Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Matiu 16:1-28

EWARE NỌ E RIẸ EVA

  • A ta kẹe nọ o dhesẹ oka (1-4)

  • Ẹvi otu Farisi gbe otu Sadusi (5-12)

  • Isiavẹ Uvie na (13-20)

    • A bọ ukoko na họ ehru utho (18)

  • Jesu ọ ta kpahe uwhu riẹ (21-23)

  • Epanọ a rẹ rọ jọ uvi olele (24-28)

16  Otu Farisi gbe otu Sadusi a tẹ nya bru Jesu ze evaọ etẹe, yọ re a dawo iẹe, a tẹ ta kẹe nọ o dhesẹ oka jọ kẹ ae no ehru ze.  Ọ tẹ ta kẹ ae nọ: Nọ owọwọ u te te, wha rẹ ta nọ, ‘Oso ọ te rrọ họ, keme ovao ehru na o rrọ wawae,’  yọ evaọ ohiohiẹ, wha rẹ ta nọ, ‘Oso ọ te rrọ nẹnẹ avọ ekpahe keme ovao ehru na o rrọ wawae rekọ o mu ovao họ.’ Wha riẹ epanọ wha rẹ fa otọ ovao ehru, rekọ wha riẹ epanọ wha rẹ fa otọ eka oke na ha.  Oge omuomu gbe ọrọ ibruẹnwae* ọ be gwọlọ oka, rekọ a rẹ te kẹe uvumọ oka ha ajokpaọ oka Jona.” Ọ tẹ nyase ae ba etẹe.  Whaọ, ilele na a tẹ fa vrẹ kpohọ abọdekọ, rekọ a kareghẹhọ wha ebrẹdi lele oma ha.  Jesu ọ tẹ ta kẹ ae nọ: “Wha muẹrohọ otọ jẹ yọroma kẹ ẹvi* otu Farisi gbe otu Sadusi.”  Fikiere a te mu ohwohwo họ ẹta kẹ nọ: “Ma wha uvumọ ebrẹdi lele oma ha.”  Fikinọ Jesu ọ riẹ oware nọ a bi roro, ọ tẹ ta nọ: “Emejabọ wha be rọ ta kẹ ohwohwo nọ wha wo ebrẹdi hi, whai nọ i wo ẹrọwọ ọkakao?  Kọ wha ri wo otoriẹ ẹme na ghele, hayo kọ wha gbẹ kareghẹhọ ebrẹdi isoi nọ mẹ rọ kuọ ezae idu isoi (5,000) gbe unu ikete nọ wha kwa koko? 10  Hayo ebrẹdi ihrẹ nọ mẹ rọ kuọ ezae idu ene (4,000) gbe unu ikete ilogbo nọ wha kwa koko? 11  Ẹvẹ wha gbe ro wo otoriẹ ẹme na ha inọ ebrẹdi mẹ be ta kpahe he? Ẹme na họ, wha yọroma kẹ ẹvi otu Farisi gbe otu Sadusi.” 12  Kẹsena, a te vuhumu inọ orọnikọ ẹvi nọ u re ru ebrẹdi fu ọ be ta kpahe he, rekọ inọ a yọroma kẹ iwuhrẹ otu Farisi gbe otu Sadusi. 13  Nọ ọ nya ziọ ubrotọ Sisaria ọrọ Filipai, Jesu ọ tẹ nọ ilele riẹ nọ: “Ono ahwo a be ta nọ Ọmọ ohwo ọ rrọ?” 14  A tẹ ta nọ: “Ejọ e be ta nọ Jọn Ọhọahwo-Ame na, efa Elaeja, efa kọ Jerimaya hayo omọvo eruẹaro na.” 15  Ọ tẹ ta kẹ ae nọ: “Kọ owhai, ono wha roro nọ mẹ rrọ?” 16  Saemọn Pita ọ tẹ kuyo nọ: “Whẹ họ Kristi na, Ọmọ Ọghẹnẹ nọ ọ rrọ uzuazọ na.” 17  Jesu ọ tẹ ta kẹe nọ: “Eva e were owhẹ, Saemọn ọmọ Jona, keme orọnikọ uwo gbe azẹ* u rovie onana kẹ owhẹ hẹ rekọ Ọsẹ mẹ nọ ọ rrọ obọ odhiwu. 