Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Obe Ikuigbe Ebaibol Mẹ

Ikuigbe avọ 18: Jekọp O Kpohọ Heran

Ikuigbe avọ 18: Jekọp O Kpohọ Heran

WHỌ riẹ ahwo ọnana nọ Jekọp ọ be ta ẹme kẹ na? Nọ Jekọp ọ nya edẹ buobu no, o te zerai eva abotọ ozae. A jẹ rehọ ẹro te igodẹ rai. Jekọp ọ tẹ nọ: ‘Diẹse wha no ze?’

A tẹ ta nọ, ‘Heran.’

Jekọp ọ tẹ nọ nnọ, ‘Wha riẹ Leban?’

A te yo nọ, ‘E. Rri, ọmọtẹ riẹ ọ be nya tha na, avọ uthuru igodẹ ọsẹ riẹ.’ Kọ whọ sae ruẹ Reshẹl nọ ọ be nya tha eva ugbo uthabọ na?

Jekọp nọ ọ be nya bru Reshẹl

Nọ Jekọp ọ ruẹ Reshẹl avọ igodẹ Leban, oniọvo oni riẹ, ọ tẹ nya i ghelie utho no ozae na no re igodẹ na e sae d’ame. Kẹsena Jekọp ọ tẹ viọlọ Reshẹl, je dhesẹ oma riẹ kẹe. Ọwhọ ọ tẹ ruọ ọmọtẹ na oma, koyehọ ọ dhẹ nya e vuẹ Leban ọsẹ riẹ.

Eva e were Leban gaga re Jekọp ọ ria kugbe i. Nọ Jekọp ọ jẹ yare re ọ rọo Reshẹl, eva e tẹ were Leban. Dede, ọ ta kẹ Jekọp nọ ọye o re ru iruo ẹwọ kẹe ikpe ihrẹ re Reshẹl o te tei obọ. Fiki nọ o you Reshẹl gaga Jekọp o te ru onana. Rekọ nọ oke orọo na u te, whọ riẹ oware nọ o via?

Leban ọ tẹ rehọ Lia ọmọtẹ ọkpako riẹ kẹ Jekọp rehọ ẹta Reshẹl. Nọ Jekọp ọ jẹ rọwo nọ o re ru iruo kẹ Leban ikpe ihrẹ efa, Leban ọ tẹ jẹ rọ Reshẹl kẹe wọhọ aye. Eva oke oyena, Ọghẹnẹ ọ k’uvẹ nọ ahwo a sae rehọ vi aye ọvo. Rekọ enẹna, wọhọ epanọ Ebaibol o dhesẹ, ọzae o re wo aye ọvuọvo.

Emuhọ 29:1-30.



Enọ

  • Ono họ ọmọtẹ nọ ọ rrọ uwoho na, kọ eme Jekọp o ru kẹe?
  • Eme u no Jekọp eva ze nọ o re ru re ọ ruẹse rehọ Reshẹl?
  • Eme Leban o ru nọ oke nọ Jekọp ọ rẹ rọ rehọ Reshẹl u te no?
  • Eme Jekọp ọ rọwo nọ o re ru re ọ ruẹse rehọ Reshẹl wọhọ aye?

Enọ efa

  • Se Emuhọ 29:1-30.

    Makọ okenọ Leban o fi ei iwhayo, ẹvẹ Jekọp o ro dhesẹ nnọ o wo ọghọ, kọ eme ma rẹ sae jọ onana wuhrẹ? (Emu. 25:27; 29:26-28; Mat. 5:37)

    Ẹvẹ oriruo Jekọp o ro dhesẹ ohẹriẹ nọ o rrọ udevie uvi uyoyou gbe uyoyou nọ u tuaro? (Emu. 29:18, 20, 30; Ile 8:6)

    Eyae ene vẹ i zihe ruọ abọjọ uviuwou Jekọp je ti yẹ emọ kẹe? (Emu. 29:23, 24, 28, 29)