MOSIS ọ nya ugbo na ze obọ ugbehru Horẹb re ọ gwọlọ ẹbe kẹ igodẹ riẹ. Etenẹ ọ jẹ ruẹ ẹwọ nọ ọ be ware erae, rekọ ọ be tua ha!

Mosis evaọ oria ẹwọ nọ ọ jẹ to na

Mosis o te roro nọ, ‘Onana oware oghẹrẹ sa. Me re go kẹle re mẹ nabi ri yei ziezi.’ Nọ o ru erei, urru jọ u te no ẹwọ na ze, ta nọ: ‘Who gbe go kẹle vi ere he. Si eviẹ awọ ra no, keme otọ ọrẹri who dikihẹ na.’ Ọghẹnẹ ọ jẹ rehọ ẹkwoma ẹnjẹle riẹ ta ẹme na, fikiere Mosis o te ruru ovao riẹ.

Ọghẹnẹ ọ tẹ ta nọ: ‘Mẹ ruẹ uye ahwo mẹ no eva obọ Ijipti. Fikiere me bi ti sia’i no igbo, yọ whẹ họ ọnọ me bi vi nya i su ahwo mẹ no Ijipti.’ Jihova ọ be te rehọ ahwo riẹ ze otọ uwowoma Kenan.

Rekọ Mosis ọ tẹ ta nọ: ‘Mẹ ohwo ọvuọvo ho. Ẹvẹ mẹ sai ro ru onana? Rekọ, tobọ mẹ tẹ nya. Ahwo-Izrẹl a rẹ te nọ omẹ nọ, “Ono o vi owhẹ?” Kọ ẹvẹ mẹ rẹ ta?’

Ọghẹnẹ o te yo kẹe nọ, ‘Enẹ whọ rẹ ta, “JIHOVA Ọghẹnẹ Abraham, Ọghẹnẹ Aiziki gbe Ọghẹnẹ Jekọp o vi omẹ bru owhai.”’ Jihova o te fi bae nọ: ‘Onana họ odẹ mẹ bẹdẹ bẹdẹ.’

Mosis ọ tẹ kpahe nọ, ‘Rekọ kọ otẹrọnọ a fievahọ omẹ hẹ okenọ mẹ ta nọ who vi omẹ.’

Ọghẹnẹ ọ tẹ nọe, ‘Eme ọ rọ owhẹ obọ?’

Mosis o te yo nọ: ‛Ubro-ure.’

Ọghẹnẹ ọ tẹ ta nọ, ‘Gboliei fihọ otọ.’ Nọ Mosis o je ru ere, ubro-ure na u te zihe ruọ araumuomu. Jihova o te dhesẹ oware ugbunu ofa kẹ Mosis. Ọ ta nọ: ‘Fi obọ ra họ ewu ra.’ Mosis o te ru ere, nọ o je yolo obọ riẹ ze otẹrọ fuafo wọhọ ekpale ame! Obọ na o jọ wọhọ nọ u wo ẹyao oyoma nọ a re se oti. Kẹsena Jihova ọ tẹ kẹ Mosis ogaga nọ o ro ru oware ugbunu avesa. Urere riẹ ọ tẹ ta nọ: ‘Okenọ who ru eware igbunu enana, Ahwo-Izrẹl a te rọwo nọ me vi owhẹ.’

Oyena o vrẹ no, Mosis ọ tẹ nya kpo, ta kẹ Jẹtro nọ: ‘Iviena jo me zihe bru imoni mẹ eva obọ Ijipti re me rri epanọ a rọ.’ Fikiere Jẹtro o te yere Mosis kodẹ, Mosis ọ tẹ ruọ edhere bi zihe kpohọ Ijipti.

Ọnyano 3:1-22; 4:1-20.



Enọ

  • Didi odẹ ugbehru nọ o rrọ uwoho na?
  • Dhesẹ oware igbunu jọ nọ Mosis ọ ruẹ nọ ọ rehọ igodẹ riẹ kpohọ obọ ugbehru.
  • Eme urru jọ o ta rono ẹwọ nọ ọ jẹ to na ze, kọ urru ono oye?
  • Didi uyo Mosis ọ kẹ nọ Ọghẹnẹ ọ ta kẹe inọ o ti su ahwo Ọghẹnẹ rono Ijipti?
  • Eme Ọghẹnẹ ọ ta kẹ Mosis nọ ọ ta otẹrọnọ ahwo na a nọ riẹ ohwo nọ o vi rie ze?
  • Ẹvẹ Mosis ọ sai ti ro dhesẹ via inọ Ọghẹnẹ họ ohwo nọ o vi rie ze?

Enọ efa

  • Se Ọnyano 3:1-22.

    Ẹvẹ oware nọ o via kẹ Mosis na o rọ kẹ omai udu inọ ma tẹ maki roro nnọ ma te kẹ iruo Uvie na jọ họ, Jihova ọ te tha omai uke? (Ọny. 3:11, 13; 2 Kọr. 3:5, 6)

  • Se Ọnyano 4:1-20.

    Didi enwene evaọ uruemu Mosis o roma via evaọ etoke ikpe 40 nọ ọ raha evaọ Midian, kọ eme enọ i bi le ute ọkwa-iruo evaọ ukoko na a rẹ sae jọ onana wuhrẹ? (Ọny. 2:11, 12; 4:10, 13; Mae. 6:8; 1 Tim. 3:1, 6, 10)

    Jihova ọ tẹ make rehọ ẹkwoma ukoko riẹ whọku omai, didi udufihọ oriruo Mosis ọ rẹ sae kẹ omai? (Ọny. 4:12-14; Ol. 103:14; Hib. 12:4-11)