18  Mẹ be jẹ ta kẹ owhẹ nọ: Whẹ họ Pita, yọ ehru utho nana mẹ te bọ ukoko mẹ fihọ, yọ inuẹthẹ Uki* e te ga obọ vi ei hi. 19  Mẹ te kẹ owhẹ isiavẹ Uvie odhiwu, yọ oware kpobi nọ whọ te gba evaọ otọakpọ o te jọ onọ a gba no evaọ obọ odhiwu, yọ oware kpobi nọ whọ te ra evaọ otọakpọ o te jọ onọ a ra no evaọ obọ odhiwu.” 20  Kẹsena ọ tẹ vẹvẹ ilele na unu gaga inọ a ta kẹ ohwo ọvo ho inọ ọye họ Kristi na. 21  No oke yena vrẹ, Jesu o te mu ilele riẹ họ ẹta kẹ vevẹ inọ o gba riẹ họ nọ o re kpobọ Jerusalẹm, ọ vẹ te ruẹ uye eware buobu evaọ obọ ekpako na gbe ilori izerẹ na gbe otu ikere-obe na, a ve ti kpei, rekọ ọ vẹ te kparoma ze evaọ ẹdẹ avọ esa. 22  Fikiere Pita o te sei họ akotọ, o te mu ei họ ẹwhọku nọ: “Whọ rọ uye bẹ omara ha Olori; onana o rẹ via kẹ owhẹ vievie he.” 23  Rekọ nọ o kuomarẹriẹ, ọ tẹ ta kẹ Pita nọ: “Ruọ emu mẹ, Setan! Whẹ yọ utho ezoruẹ kẹ omẹ keme iroro ahwo-akpọ who bi roro na orọnikọ erọ Ọghẹnẹ hẹ.” 24  Kẹsena Jesu ọ tẹ ta kẹ ilele riẹ nọ: “Otẹrọnọ ohwo jọ ọ gwọlọ lele omẹ, jọ ọ vro omobọ riẹ jẹ wọ ure-oja* riẹ je lele omẹ ẹsikpobi. 25  Keme ohwo kpobi nọ ọ be gwọlọ siwi uzuazọ riẹ, uzuazọ riẹ u ti vru, rekọ ohwo kpobi nọ uzuazọ riẹ u vru fiki mẹ ọ te wariẹ woi. 26  Evaọ uzẹme, didi ewoma o rẹ jọ kẹ ohwo otẹrọnọ o wo akpọ na soso rekọ uzuazọ riẹ u te vru? Hayo kọ eme ohwo ọ sai ro nwene uzuazọ riẹ? 27  Keme Ọmọ ohwo ọ te nyaze evaọ oruaro Ọsẹ riẹ, tei te ikọ-odhiwu riẹ, ọ vẹ te hwosa kẹ ohwo kpobi wọhọ epaọ iruo riẹ. 28  Uzẹme mẹ be ta kẹ owhai inọ ejọ e rrọ etenẹ na nọ i ti whu vievie he ajokpanọ a ruẹ Ọmọ ohwo nọ ọ be nyaze evaọ Uvie riẹ.”

Oruvẹ-Obotọ

Hayo “ahwo nọ a rọ oma rai kpobi kẹ Ọghẹnẹ hẹ.”
Koyehọ, iyisti nọ a re kugbe ro ru ebrẹdi nọ u re ru ei fu.
Hayo “orọnikọ ohwo-akpọ.”
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
Rri oria Otofa Eme.