Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 22: A Fi Josẹf Họ Uwou-Odi

Ikuigbe avọ 22: A Fi Josẹf Họ Uwou-Odi

JOSẸF ọ jọ ikpe 17 evo okenọ a rehiẹe kpohọ obọ Ijipti. Obei a jẹ zẹe kẹ ọzae jọ nọ a re se Pọtifa. Pọtifa o bi ru iruo kẹ ovie Ijipti, nọ a re se Fẹro.

Josẹf nọ ọ rrọ uwou-odi

Josẹf o je ru iruo gaga kẹ Pọtifa, olori riẹ. Fikiere nọ Josẹf ọ kpako ze no, Pọtifa o te fiei họ uzou uwou riẹ soso. Otẹrọ ere, kọ fikieme Josẹf ọ jẹ rọ uwou-odi eva etenẹ? Fiki aye Pọtifa.

Josẹf ọ tẹ rro te ọzae avọ erru ziezi, aye Pọtifa ọ tẹ gwọlọ nọ Josẹf o leliei kiẹzẹ. Rekọ Josẹf ọ riẹ nọ onana o thọ fikiere ọ gwọlọ ruei hi. Eva e dha aye Pọtifa gaga. Fikiere nọ ọzae riẹ o je kpozi, aye na o gu erue kẹe nnọ: ‘Ekpehre Josẹf ọ ye na ọ jẹ gwọlọ lele omẹ wezẹ!’ Pọtifa ọ rọwo ẹme aye riẹ, ọ tẹ dheva kpahe Josẹf gaga. Fikiere ọ tẹ ruẹ nọ a gbolo i rie’i fihọ uwou-odi.

Ohwo nọ o wouzou uwou-odi na ọ tẹ te ruẹ nọ Josẹf emamọ ohwo ọrọ. Fikiere ọ tẹ rehiẹe mu uzou enọ erọ uwou-odi na kpobi. Uwhruemuna, Fẹro o te muofu kpahe ọwha-egho gbe othere-emu riẹ, o te fia’i họ uwou-odi. Aso jọ a te wo ọvuọ ewezẹ oghẹrẹ sa riẹ nọ a wezẹ, rekọ ae a riẹ otọofa ewezẹ rai hi. Okiokiọ riẹ Josẹf ọ tẹ ta nọ: ‘Wha ta ewezẹ rai k’omẹ.’ Nọ a jẹ tai kẹe, Josẹf, avọ obufihọ Ọghẹnẹ, ọ tẹ faotọ ewezẹ rai.

Josẹf ọ ta kẹ ọwha-egho na nọ: ‘Eva edẹ esa a ti si owhẹ no uwou-odi, whọ te wariẹ zihe ruọ ọwha-egho kẹ Fẹro.’ Fikiere Josẹf ọ tẹ ta re nnọ: ‘Okenọ whọ tẹ ruọ evevẹ no, ta kẹ Fẹro kpahe omẹ, re who fiobọhọ k’omẹ no etenẹ na.’ Rekọ Josẹf ọ tẹ ta kẹ othere-emu na nọ: ‘Eva edẹ esa ọvo Fẹro ọ te ruẹ nọ a bru uzou ra no.’

Eva edẹ esa, o tẹ via nwanọ epanọ Josẹf ọ ta. Fẹro ọ ruẹ nọ a bru uzou othere-emu na. Rekọ ọwha-egho na a te siei no uwou-odi, ọ tẹ wariẹ mu odibo họ ẹgba kẹ ovie na. Rekọ Josẹf ọ tẹ thọrọ ọwha-egho na ẹro kpobi riẹriẹriẹ! Ọ ta ẹme kẹ Fẹro kpahiẹe he, fikiere Josẹf ọ tẹ gbẹ rọ uwou-odi.

Emuhọ 39:1-23; 40:1-23.



Enọ

  • Ẹvẹ Josẹf ọ kpako te nọ a rehọ iẹe kpohọ Ijipti, kọ eme ọ via nọ o te obei?
  • Ẹvẹ Josẹf ọ rọ ruọ uwou-odi?
  • Didi owha-iruo a kẹ Josẹf evaọ uwou-odi?
  • Evaọ uwou-odi, eme Josẹf o ru kẹ ọwha-egho gbe othere-emu Fẹro?
  • Eme ọ via nọ a si ọwha-egho na no uwou-odi no?

Enọ efa

  • Se Emuhọ 39:1-23.

    Dede nọ evaọ oke Josẹf uvumọ uzi nọ u no obọ Ọghẹnẹ ze nọ o ghọ ẹnwae-obro o jariẹ hẹ, eme ọ wọ riẹ dhẹ siọ aye Pọtifa ba? (Emu. 2:24; 20:3; 39:9)

  • Se Emuhọ 40:1-23.

    Dhesẹ ewezẹ ọwha-egho na kpẹkpẹe gbe otofa nọ Jihova ọ rọ kẹ Josẹf. (Emu. 40:9-13)

    Didi ewezẹ othere-emu na ọ wezẹ, kọ eme u dhesẹ? (Emu. 40:16-19

    Ẹvẹ ọrigbo nọ o wo ẹrọwọ avọ areghẹ na nẹnẹ ọ be rọ raro kele uruemu Josẹf? (Emu. 40:8; Ol. 36:9; Jọn 17:17; Iruẹru 17:2, 3)

    Ẹvẹ Emuhọ 40:20 u ro fi elo họ eriwo Oleleikristi kpahe ehaa ẹdẹ-eyẹ? (Ọtausi. 7:1; Mak 6:21-28)