpe ivie Saihọn avọ Ọg. Mẹ riẹ owhai ru, fikiere ivie, wha yaeya kẹ omẹ nọ, wha rẹ te riẹ omẹ ru. Wha siwi ọsẹ mẹ gbe oni mẹ inievo emezae gbe erọ emetẹ mẹ.’

Ekiotọ na e tẹ ya nọ a ti ru ere, rekọ Rehab o re ru oware jọ. ‘Rehọ ufi owawae onana, re who thuriei họ evaọ unwido ra,’ ere ekiotọ na e tae, ‘who ve koko imoni ra kpobi kugbe oma ze uwou ra. Re okenọ mai kpobi a ziheze te rehọ Jeriko, ma jẹ ruẹ ufi onana evaọ unwido ra, ma gbe kpe ohwo ọvuọvo evaọ uwou ra ha.’ Okenọ ekiotọ na a zihe bru Joshua, a tẹ ta oware kpobi nọ ovia rọ kẹe.

Joshua 2:1-24; Ahwo Hibru 11:31.



Enọ

  • Diẹse Rehab ọ jẹ rria?
  • Amono họ ezae ivẹ nọ e rrọ uwoho na, kọ fikieme a jẹ rrọ Jeriko?
  • Eme ovie Jeriko ọ ta kẹ Rehab nọ o ru, kọ didi uyo ọ kẹ?
  • Ẹvẹ Rehab o ro fi obọ họ kẹ ezae ivẹ na, kọ didi aruoriwo ọ yare?
  • Didi eyaa ekiotọ ivẹ na a yaa kẹ Rehab?

Enọ efa

  • Se Joshua 2:1-24.

    Ẹvẹ eyaa Jihova nọ a kere fihọ Ọnyano 23:27, 28 i ro rugba nọ emọ Izrẹl a wọ ẹmo ziọ Jeriko? (Josh. 2:9-11)

  • Se Ahwo Hibru 11:31.

    Ẹvẹ oriruo Rehab o ro dhesẹ epanọ ẹrọwọ o wuzou te? (Rom 1:17; Hib. 10:39; Jem. 2:25)