Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 33: Ẹfavrẹ Abade Ọwawae Na

Ikuigbe avọ 33: Ẹfavrẹ Abade Ọwawae Na

RRI oware nọ obe via! Yọ Mosis avọ ọkpọ riẹ nọ ọriẹ fihọ Abade Ọwawae na. Enọ erọ kugbei eva abọdekọ nọ ezọ na họ Ahwo-Izrẹl. Rekọ Fẹro avọ ogba ẹmo riẹ ada ame whu eva abade. Jọ ma ruẹ epanọ onana o rọ via.

Ogbaẹmo Ijipti nọ o be dame whu

Epanọ ma wuhrẹ, Fẹro ọ ta kẹ Ahwo-Izrẹl nọ a no Ijipti nọ Ọghẹnẹ ọ rehọ uye avọ 10 kẹ Ahwo-Ijipti no. Wọhọ ezae Ahwo-Izrẹl 600,000 ino rie, te eyae buobu gbe emọ. Ahwo buobu efa nọ erọwo Jihova, a no rie kugbe Ahwo-Izrẹl re. Ai kpobi a rehọ igodẹ gbe ewe gbe iruẹ rai gboma.

Re a tẹ te nyavrẹ, Ahwo-Izrẹl a yare ehọ gbe eware nọ a rehọ oro gbe idọlọ ru mi Ahwo-Ijipti. Ozọ u te je mu Ahwo-Ijipti gaga, fiki uye urere nọ ovia kae. Fikiere a tẹ rehọ oware nọ Ahwo-Izrẹl a yare kpobi rọ kae.

Edẹjọ evrẹno Ahwo-Izrẹl a tete Abade Ọwawae na. Etẹe a je serihọ. Eva oke oyena, Fẹro avọ ahwo riẹ abi weli fiki nọ asiobọno Ahwo-Izrẹl kpo. ‘Ma siobọno erigbo mai kpo no!’ ere a je bo.

Fikiere Fẹro ọ tẹ wariẹ nwene iroro riẹ. Ọ tẹ nwane ruẹrẹ ekẹkẹ-ẹmo gbe egbaẹmo riẹ họ. A tẹ rehọ obọdẹ ekẹkẹ ẹmo 600, gbe ekẹkẹ-ẹmo efa kpobi mu Ahwo-Izrẹl họ ele.

Nọ Ahwo-Izrẹl a ruẹ Fẹro avọ ogbaẹmo riẹ nọ abe rọ tua’e, ozọ u te mua’e gaga. Edhere nọ a rẹ dhẹ ọ jọ họ. Abade Ọwawae na ọ jọ abọjọ rae, yọ Ahwo-Ijipti a bi no abọfa tha, rekọ Jihova o te fi ẹgho họ udevie ahwo riẹ avọ Ahwo-Ijipti. Fikiere Ahwo-Ijipti a gbẹjẹ ruẹ ude re a lele Ahwo-Izrẹl họre he.

Jihova ọ tẹ ta kẹ Mosis re ọ riẹ ọkpọ riẹ fihọ Abade Ọwawae na. Nọ oru ere, Jihova o te ru ofou ovatha ọre ọgaga re ofou. Ame abade na ọjẹ hẹriẹ, ame na ọ tẹ daji ọvuọ abọ riẹ.

Koyehọ Ahwo-Izrẹl amu otọ oyaya abade na họ ẹnya. Orehọ oke buobu re ubua-hwo na avọ erao rai a tẹ nya dhedhẹ kpohọ abọdekọ abade na. Uwhremu riẹ Ahwo-Ijipti a te ti mu Ahwo-Izrẹl họ ẹruẹ. Erigbo rai abi kpo no yoo! Fikiere a tẹ họrọ lelae ruọ eva abade na.

Nọ a ro eva no, Ọghẹnẹ o je si etẹ ekẹkẹ rai no. Ozọ u te mu Ahwo-Ijipti gaga bi bo nọ: ‘Jihova ọ be họre kẹ Ahwo-Izrẹl mukpahe omai. Jọ ma no etenẹ no!’ Rekọ yọ uleye hrọ no.

Onana ojọ okenọ Jihova ọ ta kẹ Mosis nọ ọriẹ ọkpọ riẹ fihọ Abade Ọwawae na, wọhọ epanọ wha ruẹ eva uwoho na. Nọ Mosis o ru ere, igbẹhẹ ame na i te muhọ eziheze ruru Ahwo-Ijipti avọ ekẹkẹ rae. Otu-ẹmo na kpobi alele Ahwo-Izrẹl ruọ eva abade na. Ọvuọvo Ahwo-Ijipti ọzọhọ!

Ẹvẹ eva ewere ahwo Ọghẹnẹ nọ awo usiwo te! Ahwo na a tẹ so ole ujiro kẹ Jihova, ta nọ: ‘Jihova o fi obọ ruaro kpare. Ogele enyenya avọ enọ edhẹ rae fihọ eva abade.’ Miriam oniọvo Mosis ọ tẹ rehọ emegede riẹ, eyae na kpobi avọ imigede rai a te leliei. Yọ agbe avọ oghọghọ, yọ abe so ole nọ ezae na a jẹ so: ‘Jihova o fi obọruaro kpare. O gele enyenya avọ enọ edhẹ rae fihọ abade.’

Ọnyano izou 12 ri te 15.



Enọ

  • Bro ezae Izrẹl, te eyae gbe emọ, a no Ijipti, kọ amono a lele i rai?
  • Ẹvẹ o jọ Fẹro oma nọ o si obọ no emọ Izrẹl kpo no, kọ eme o ru?
  • Eme Jihova o ru rọ whaha ohọre nọ ahwo Ijipti a rẹ họre ahwo riẹ?
  • Eme ọ via nọ Mosis ọ riẹ ọkpọ riẹ họ Abade Ọwawae na, kọ eme emọ Izrẹl a ru?
  • Eme ọ via nọ ahwo Ijipti a họrọ ruọ abade na lele emọ Izrẹl?
  • Ẹvẹ emọ Izrẹl a ro dhesẹ nọ a were eva je yere Jihova inọ a zọ?

Enọ efa

  • Se Ọnyano 12:33-36.

    Ẹvẹ Jihova ọ rọ ruẹ nnọ a hwosa kẹ ahwo riẹ rọkẹ ikpe nọ a jọ igbo evaọ otọ ahwo Ijipti na? (Ọny. 3:21, 22; 12:35, 36)

  • Se Ọnyano 14:1-31.

    Ẹvẹ eme Mosis nọ e rrọ Ọnyano 14:13, 14 i ro kpomahọ idibo Jihova nẹnẹ nọ a rẹriẹ ovao ku ẹmo Amagẹdọn nọ ọ be tha na? (2 Irv. 20:17; Ol. 91:8)

  • Se Ọnyano 15:1-8, 20, 21.

    Fikieme idibo Jihova a jẹ so ile ujiro kẹe? (Ọny. 15:1, 2; Ol. 105:2, 3; Evia. 15:3, 4)

    Didi oriruo ọrọ ujiro nọ a rẹ rọ kẹ Jihova Miriam avọ eyae na eva Abade Ọwawae na a fihọ otọ kẹ eyae Ileleikristi nẹnẹ? (Ọny. 15:20, 21; Ol. 68:11)