Kpohọ eme nọ e riẹ eva

Kpohọ oria izoẹme

Ikuigbe avọ 40: Mosis Ọ Tehe Utho Na

Ikuigbe avọ 40: Mosis Ọ Tehe Utho Na

IKPE i te muhọ ẹvrẹ—ikpe 10, ikpe 20, ikpe 30, ikpe 39! Yọ Ahwo-Izrẹl agbẹ rọ evaọ igbrẹwọ. Rekọ evaọ ikpe nana kpobi yọ Jihova ọbe sẹro ahwo riẹ. Mana ọ jẹ rehọ kua’e. Ukoli ẹgho, o je ro sua’e okiuvo, oke aso kọ ukoli erae. Yọ evaọ ikpe nana kpobi iwu rai eyẹ hẹ, awọ rai owo omola ha.

Ọnana họ amara ọsosuọ ọrọ ukpe avọ 40 nọ arọ nya no Ijipti no na. Ahwo-Izrẹl a tẹ wariẹ fa evuẹ họ Kedẹsh. Etenẹ họ o ria nọ a jọ, okenọ avi ekiotọ 12 na, nyae kiẹ otọ Kenan unwenọ ikpe 40 nọ evrẹ no. Eva Kedẹsh Miriam oniọvo ọmọtẹ Mosis o je whu. Yọ ukpokpoma o rọ etenẹ, epanọ o jọ okejọ.

Ahwo a gwọlọ ku ame ọvuọvo ho. Fikiere a tẹ jẹ go kẹ Mosis nọ: ‘Ma he whu oye ohẹ mai woma. Fikieme whọ jẹ rehọ omai no obọ Ijipti ze oria uyoma onana, oria nọ oware ovuovo o rẹ jọ ruaha? Ibi eriẹ hẹ, ifigi kaka, ego kaka, pomẹgraneti kaka. Tubọ ame nọ a rẹ da dede ọ riẹ hẹ.’

Mosis nọ ọ rọ ọkpọ fa utho na

Okenọ Mosis avọ Erọn akpobọ uwoudhu-egaga nyae lẹ, Jihova ọ tẹ ta kẹ Mosis nọ: ‘Koko ahwo na họ. Re whọ tẹme kẹ utho nọ o rọ etẹna evaọ iraro rai kpobi. Ame nọ o ti noi tha, o ti te kẹ ahwo na gbe erao rai kpobi.’

Fikiere Mosis o te koko ahwo na kpobi họ, ọ tẹ ta nọ: ‘Wha gaviezọ, whai enọ ifieva họ Ọghẹnẹ hẹ! Kọ mẹ avọ Erọn a re siọ ame no utho onana ze kẹ owhai?’ Koyehọ Mosis ọ rehọ ọkpọ tehe utho na isiava, ame buobu o te hwẹ no utho na ze. Ame buobu ọ tẹ rọ kẹ ahwo na kpobi gbe erao nọ arẹ da.

Rekọ Jihova o te muofu kẹ Mosis avọ Erọn. Kọ whọ riẹ onosoriẹ? Fiki epanọ Mosis avọ Erọn a ta nọ, ae a be te rehọ ame no utho na ze. Rekọ yọ Jihova oru rie. Yọ fiki epanọ Mosis avọ Erọn a ta uzẹme kpahe onana ha, Jihova ọ tẹ ta nọ, ọ be te kae uye. ‘Wha re ti su ahwo mẹ te obọ Kenan he,’ ere ọ tae.

Ukrihi Ahwo-Izrẹl a tẹ nya no Kedẹsh. Nọ oke kpẹkpẹe ovrẹ no, a tẹ nya te ugbehru ọ Họ. Etenẹ Erọn o je whu, evaọ obọ ehru ugbehru na. Ikpe 123 ọkpako te evaọ oke uwhu riẹ. Ahwo-Izrẹl a weri gaga, fikiere kọ edẹ 30 ahwo na kpobi aviẹ fikiọ Erọn. Ẹlieza ọmọzae riẹ, o te zihe ruọ ozerẹ ologbo avivẹ ọrọ orẹwho Izrẹl.

Ikelakele 20:1-13, 22-29; Iziewariẹ 29:5.



Enọ

  • Ẹvẹ Jihova ọ rọ sẹro emọ Izrẹl eva okenọ a jọ igbrẹwọ na?
  • Didi inoma emọ Izrẹl a gu nọ a wohọ Kadẹsh?
  • Ẹvẹ Jihova ọ rọ kẹ ahwo na gbe erao rai ame?
  • Evaọ uwoho na, ono họ ohwo nọ ọ be riẹ obọ họ oma riẹ na, kọ fikieme o bi ro ru ere?
  • Fikieme eva Mosis avọ Erọn e jẹ dha Jihova, kọ ẹvẹ ọ rọ kẹ ae uye?
  • Eme ọ via evaọ Ugbehru ọ Họ, kọ ono o zihe ruọ ozerẹ okpehru ọ Izrẹl?

Enọ efa

  • Se Ikelakele 20:1-13, 22-29 gbe Iziewariẹ 29:5.

    Eme ma wuhrẹ no edhere nọ Jihova ọ rọ sẹro emọ Izrẹl evaọ igbrẹwọ na ze? (Izie. 29:5; Mat. 6:31; Hib. 13:5; Jem. 1:17)

    Ẹvẹ Jihova o rri orro nọ Mosis avọ Erọn a kẹ riẹ hẹ evaọ aro Izrẹl? (Ikele. 20:12; 1 Kọr. 10:12; Evia. 4:11)

    Eme ma rẹ sai wuhrẹ no oghẹrẹ nọ Mosis ọ rehọ uye nọ Jihova ọ kẹ riẹ na ze? (Ikele. 12:3; 20:12, 27, 28; Izie. 32:4; Hib. 12:7-11)