Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Matiu 23:1-39

EWARE NỌ E RIẸ EVA

  • Wha rọ aro kele otu ikere-obe gbe otu Farisi hi (1-12)

  • Uye u te otu ikere-obe gbe otu Farisi (13-36)

  • Jesu o weri kẹ Jerusalẹm (37-39)

23  Kẹsena Jesu ọ tẹ ta kẹ ogbotu na gbe ilele riẹ nọ:  “Otu ikere-obe gbe otu Farisi na a rehọ omarai mu ọkwa Mosis.  Fikiere, wha ru je koko eware kpobi nọ a be ta kẹ owhai, rekọ wha rọ aro kele uruemu rai hi, keme a rẹ ta rekọ a re ru oware nọ a be ta ha.  A re kru ewha egbẹgbẹdẹ họ ahwo uzou, rekọ ae omarai a rẹ rọwo rehọ uziobọ rai te ai hi.  Eware kpobi nọ a re ru, a re ru ai re ahwo a ruẹ e rai, keme a re ru ẹmẹkpẹti ikereakere rai kẹkẹe nọ a rẹ wha wọhọ ekpọfia,* a re je ru efọlefọ iwu rai thethei.  A rẹ gwọlọ keria eria nọ e mai kpehru evaọ ehaa gbe egbara obaro* evaọ iwou-egagọ  yọ a rẹ gwọlọ nọ ahwo a yere ai evaọ eria eki, re a je se ai Iwuhrẹ.*  Rekọ, rọkẹ owhai, wha jọ ohwo ọvo o se owhai Owuhrẹ hẹ, keme ọvuọvo họ Owuhrẹ rai, yọ whai kpobi inievo.  Ofariẹ, wha se ohwo ọvo ọsẹ rai evaọ otọakpọ na ha, keme ọvuọvo họ Ọsẹ rai, Ọnọ ọ rrọ obọ odhiwu na. 10  Jọ a se owhai isu gbe he, keme ọvuọvo họ Osu rai, Kristi na. 11  Rekọ ọnọ ọ mae rro evaọ udevie rai ọ rẹ jọ ọgbodibo rai. 12  Ohwo kpobi nọ ọ kpare oma riẹ kpehru a re ti hrẹ riẹ kpotọ, rekọ ohwo kpobi nọ o ru oma riẹ kpotọ a rẹ te kpare iẹe kpehru. 13  “Uye u te owhai, otu ikere-obe gbe otu Farisi, eviẹwẹ na! keme wha kare ẹthẹ Uvie odhiwu dhe ahwo; wha te ruẹe he, yọ wha be kẹ enọ e gwọlọ ruẹe uvẹ re a ruẹe he. 14  —— 15  “Uye u te owhai, otu ikere-obe gbe otu Farisi, eviẹwẹ na! keme wha re bi abade soso re jẹ nya ugbothabọ re wha ruẹsi ku omọvo rẹriẹ,* nọ o je kurẹriẹ no, wha ve ru ei fo kẹ Gehena* akuava tube vi owhai omarai dede. 16  “Uye u te owhai, isu ituaro, enọ e rẹ ta nọ, ‘Ohwo ọ tẹ rehọ etẹmpol na duwu iyei, o rrọ okpoware ovo ho; rekọ ohwo ọ tẹ rehọ igoru nọ e rrọ etẹmpol na duwu iyei, uzi o gba riẹ.’ 17  Igheghẹ nọ i tuaro! Ovẹ o mae rro, igoru na manikọ etẹmpol na nọ u ru igoru na họ ọrẹri? 18  Wha rẹ jẹ ta nọ, ‘Ohwo ọ tẹ rehọ agbada-idhe na duwu iyei, o rrọ okpoware ovo ho; rekọ ohwo ọ tẹ rehọ okẹ nọ o rrọ ehru riẹ duwu iyei, uzi o gba riẹ.’ 19  Ituaro na! Ovẹ o mae rro, okẹ na manikọ agbada-idhe na nọ u ru okẹ na họ ọrẹri? 