A yẹ omẹ evaọ oria jọ nọ o kẹle Rome. Ahwo nọ osa rai u tulo ho ae a jọ oria nana. Akpọ ọ jọ gaga kẹ omai. Mẹ riẹ oni mẹ hẹ, yọ mẹ avọ ọsẹ mẹ ma rẹ gba tere he. Nọ mẹ be rro ze na, mẹ tẹ te ga ẹro ziezi re mẹ sae rria oria nọ ma jọ na.

Bẹsenọ me ti te ikpe ikpe, yọ me mu uji họ etho no. Nọ mẹ jọ ikpe ikpegbivẹ, mẹ tẹ dhẹ no uwou. Ẹsibuobu ọsẹ mẹ ọ jẹ hae nyaziọ obọ ogba iporisi te rehọ omẹ. Kẹse kẹse mẹ avọ ahwo ma jẹ hae whọ, ohọre o jẹ hae were omẹ gaga, yọ mẹ avọ ohwo ọvo ma jẹ hae rọ gba ha. Nọ mẹ kpako te ikpe ikpegbene no, mẹ tẹ dhẹ no uwou, odhẹ ovo. Me te mu iyẹrẹ họ ẹria je mu imu egaga họ ẹrehọ. Me wo oria ovo nọ mẹ rẹ wezẹ evaọ aso ho, fikiere nọ oke u te kpo no, mẹ vẹ lẹlẹ bẹre ruọ imoto ahwo re mẹ wezẹ eva rai. Nọ oke o jẹ be nwani rrie ze, mẹ vẹ jẹ ruọ iyẹrẹ. Mẹ vẹ gwọlọ oria nọ ame ọ rrọ re mẹ wozẹ abọ gbe awọ.

Me te ti tho uji te epanọ uji-utho o rọ reria omẹ obọ no. Oware ovo nọ me re tho ho, o rrọ họ. Me re fru ekpa mi ahwo, bẹre ruọ iwou gbe ighẹ ahwo evaọ aso avọ ugbeke, re me mi ai eware. Ahwo buobu a tẹ te riẹ omẹ inọ mẹ yọ ohwo ugbarugba. U kri hi, utu jọ nọ u re ru ozighi je tho uji gaga a tẹ vuẹ omẹ nọ me kuomagbe ai. Ere me ro no uji ototọ ruọ uji nọ a rẹ jọ wha ugbeke kpohọ ebanke nyai tho igho. Fiki epanọ mẹ gudu te, ahwo utu mai na kpobi a jẹ hae dhozọ mẹ je yo ẹme mẹ gaga. Ugbeke u re no omẹ obọ họ. Mẹ tẹ maki kiẹzẹ dede yọ me fi rie họ otọ othuzou. Oware nọ me je ru kpobi evaọ uzuazọ kọ ozighi, imu egaga erehọ, uji-utho, eka ela, gbe ọfariẹ-ogbe. Ẹsikpobi iporisi e jẹ hae gwọlọ omẹ. A mu omẹ unuẹse buobu, yọ a re kele unuẹse nọ a fi omẹ họ uwou-odi hi.

Oke jọ nọ me no uwou-odi ze, me te kpohọ obọ uwou oniọvo oni mẹ jọ nọ ọ rrọ aye. Kpakọ oniọvo oni mẹ na avọ emọ ivẹ riẹ a zihe ruọ Isẹri Jihova no. A tẹ ta kẹ omẹ nọ me lele ai kpohọ ewuhrẹ. Mẹ tẹ rọwo nọ me re lele ai nya re mẹ tubẹ ruẹ oware nọ a bi wuhrẹ. Nọ ma te obọ Ọgwa Uvie na, mẹ tẹ suobọhọ nọ mẹ rẹ keria kẹle unuẹthẹ. Mẹ gwọlọ nọ mẹ rẹ hai rri wariẹ re mẹ ruẹ oghẹrẹ ahwo nọ a be ruọ eva gbe enọ e be ruọ otegu. Mẹ wha ugbeke lele oma.

Oware nọ mẹ jọ ewuhrẹ yena ruẹ u nwene uzuazọ mẹ riẹriẹriẹ. O jọ omẹ oma wọhọ ẹsenọ mẹ rrọ akpọ ọfa. Ahwo na kpobi a jẹ nyaze ti yere omẹ, avọ ovao ohwohwẹ, be whẹtiẹ omẹ họ oma. Mẹ gbẹ be kareghẹhọ ovao ahwo nọ mẹ ruẹ ẹdẹ yena. Whọ rẹ nwane ruẹ nọ Isẹri na a wo oware uyoma ovo họ eva ha. A wo ohẹriẹ gaga no ahwo nọ me bi lele nyusu anwẹdẹ.

