Kpohọ eme nọ e riẹ eva

Kpohọ oria izoẹme

Matiu 25:1-46

EWARE NỌ E RIẸ EVA

  • OKA ZINO KRISTI (1-46)

    • Ọtadhesẹ emetẹ-kọkọ ikpe na (1-13)

    • Ọtadhesẹ etalẹnte na (14-30)

    • Igodẹ gbe ewe na (31-46)

25  “Uvie odhiwu o wọhọ emetẹ-kọkọ* ikpe nọ e wha ikpẹ lele oma nyai zere ọva.  Isoi e jọ gheghẹ, isoi i wo areghẹ.  Igheghẹ na e wha ikpẹ rekọ a wha ewhri ọfa lele oma ha,  rekọ iwoareghẹ na a wha ewhri ọfa evaọ ilolo rai kugbe ikpẹ rai.  Fikinọ ọva na o je lehie, owezẹ u te mu ai họ esu a tẹ wezẹ no.  Evaọ udevie aso a te yo ubo inọ: ‘Ọva na ọ be tha! Wha nyai zere iei.’  Kẹsena emetẹ-kọkọ na kpobi a tẹ kpama a tẹ ruẹrẹ ikpẹ rai họ.  Igheghẹ na a tẹ ta kẹ iwoareghẹ na nọ, ‘Wha jọ ewhri rai kẹ omai umutho jọ keme ikpẹ mai i bi ti fu no.’  Iwoareghẹ na a tẹ kpahe kẹ ae nọ: ‘O wọhọ nọ ewhri mai na o ti te kẹ omai avọ owhai hi. Wha dhugbẹ nya bru enọ e rẹ zẹ re wha dẹ kẹ omarai.’ 10  Nọ a nyavrẹ nyae dẹ ewhri no, ọva na ọ tẹ nyaze. Emetẹ-kọkọ nọ e ruẹrẹ oma kpahe na a te lele iei ruọ eva oria ehaa orọo na, a tẹ kare ẹthẹ na. 11  Uwhremu na, emetẹ-kọkọ edekọ na a tẹ nyaze re, be ta nọ, ‘Ọga, Ọga, rovie kẹ omai!’ 12  Ọ tẹ kpahe kẹ ae nọ, ‘Uzẹme mẹ be ta kẹ owhai, mẹ riẹ owhai hi.’ 13  “Fikiere, wha ruabọhọ erou,* keme wha riẹ ẹdẹ na hayo auwa na ha. 14  “Keme o wọhọ epaọ ọzae nọ ọ gwọlọ kpohọ erẹ evaọ orẹwho ofa nọ o se erigbo riẹ o te mu ekwakwa riẹ họ ae obọ. 15  Ọ kẹ ọjọ etalẹnte* isoi, ọfa ivẹ, ọfa kọ ọvo, ọ kẹ omomọvo wọhọ epanọ ẹgba riẹ o mu, o te kpohọ erẹ. 16  Ọnọ a kẹ etalẹnte isoi na ọ tẹ nwane nyae rehọ ai mu eki họ ẹtho, o te wo isoi efa bae. 17  Ere ọvona ọnọ a kẹ ivẹ na o ru re, o te wo ivẹ efa bae. 18  Rekọ ọrigbo nọ a kẹ etalẹnte ọvo na ọ tẹ nyae tọ ugho* olori riẹ na họ otọ. 19  “Nọ oke krẹkri o vrẹ no, olori erigbo na o te kpozi, o te se ai re a vuẹe epanọ a rọ igho na ru te. 20  Fikiere ọnọ a kẹ etalẹnte isoi na ọ tẹ nyaze avọ etalẹnte isoi efa, inọ, ‘Olori, etalẹnte isoi whọ kẹ omẹ; rri, me wo isoi efa bae.’ 21  Olori riẹ ọ tẹ ta kẹe nọ: ‘Whẹ kobiruo, emamọ ọrigbo nọ a re fievahọ! Whọ riẹ ru evaọ umutho eware nọ a muhọ owhẹ obọ. Me ti mu eware buobu họ owhẹ obọ. Nyaze te reawere oghọghọ olori ra.’ 22  Ọnọ a kẹ etalẹnte ivẹ na ọ tẹ nyaze re, inọ, ‘Olori, etalẹnte ivẹ whọ kẹ omẹ; rri, me wo ivẹ efa bae.’ 23  Olori riẹ ọ tẹ ta kẹe nọ: ‘Whẹ kobiruo, emamọ ọrigbo nọ a re fievahọ! Whọ riẹ ru evaọ umutho eware nọ a muhọ owhẹ obọ. Me ti mu eware buobu họ owhẹ obọ. Nyaze te reawere oghọghọ olori ra.’ 24  “Ukuhọ riẹ, ọrigbo nọ a kẹ etalẹnte ọvo na ọ tẹ nyaze ọ tẹ ta nọ: ‘Olori, mẹ riẹ nọ whẹ yọ ohwo nọ oware nọ omọfa o ru o rẹ kake da ẹro ho, who re vu evaọ oria nọ whọ kọ fihọ họ, je kokohọ evaọ oria nọ whọ ruẹ uye fihọ họ. 25  Fikiere ozọ u te mu omẹ, mẹ tẹ tọ etalẹnte ra họ otọ. Ugho ra ona.’ 26  Olori