Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 21: Imoni Ọ Josẹf I Mukpahiẹe

Ikuigbe avọ 21: Imoni Ọ Josẹf I Mukpahiẹe

RRI epanọ ọmọzae na o wo uweli jẹ kare ẹruore te. Ọnana họ Josẹf. Obọnana imoni riẹ e zẹ riẹ kẹ ahwo ọnana nọ a bi kpohọ Ijipti. Obei a je ti ru Josẹf fihọ ọrigbo. Fikieme emọ-ọsẹ riẹ i je ru oware uyoma onana? Fiki nọ a be re Josẹf ihri.

Inievo Josẹf nọ a be zẹ e

Josẹf ọ were Jekọp ọsẹ rai eva gaga. O dhesẹ aruoriwo kẹe ẹkwoma ukotu uthethe uwowoma jọ nọ o ru kẹe. Nọ imoni ekpako 10 riẹ a jẹ ruẹ epanọ Jekọp o you Josẹf te, a tẹ jẹ re-ihri je mukpahe Josẹf. Rekọ oware ofa jọ osoriẹ re nọ a je mukpahiẹe.

Josẹf ọ wezẹ ewezẹ ivẹ. Eva ewezẹ ivẹ Josẹf na imoni riẹ na i je kieigwẹ kẹe. Okenọ Josẹf ọ jẹ ta ewezẹ enana kẹ imoni riẹ, egrẹ-ọjẹ rai ọ tẹ ro h’aro.

Whaọ ẹdẹ jọ nọ imoni ekpako Josẹf a jẹ rehọ ẹro te igodẹ ọsẹ rai, Jekọp o te vi Josẹf nya re o ri epanọ a rọ. Nọ imoni Josẹf a jẹ rue riẹ nọ ọ be nya tha, ejọ rai e tẹ ta nọ: ‘Ma kpe i whu!’ Rekọ Rubẹn, ọnọ ọ mae kpako, ọ tẹ ta nọ: ‘Ijo, wha ru oware utioye he!’ Ukpoye a tẹ tatabọ họ Josẹf a je gboliei fihọ ọgọdọ ame nọ ọ kpọ no. Koyehọ a keria re a jiroro oware nọ a rẹ rehiẹe ruẹ.

Ole oke onana Ahwo Ishmẹle jọ a tẹ nyaze. Juda ọ tẹ ta kẹ emọ-ọsẹ riẹ: ‘Ma zẹe kẹ Ahwo Ishmẹle na.’ Kọ ere a ru. A tẹ zẹ Josẹf ewẹ siliva 20. K’ẹvẹ onana o nyenye je yoma te!

Eme imoni riẹ e rẹ ta kẹ ọsẹ rai? A te kpe ẹwe koyehọ a duwu omamọ ukotu Josẹf na họ azẹ riẹ ẹse buobu. Koyehọ a rehọ ukotu na bru Jekọp ọsẹ rai, ta nọ: ‘Ma du ku onana. Rri yei sọ ukotu Josẹf ho.’

Jekọp ọ tẹ ruẹ nọ oye. O te bo, ‘O te jọ nọ arao ẹwọ jọ o kpe Josẹf.’ Yọ nwanọ ere imoni Josẹf e gwọlọ nọ ọsẹ rai o roro. Jekọp ọ vọ avọ uweli gaga. Ọ tẹ viẹ edẹ buobu. Rekọ Josẹf o whu hu. Ma rri oware nọ o via kẹe eva obonọ a rehe riẹ kpohọ.

Emuhọ 37:1-35.



Enọ

  • Fikieme inievo Josẹf a jẹ rọ riẹe ihri, kọ eme a ru?
  • Eme inievo Josẹf a gwọlọ ru ei, rekọ eme Rubẹn ọ ta?
  • Eme ọ via nọ ethueki Ishmẹle a nyaze?
  • Eme inievo Josẹf a ru re a ru ọsẹ rai roro nnọ Josẹf o whu no?

Enọ efa

  • Se Emuhọ 37:1-35.

    Ẹvẹ Ileleikristi a sae rọ raro kele oriruo Josẹf ẹkwoma eyoma-oruo nọ a rẹ ta via kẹ ukoko na? (Emu. 37:2; Izerẹ 5:1; 1 Kọr. 1:11)

    Eme ọ wọ inievo Josẹf rehọ ẹghẹ yeri kugbei? (Emu. 37:11, 18; Itẹ 27:4; Jem. 3:14-16)

    Eme Jekọp o ru nọ a re ru evaọ oke uweri? (Emu. 37:35)