Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Matiu 7:1-29

EWARE NỌ E RIẸ EVA

  • OVUẸ EVAỌ UGBEHRU (1-27)

    • Siọ ahwo ẹdhọ ba eguo (1-6)

    • Ruabọhọ ẹyare, ẹgwọlọ, ekporo (7-11)

    • Uzi Igoru (12)

    • Unuẹthẹ ohwahwa (13, 14)

    • Ibi rai a re ro vuhu ai (15-23)

    • Uwou nọ a bọ fihọ ehru utho, uwou nọ a bọ fihọ ehru uwẹkpẹ (24-27)

  • Ewuhrẹ Jesu o gbe ogbotu unu (28, 29)

7  “Wha siọ ahwo ẹdhọ ba eguo, re Ọghẹnẹ ọ gbẹ rọ owhai gu ẹdhọ họ;  keme oghẹrẹ nọ wha bi ro gu ahwo ẹdhọ, a ti ro gu owhai ẹdhọ, yọ epaọ owawọ nọ wha be rọ wawo kẹ amọfa a te rọ wawo kẹ owhai.  Kọ fikieme who bi ro rri orara nọ o rrọ ubiẹro oniọvo ra rekọ who bi muẹrohọ ubro-ure nọ o rrọ ubiẹro ra ha?  Hayo, ẹvẹ whọ sae rọ ta kẹ oniọvo ra nọ, ‘Kẹ omẹ uvẹ re me si orara nọ o rrọ ubiẹro ra no,’ kpakiyọ ubro-ure o rrọ owhẹ ubiẹro?  Whẹ ọviẹwẹ! Kaki si ubro-ure nọ o rrọ ubiẹro ra no, kẹsena whọ vẹ te ruẹ ude ziezi si orara no ubiẹro oniọvo ra.  “Wha rehọ oware nọ o rrọ ọrẹri kẹ erakọ họ, hayo gbolo izuu rai kẹ isi hi, keme a te rọ awọ thihi ai je kuomarẹriẹ họre owhai.  “Wha ruabọhọ ẹyare, a te kẹ owhai; wha ruabọhọ ẹgwọlọ, wha te ruẹ; wha ruabọhọ ekporo, a ti rovie kẹ owhai,  keme ohwo kpobi nọ ọ be yare, a rẹ kẹe, ohwo kpobi nọ ọ be gwọlọ, ọ rẹ ruẹ, yọ ohwo kpobi nọ o bi kporo, a ti rovie kẹe.  Ono evaọ usu rai ọmọ riẹ ọ rẹ yare ebrẹdi, ọ vẹ rehọ utho kẹe? 10  Hayo nọ ọ tẹ yare eri, kọ ọ rẹ rehọ araomuomu kẹe? 11  Fikiere, otẹrọnọ whai nọ wha rrọ erahaizi wha riẹ epanọ wha rẹ rehọ emamọ eware kẹ emọ rai, ẹvẹ Ọsẹ rai nọ ọ rrọ obọ odhiwu ọ rẹ rehọ emamọ eware kẹ enọ e be yare iẹe te! 12  “Fikiere, eware kpobi nọ wha gwọlọ nọ ahwo a ru kẹ owhai, wha ru ere kẹ ae re. Keme, onana họ otofa Uzi Mosis na gbe eme Eruẹaro na. 13  “Wha rehọ unuẹthẹ ohwahwa na ruọ eva keme edhere nọ o bi su kpohọ ọraha o riama fihọ, unuẹthẹ riẹ ọ rrọ kẹkẹe, yọ ibuobu e be rehọ iẹe ruọ eva; 14  rekọ edhere nọ o bi su kpohọ uzuazọ ọ rrọ kekeke, unuẹthẹ riẹ ọ rrọ hwahwa, yọ umutho ahwo a bi duku ei. 15  “Wha yọroma kẹ eruẹaro erue enọ e rẹ rọ ovioma ogodẹ nya bru owhai ze, rekọ ijera nọ ohọo u bi kpe a rrọ evaọ obeva. 16  Ibi rai wha re ro vuhu ai. A rẹ sae kọrọ otiowo-eni no idhigbo ze he hayo kọrọ ibi ifigi no enwẹnwẹ ze he, kọ a sai ru ere? 17  Epọvo na re, emamọ ure kpobi o rẹ mọ emamọ ubi, rekọ ekpehre ure kpobi o rẹ mọ ekpehre ubi. 18  Emamọ ure o rẹ sae mọ ekpehre ubi hi, yọ ekpehre ure o rẹ sae mọ emamọ ubi hi. 19  Ure kpobi nọ o be mọ emamọ ubi hi, a re koi fihọ otọ a ve gbolo iei fihọ erae. 20  Uzẹme, ibi rai wha re ro vuhu ahwo yena. 21  “Orọnikọ ohwo kpobi nọ o bi se omẹ nọ, ‘Olori, Olori,’ ọ te ruọ Uvie obọ odhiwu hu, rekọ ọnọ o bi ru oreva Ọsẹ mẹ nọ ọ rrọ obọ odhiwu ọvo. 22  Ahwo buobu a rẹ te ta kẹ omẹ ẹdẹ yena nọ: ‘Olori, Olori, kọ ma gbẹ rọ odẹ ra ruẹaro jẹ rọ odẹ ra le idhivẹri jẹ rọ odẹ ra ru iruo igbunu buobu?’ 23  Ghele na, mẹ rẹ te ta kẹ ae nọ: ‘Mẹ riẹ owhai vievie he! Wha no aro mẹ no, whai enọ i re koko uzi hi!’ 24  “Fikiere, ohwo kpobi nọ o yo eme mẹ nana je ru ai, ọ te wọhọ ohwo owareghẹ, ọnọ ọ bọ uwou riẹ họ ehru utho. 25  Oso ọ rrọ, owhe o ku ze, ofou o te je fou uwou na, rekọ u kie he, fiki epanọ a bọe họ ehru utho. 26  Ofariẹ, ohwo kpobi nọ o yo eme mẹ nana nọ o ru rai hi, ọ te wọhọ ohwo ogheghẹ, ọnọ ọ bọ uwou riẹ họ ehru uwẹkpẹ. 27  Oso ọ rrọ, owhe o ku ze, ofou o te je fou uwou na, uwou na u te kie, ọraha riẹ ọ jọ ruaro.” 28  Nọ Jesu ọ ta eme nana no, oghẹrẹ nọ o ro wuhrẹ gbe eware nọ o wuhrẹ i te gbe ogbotu na unu, 29  keme o je wuhrẹ ae wọhọ ohwo nọ o wo udu, orọnikọ wọhọ epaọ otu ikere-obe rai hi.

Oruvẹ-Obotọ