Mẹ tẹ rọwo nọ Isẹri Jihova a wuhrẹ Ebaibol kugbe omẹ. Nọ me bi wuhrẹ na, mẹ tẹ ruẹ nọ re mẹ sae gọ Ọghẹnẹ, me re nwene ekpehre uzuazọ nọ me bi yeri na. Me lele ohrẹ nọ o rrọ Itẹ 13:20, nọ o ta nọ: “Ọnọ o bi lele iwareghẹ nya usu o re wo areghẹ, rekọ ọnọ o ku usu gbe ahwo ogheghẹ o re kie ruọ ẹbẹbẹ.” Oria nana u fiobọhọ kẹ omẹ ruẹ nọ me re no utu nọ mẹ jọ na. Dede nọ onana o jọ bẹbẹ, Jihova o fiobọhọ kẹ omẹ bru usu no ai.

U te no ere no, mẹ ruẹ nọ me re siobọno eware jọ nọ i bi gbe oma mẹ ku. Udugaga, mẹ tẹ te siọ isigareti ba evovo jẹ siọ imu egaga ba ẹrehọ. Me te je bru eto mẹ nọ e jọ thethei no, siọ emero ezọ ba ekuhọ, jẹ siọ ekela ba. Ẹmẹrera na, me te mu omamẹ họ ẹgba re mẹ siọ ofu nọ me mu no emaha ze na ba.

Obe-use o rẹ were omẹ vẹre he, fikiere o jọ bẹbẹ kẹ omẹ re mẹ romatotọ wuhrẹ Ebaibol. Rekọ mẹ daoma fihọ iẹe gaga. Ẹmẹrera na, me te ti you Jihova. Onana u ru nọ udu mẹ u je ro brukpe omẹ fiki eware iyoma nọ me ru evaọ okenọ u kpemu. Ẹsibuobu me je rri omamẹ nọ me te ohwo nọ ọ rẹ gọ Jihova ha. O jọ omẹ oma nọ Jihova ọ te sae rọ eware iyoma kpobi nọ me ru na vrẹ omẹ hẹ. Oware jọ nọ o jẹ hai fiobọhọ kẹ omẹ nọ iroro itieye e tẹ ruọ omẹ udu họ, me re se kpahe eware iyoma nọ Devidi ovie na o ru nọ Jihova ọ rọvrẹ riẹ.—2 Samuẹle 11:1–12:13.

Oware ofa nọ o jọ bẹbẹ kẹ omẹ họ, usi uwoma nọ mẹ rẹ ta no uwou ruọ uwou. (Matiu 28:19, 20) Ozọ u je mu omẹ gaga inọ mẹ te nyaku ohwo jọ nọ me ru oware uyoma no ẹdẹ jọ. Rekọ ẹmẹrera na, ozọ na u te no omẹ ẹro. Enẹna mẹ be ta usi uwoma na avọ evawere. Me bi wuhrẹ amọfa kpahe Jihova, Ọsẹ oyoyou mai nọ ọ rẹ rọvrẹ gaga na.

Jihova nọ me wuhrẹ kpahe na u siwi uzuazọ mẹ. Ahwo buobu nọ ma gbẹ jọ egbẹnyusu a whu no, efa e rrọ uwou-odi. Rekọ me bi yeri uzuazọ mẹ vrẹ avọ evawere, yọ me wo ẹruore uzuazọ ebẹdẹ bẹdẹ. Eware nọ mẹ jọ Ebaibol wuhrẹ i fiobọhọ kẹ omẹ wo omaurokpotọ je bi yoẹme kẹ Ọghẹnẹ. Mẹ be kpọ ofu mẹ enẹna. Onana u ru nọ me bi ro yerikugbe ahwo ziezi enẹna. Mẹ avọ Carmen, aye oyoyou mẹ na ma be rria dhedhẹ avọ evawere. Mai imava ma be hai wuhrẹ ahwo Ebaibol, yọ onana o be wha evawere se omai gaga.

Enẹna, me bi ru iruo orufuọ nọ mẹ rẹ rọ kuọ uviuwou mẹ. Ẹsejọ dede me re kpohọ ebanke sa-sa nyai ru ai fo, orọnikọ re me tho igho ho wọhọ epanọ me je ru vẹre.