20  Fikiere, ohwo kpobi nọ ọ be rehọ agbada-idhe na duwu iyei ọ be rehọ agbada-idhe na gbe eware kpobi nọ e rrọ ehru riẹ duwu iyei; 21  yọ ohwo kpobi nọ ọ be rehọ etẹmpol na duwu iyei ọ be rehọ etẹmpol na gbe Ọnọ ọ be rriae duwu iyei; 22  yọ ohwo kpobi nọ ọ be rehọ odhiwu duwu iyei ọ be rehọ agbara-uvie Ọghẹnẹ gbe Ọnọ ọ keriae ro duwu iyei. 23  “Uye u te owhai, otu ikere-obe gbe otu Farisi, eviẹwẹ na! keme wha rẹ kẹ abọvo abakpe ọrọ mint gbe dil gbe kumin,* rekọ wha gbabọkẹ eware nọ e mai wuzou evaọ Uzi na, koyehọ, uvioziẹ gbe ohrọ-oriọ gbe ẹrọwọ. U fo re a ru eware yena, rekọ orọnọ a re gbabọkẹ eware nọ i kiọkọ họ. 24  Isu ituaro, enọ i re nwo otọle kufiẹ rekọ a ve si ekamẹle lọ! 25  “Uye u te owhai, otu ikere-obe gbe otu Farisi, eviẹwẹ na! keme wha rẹ wozẹ uke egho gbe uke omodhe, rekọ obeva rai o vọ avọ uvou-uthei gbe isiuru iyoma. 26  Whai otu Farisi ituaro na, wha kake wozẹ obeva egho gbe obeva omodhe na fo, re uke na o ruẹse fo re. 27  “Uye u te owhai, otu ikere-obe gbe otu Farisi, eviẹwẹ na! keme wha wọhọ iki nọ a rọ ọda-ọfuafo ralọ, enọ ehru rai e rẹ jọ wowoma, rekọ obeva rai e vọ avọ igbenwa ahwo nọ a whu no gbe oghẹrẹ egbegbe kpobi. 28  Ere ọvona re, evaọ okafe wha wọhọ ahwo nọ a kiẹrẹe evaọ aro ahwo, rekọ evaọ obeva wha vọ avọ eviẹhọ gbe emuemu. 29  “Uye u te owhai, otu ikere-obe gbe otu Farisi, eviẹwẹ na! keme wha bọ iki eruẹaro na jẹ whẹ erru họ iki enọ i kiẹrẹe na, 30  yọ wha be ta nọ, ‘Ma hae jariẹ evaọ oke esẹ mai, ma hai kuomagbe ai kpe eruẹaro na ha.’ 31  Fikiere, wha bi se isẹri kpe omarai inọ whai yọ emọ enọ i kpe eruẹaro na. 32  Nọ o rrọ ere na, wha ru onọ esẹ rai a muhọ na te oka. 33  “Eraomuomu, emọ eriwhẹ, ẹvẹ wha te sae rọ dhẹ vabọ no obrukpe Gehena?* 34  Fiki onana, me bi vi eruẹaro gbe ahwo iwareghẹ gbe iwuhrẹ se owhai. Wha ti kpe jẹ kare ejọ fihọ ure kpe, wha te fa ejọ evaọ iwou-egagọ rai je kpokpo ai no ẹwho ruọ ẹwho, 35  re azẹ ahwo ikiẹrẹe kpobi nọ a kpe no evaọ akpọ na ọ ruẹse jọ owhai uzou, no azẹ Ebẹle ohwo okiẹrẹe na rite azẹ Zekaraya ọmọ Barakaya, ọnọ wha kpe evaọ udevie aruẹri gbe agbada-idhe na. 36  Uzẹme mẹ be ta kẹ owhai, eware nana kpobi i ti te oge nana. 37  “Jerusalẹm, Jerusalẹm, ọnọ o re kpe eruẹaro na jẹ rọ itho fi enọ a vi sei—unuẹse buobu mẹ jẹ gwọlọ koko emọ ra họ epanọ ovu o re koko emọ riẹ họ otọ ibekpe riẹ! Rekọ wha rọwo ho. 38  Rri! A siọ uwou rai ba kẹ owhai no.* 39  Keme mẹ be ta kẹ owhai nọ, wha te gbẹ ruẹ omẹ ofa vievie he bẹsenọ wha rẹ ta nọ, ‘Oghale u te ọnọ ọ be rọ odẹ Jihova* nyaze!’”

Oruvẹ-Obotọ

Ẹmẹkpẹti nọ a kere eria Ikereakere jọ fihọ. Ezae ahwo Ju a jẹ hae gba enana fihọ aruezo hayo obọ wọhọ oware nọ a be rọ thọ omarai.
Hayo “nọ e mai woma.”
Hayo “Rabae.”
Koyehọ, ohwo orẹwho ofa nọ o kurẹriẹ ziọ egagọ ahwo Ju.
Rri oria Otofa Eme.
Mint, dil, gbe kumin yọ eware nọ a re ro fi awere họ emu.
Rri oria Otofa Eme.
Hayo o sae jọ nọ, “ba kẹ owhai ofofe no.”
Rri oria Otofa Eme.