Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 19: Jekọp O Wo Uviuwou Ulogbo

Ikuigbe avọ 19: Jekọp O Wo Uviuwou Ulogbo
Jekọp gbe emọ riẹ

FAKE riwi uviuwou ulogbo onana. Enana yọ emezae 12 ọ Jekọp. Yọ o wo emetẹ re. Kọ whọ riẹ edẹ emọ na jọ? J’oma wuhrẹ ejọ rai.

Lia o yẹ Rubẹn, Simiọn, Livai gbe Juda. Nọ Reshẹl ọ ruẹ nọ ọye o bi yẹ emọ họ, o te weli gaga. Fikiere ọ tẹ rehọ Bilha odibo-ọmọtẹ riẹ kẹ Jekọp, koyehọ Bilha o yẹ emezae ivẹ nọ a re se Dan gbe Naftali. Kẹsena Lia ọ tẹ rehọ Zilpa odibo-ọmọtẹ riẹ kẹ Jekọp re, koyehọ Zilpa o yẹ Gad avọ Asha. Uwhruemuna Lia o te je yẹ emezae ivẹ efa, Isaka avọ Zebulọn.

Uwhruemuna Reshẹl ọ tẹ te sai wo ọmọ. O te se odẹ riẹ Josẹf. Oke ofa ma ti wuhrẹ eware buobu kpahe Josẹf, keme ọ te jọ ohwo ologbo gaga. Enana họ emezae 11 nọ a yẹ kẹ Jekọp okenọ ọ jẹ ria kugbe Leban ọsẹ Reshẹl.

Jekọp o wo emetẹ jọ re, rekọ ọvuọvo rai Ebaibol o se odẹ riẹ. Odẹ riẹ Daina.

Oke u te te nọ Jekọp o ro kue’i họ no nọ ọ rẹ nya se Leban ba zihe kpohọ Kenan. Fikiere o te koko uviuwou ulogbo riẹ họ gbe ithuru igodẹ ilogbo avọ ewa iruẹ riẹ, o te mu erẹ othabọ na họ.

Nọ Jekọp avọ uviuwou riẹ a zihe ze Kenan, jẹ ria omojọ no, Reshẹl o te yẹ ọmọzae ọfa jọ. O via eva oke nọ a je kpohọ erẹ jọ. O jẹ gaga kẹ Reshẹl, uwhruemu riẹ o te whu eva oke nọ o je yẹ na. Rekọ oma osasa ọmọzae ọboba na. Jekọp o te se odẹ riẹ Bẹnjamin.

Ma gwọlọ kareghẹhọ edẹ emezae 12 Jekọp na keme orẹwho Izrẹl na soso u no oma rai ze. Uzẹme nọ egborua 12 Izrẹl na edẹ emezae 10 Jekọp gbe emezae ivẹ Josẹf a ro sai. Aiziki ọ ria ikpe buobu eva oke nọ a yẹ emezae enana kpobi no, yọ o sae jọ nọ ọ ghọghọ gaga nnọ ọye o wo emezae-uruọmọ buobu itieye. Rekọ ma ri oware nọ o via kẹ Daina ọmọte-uruọmọ riẹ.

Emuhọ 29:32-35; 30:1-26; 35:16-19; 37:35.



Enọ

  • Didi odẹ emezae ezeza nọ aye ọsosuọ Jekọp, Lia, o yẹ kẹe?
  • Emezae ivẹ vẹ Zilpa, odibo-ọmọtẹ Lia, o yẹ kẹ Jekọp?
  • Didi odẹ emezae ivẹ nọ Bilha, odibo-ọmọtẹ Reshẹl, o yẹ kẹ Jekọp?
  • Didi odẹ emezae ivẹ nọ Reshẹl o yẹ, rekọ eme ọ via nọ o yẹ ọmọzae avivẹ na no?
  • Wọhọ epanọ uwoho na u dhesẹ, bro emezae Jekọp o yẹ, kọ eme o no oma rai ze?

Enọ efa

  • Se Emuhọ 29:32-35; 30:1-26; gbe 35:16-19.

    Wọhọ epanọ o jọ kẹ emọ 12 Jekọp na, ẹvẹ a jẹ hai ro mu edẹ kẹ emezae ahwo Hibru evaọ oke anwae?

  • Se Emuhọ 37:35.

    Dede nọ odẹ ọ Daina ọvo a fodẹ evaọ Ebaibol na, ẹvẹ ma rọ riẹ nnọ Jekọp o wo vi ọmọtẹ ọvo? (Emu. 37:34, 35)