Kpohọ eme nọ e riẹ eva

Kpohọ oria izoẹme

Matiu 2:1-23

EWARE NỌ E RIẸ EVA

  • Iweze enọ i re rri isi obehru rọ gbẹva (1-12)

  • A dhẹ kpobọ Ijipti (13-15)

  • Herọd o kpe emezae emaha (16-18)

  • A zihe kpobọ Nazarẹt (19-23)

2  Nọ a yẹ Jesu no evaọ Bẹtlẹhẹm ọrọ Judia evaọ edẹ Herọd ovie na, rri! enọ i re rri isi obehru rọ gbẹva a te no obọ Ovatha-Ọre ziọ Jerusalẹm,  a tẹ nọ inọ: “Diẹse ovie ahwo Ju nọ a yẹ na ọ rrọ? Keme ma ruẹ esi riẹ evaọ obọ Ovatha-Ọre, yọ ma nyaze re ma rọ uzou kpotọ kẹe.”  Nọ a yo onana, Herọd ovie na gbe Jerusalẹm soso a tẹ jẹ rova.  Nọ o se ilori izerẹ gbe otu ikere-obe na kpobi koko, ọ tẹ nọ ae oria nọ a ti jo yẹ Kristi* na.  A tẹ ta kẹe nọ: “Evaọ Bẹtlẹhẹm ọrọ Judia, keme enẹ ọruẹaro na o kere:  ‘O Bẹtlẹhẹm ọrọ ẹkwotọ Juda, whọ rrọ ẹwho nọ isu Juda a re rri vo vievie he, keme osu o re ti no eva ra ze, ọnọ o re ti su ahwo mẹ, Izrẹl.’’’  Kẹsena Herọd ọ tẹ lẹlẹ se enọ i re rri isi rọ gbẹva na ọ tẹ romatotọ nọ ae kpahe oke nọ esi na ọ rọ romavia.  Nọ a je no etẹe kpobọ Bẹtlẹhẹm, ọ tẹ ta kẹ ae nọ: “Wha nya re wha romatotọ gwọlọ ọmọ na, nọ wha tẹ ruẹ e riẹ no, wha zihe ze te vuẹ omẹ re mẹ nyae rọ uzou kpotọ kẹe re.”  Nọ a yo ẹme ovie na no, a tẹ ruọ edhere, rri! esi nọ a jọ obọ Ovatha-Ọre ruẹ na ọ tẹ karo kẹ ae bẹsenọ ọ rọ daji ehru evaọ oria nọ ọmọ na ọ jọ. 10  Nọ a ruẹ esi na, a tẹ ghọghọ gaga. 11  Nọ a ruọ evaọ uwou na, a tẹ ruẹ ọmọ na avọ Meri oni riẹ, a te kigwẹ, rọ uzou kpotọ kẹe. A te je rovie eware nọ a fi ekwakwa-aghae rai họ, a tẹ kẹe ekẹ: igoru gbe frankinsẹs gbe mọr. 12  Rekọ fikinọ a wo unuovẹvẹ no obọ Ọghẹnẹ ze evaọ ewezẹ inọ a zihe bru Herọd ho, a tẹ rehọ edhere ọfa zihe kpobọ orẹwho rai. 13  Nọ a ruọ edhere no, rri! ukọ-odhiwu Jihova* ọ tẹ jọ ewezẹ romavia kẹ Josẹf, ọ tẹ ta kẹe nọ: “Kpama, rehọ ọmọ na avọ oni riẹ re wha dhẹ kpobọ Ijipti, wha vẹ jọ obei bẹsenọ mẹ te ta onọ who re ru kẹ owhẹ, keme uviemenẹ Herọd ọ be te gwọlọ ọmọ na re o kpei no.” 14  Fikiere, Josẹf ọ tẹ kpama, ọ tẹ rehọ ọmọ na avọ oni ọmọ na evaọ aso yena, a te kpobọ Ijipti. 15  Ọ jọ obei bẹsenọ Herọd o ro whu. Onana u ru nọ ẹme nọ Jihova* ọ rehọ ọruẹaro riẹ ta o ro rugba, inọ: “Me se ọmọ mẹ no evaọ Ijipti ze.” 16  Kẹsena nọ Herọd ọ ruẹ nọ enọ i re rri isi rọ gbẹva na a viẹ riẹ họ, eva e tẹ dhae gaga, o te vi ahwo nyai kpe emezae kpobi evaọ Bẹtlẹhẹm gbe ekwotọ riẹ kpobi, no umuo ikpe ivẹ kpotọ, wọhọ epaọ umuo oke nọ enọ i re rri isi rọ gbẹva na a vuẹ riẹ. 17  Ẹme nọ a rehọ Jerimaya ọruẹaro na ta o te rugba, inọ: 18  “A yo urru jọ evaọ Rama, oviẹ gbe enuobro ọgaga. Reshẹl ọ jẹ viẹ fiki emọ riẹ, ọ rọwo nọ a sasa iẹe oma ha, keme a gbẹ rrọ họ.” 19  Nọ Herọd o whu no, rri! ukọ-odhiwu Jihova* ọ tẹ romavia kẹ Josẹf evaọ ewezẹ evaọ obọ Ijipti 20  ọ tẹ ta kẹe nọ: “Kpama, rehọ ọmọ na avọ oni riẹ re wha kpobọ ẹkwotọ Izrẹl, keme enọ e jẹ gwọlọ uzuazọ ọmọ na kpe a whu no.” 21  Ọ tẹ kpama, rehọ ọmọ na avọ oni ọmọ na, a tẹ ruọ ẹkwotọ Izrẹl. 22  Rekọ nọ o yo nọ Akẹlọs họ ọnọ o bi su Judia, ọnọ ọ rehọ ẹta Herọd ọsẹ riẹ, ozọ nọ o re ro kpohọ obei u te mu ei. Ofariẹ, fikinọ Ọghẹnẹ ọ vẹvẹ e riẹ unu evaọ ewezẹ, o te kpohọ ẹkwotọ Galili. 23  Ọ tẹ jẹ rria ẹwho nọ a re se Nazarẹt, re ẹme nọ eruẹaro na e ta ọ ruẹsi rugba: “A re ti sei ohwo Nazarẹt.”

Oruvẹ-Obotọ

Hayo “Mesaya; Ọnọ A ro Mu na.”
Rri oria Otofa Eme.
Rri oria Otofa Eme.
Rri oria Otofa Eme.