Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 23: Ewezẹ Fẹro

Ikuigbe avọ 23: Ewezẹ Fẹro

IKPE ivẹ e vrẹ no, yọ Josẹf ọ gbẹ rọ uwou-odi. Ọwha-egho na ọ re kareghẹhiẹe he. Kẹsena, eva aso ọvo jọ, Fẹro ọ tẹ wezẹ ewezẹ ivẹ oghẹrẹ sa jọ, u te gbe’i unu oware nọ otofa rai o rọ. Whọ rue riẹ nọ ọ be wezẹ eva etẹ? Okiokiọ riẹ Fẹro o te se ahwo iwareghẹ riẹ ọ tẹ ta ewezẹ na kae. Rekọ a sae faotọ ewezẹ riẹ na ha.

Koyehọ ọwha-egho na ọ tẹ jọ uwhruemuna kareghẹhọ Josẹf. Ọ tẹ ta kẹ Fẹro: ‘Okenọ mẹ jọ uwou-odi, ohwo jọ ọ jọ obei nọ ọ rẹ fotọ ewezẹ.’ Fẹro ọ tẹ ta nọ a nwane rehọ Josẹf no uwou-odi ze.

Fẹro ọ tẹ ta ewezẹ riẹ kẹ Josẹf: ‘Mẹ ruẹ iruẹ ihrẹ epoporiẹ nọ i woma gaga. Kẹsena mẹ tẹ ruẹ iruẹ edọdọ ihrẹ nọ i re gẹdu. Edọdọ na e tẹ re epoporiẹ na no.

Fẹro nọ ọ be wezẹ ewezẹ

‘Eva ewezẹ avivẹ mẹ, mẹ ruẹ irueka ihrẹ nọ e gba jẹ ware no nọ erọ ehriọka ọvo. Mẹ tẹ jẹ ruẹ irueka edọdọ ihrẹ nọ e ya fia. Koyehọ irueka edọdọ ihrẹ na i te mu iwoma ihrẹ na họ ẹlọ no.’

Josẹf ọ tẹ ta kẹ Fẹro: ‘Ewezẹ ivẹ na otọofa ovo i wo. Iruẹ epoporiẹ ihrẹ gbe irueka egbagba ihrẹ na i dhesẹ ikpe ihrẹ, yọ iruẹ edọdọ ihrẹ gbe irueka edọdọ ihrẹ na i dhesẹ ikpe ihrẹ efa re. Ikpe ihrẹ e te jọ nọ emuore buobu ọ te jọ eva Ijipti. Kẹsena ikpe ihrẹ e te jọ nọ emuore ọ te jọ kakao.’

Fikiere Josẹf ọ tẹ ta kẹ Fẹro: ‘Sanọ ohwo nọ o wareghẹ re who fie’i họ uzou emu ọkwa koko eva emamọ ikpe ihrẹ na. Re ohọo u gbe kpe ahwo whuẹ hẹ eva ikpe iyoma ihrẹ nọ emuore ọ te jọ kakao na.’

Ẹme na ọ were Fẹro. Ọ tẹ sanọ Josẹf re o koko emuore na họ, jẹ sẹro riẹ. U te no Fẹro no, Josẹf họ ohwo nọ ọ mai wouzou eva Ijipti.

Ikpe eree e vrẹ no, eva oke ohọo na, Josẹf ọ tẹ ruẹ ahwo jọ nọ a be nya tha. Kọ whọ riẹ ahwo na? Ẹhẹ, imoni ekpako 10 riẹ na! Jekọp ọsẹ rai o vi rai kpohọ obọ Ijipti keme emuore rai o bi re no eva obọ Kenan. Josẹf o vuhu imoni riẹ na, rekọ ae a vuhu rie he. Whọ riẹ oware nọ o soriẹ? Fiki nọ Josẹf ọ kpako no, yọ ọ gẹgọ iwu oghẹrẹ sa.

Josẹf ọ tẹ kareghẹhọ nọ okenọ ọ jọ ọmaha ọ wezẹ ewezẹ kpahe epanọ imoni riẹ i ti ro kieigwẹ kẹe. Whọ kareghẹhọ nọ who se kpahe oyena? Fikiere Josẹf ọ tẹ ruẹ nọ Ọghẹnẹ họ ọnọ o vi riei kpohọ obọ Ijipti fiki omamọ ẹjiroro. Kọ eme who roro nọ Josẹf o re ruẹ? Ma dai rri.

Emuhọ 41:1-57; 42:1-8; 50:20.



Enọ

  • Eme ọ via kẹ Fẹro evaọ aso jọ?
  • Fikieme ọwha-egho na ọ te rọ kareghẹhọ Josẹf?
  • Wọhọ epanọ uwoho na u dhesẹ, ewezẹ ivẹ vẹ Fẹro ọ wezẹ?
  • Eme Josẹf ọ ta nnọ ewezẹ na i dhesẹ?
  • Ẹvẹ Josẹf o ro zihe ruọ ohwo nọ ọ mae rro nọ ọ rọ kẹle Fẹro evaọ Ijipti?
  • Fikieme inievo Josẹf a rọ ziọ Ijipti, kọ fikieme a gbe ro vuhu iei hi?
  • Ewezẹ vẹ Josẹf ọ kareghẹhọ, kọ eme onana u fi obọ họ kẹe vuhumu?

Enọ efa

  • Se Emuhọ 41:1-57.

    Ẹvẹ Josẹf ọ rọ kpọ oruaro bru Jihova, kọ edhere vẹ Ileleikristi nẹnẹ a sae rọ raro kele oriruo riẹ? (Emu. 41:16, 25,28; Mat. 5:16; 1 Pita 2:12)

    Ẹvẹ ikpe nọ emuore ọ jọ buobu evaọ Ijipti, enọ ikpe ohọo i lele na, e rọ nwani dhesẹ ohẹriẹ nọ o rrọ uyero abọ-ẹzi ahwo Jihova nẹnẹ gbe ọrọ Kristẹndọm? (Emu. 41:29, 30; Emọs 8:11, 12)

  • Se Emuhọ 42:1-8 gbe 50:20.

    Kọ o thọ re egegagọ Jihova a rọ uzou kpotọ kẹ ohwo evaọ ọghọ odhesẹ hayo fiki adhẹẹ kẹ ọkwa riẹ otẹrọnọ oye họ uruemu ẹwho na? (Emu. 42:6)