na ọ tẹ ta kẹe nọ: ‘Ọrigbo omuomu, ọyẹlẹ na, whọ riẹ nọ me re vu evaọ oria nọ mẹ kọ fihọ họ, je kokohọ evaọ oria nọ mẹ ruẹ uye fihọ họ, o gbẹ rrọ ere? 27  O tẹ rrọ ere, whọ hai fi ugho* mẹ họ obọ uwou-igho, nọ mẹ nyaze na, a hae rehọ iẹe kẹ omẹ avọ isuo. 28  “‘Fikiere, wha mi ei etalẹnte na re wha rehọ iẹe kẹ ọnọ o wo etalẹnte ikpe na. 29  Keme ohwo kpobi nọ o wo a rẹ te kẹe efa kugbe, o ve ti wo buobu. Rekọ ọnọ o wo ho, a ti mi ei makọ onọ o wo na dede. 30  Wha gbolo ọrigbo nọ o fioka ha na fihọ ebi obọ otafe. Etẹe ọ te jọ vioja jẹ reakọ.’ 31  “Nọ Ọmọ ohwo ọ te nyaze evaọ oruaro riẹ avọ ikọ-odhiwu kpobi nọ e rrọ kugbei, ọ te keria agbara-uvie oruaro riẹ. 32  Erẹwho na kpobi a ve ti kokohọ aro riẹ, ọ vẹ te hẹriẹ ahwo, wọhọ epanọ othuru-igodẹ ọ rẹ hẹriẹ igodẹ no ewe. 33  O ve ti fi igodẹ na họ obọze riẹ, ewe na kọ ẹkpẹlobọ riẹ. 34  “Kẹsena Ovie na ọ vẹ te ta kẹ enọ e rrọ obọze riẹ nọ: ‘Wha nyaze, whai enọ Ọsẹ mẹ ọ ghale no, re wha reuku Uvie nọ a ruẹrẹhọ kẹ owhai no emuhọ akpọ* na ze. 35  Keme nọ ohọo u je kpe omẹ wha kẹ omẹ emu re; nọ uruame u je kpe omẹ wha kẹ omẹ ame da. Mẹ jọ ọrara, wha dede omẹ rehọ; 36  nọ mẹ jọ ẹbẹba* wha kẹ omẹ ewu kuhọ. Nọ mẹ jẹ mọ wha rẹrote omẹ. Mẹ jọ uwou-odi, wha weze bru omẹ ze.’ 37  Kẹsena ikiẹrẹe na e vẹ te ta kẹe nọ: ‘Olori, oke vẹ ma ruẹ owhẹ nọ ohọo u je kpe owhẹ nọ ma jẹ kẹ owhẹ emu re, hayo nọ uruame u je kpe owhẹ nọ ma jẹ kẹ owhẹ ame da? 38  Oke vẹ whọ jọ ọrara nọ ma dede owhẹ rehọ, hayo jọ ẹbẹba nọ ma jẹ kẹ owhẹ ewu kuhọ? 39  Oke vẹ ma ruẹ owhẹ nọ whọ jẹ mọ hayo nọ whọ jọ uwou-odi nọ ma je weze bru owhẹ ze?’ 40  Ovie na ọ vẹ te ta kẹ ae nọ, ‘Uzẹme mẹ be ta kẹ owhai, nọ orọnọ wha ru ere kẹ ọjọ evaọ usu enọ e mae kawo evaọ inievo mẹ nana, mẹ wha ru rie kẹ.’ 41  “Kẹsena ọ vẹ te ta kẹ enọ e rrọ ẹkpẹlobọ riẹ nọ: ‘Wha no etenẹ no, whai enọ a brukpe no, kpohọ erae ebẹdẹ bẹdẹ nọ a ruẹrẹhọ kẹ Ẹdhọ avọ ikọ riẹ. 42  Keme ohọo u je kpe omẹ rekọ wha kẹ omẹ emu re he; uruame u je kpe omẹ rekọ wha kẹ omẹ ame da ha. 43  Mẹ jọ ọrara, rekọ wha dede omẹ rehọ họ; mẹ jọ ẹbẹba rekọ wha kẹ omẹ ewu kuhọ họ; mẹ jẹ mọ, mẹ jọ uwou-odi, rekọ wha nyaze te ruẹ omẹ hẹ.’ 44  Kẹsena ae omarai a vẹ te ta kẹe nọ: ‘Olori, oke vẹ ma ruẹ owhẹ nọ ohọo u je kpe owhẹ hayo nọ uruame u je kpe owhẹ hayo nọ whọ jọ ọrara hayo ẹbẹba hayo nọ whọ jẹ mọ hayo evaọ uwou-odi nọ ma gbẹ rẹrote owhẹ hẹ?’ 45  Kẹsena ọ vẹ te ta kẹ ae nọ: ‘Uzẹme mẹ be ta kẹ owhai, nọ orọnọ wha ru ere kẹ ọvuọvo evaọ usu enana nọ e mae kawo na ha na, wha ru rie kẹ omẹ hẹ.’ 46  Enana a re ti kpohọ ọraha ebẹdẹ bẹdẹ, rekọ ikiẹrẹe na a re ti wo uzuazọ ebẹdẹ bẹdẹ.”

Oruvẹ-Obotọ

Hayo “emetẹ nọ e riẹ ọzae he.”
Hayo “erroro.”
Rri oria Otofa Eme.
Evaọ Griki, “isiliva.”
Evaọ Griki, “isiliva.”
Onana u dhesẹ okenọ Adamu avọ Ivi a ro mu emọ họ eyẹ.
Hayo “enwenọ ẹbẹba.”