Kpohọ eme nọ e riẹ eva

Kpohọ oria izoẹme

Mak 7:1-37

EWARE NỌ E RIẸ EVA

  • Ọ fere iruemu ahwo oke anwae nọ a je lele via (1-13)

  • Obọ udu eware nọ i re zue ohwo oma i re no ze (14-23)

  • Ẹrọwọ aye obọ Sairofonisia (24-30)

  • O siwi ọzae nọ o diezọ (31-37)

7  Otu Farisi gbe otu ikere-obe jọ nọ i no Jerusalẹm ze a te koko wariẹe họ.  A tẹ ruẹ ilele riẹ jọ nọ e be re emu avọ abọ ogbegbe, koyehọ abọ nọ a wozẹ hẹ.*  (Keme otu Farisi na gbe ahwo Ju kpobi a rẹ re emu hu ajokpanọ a wozẹ abọ te ighilabọ, be talamu uruemu ahwo oke anwae,  yọ a te no eki ze, a rẹ re emu hu ajokpanọ a wozẹ oma rai. Iruemu efa buobu e riẹ nọ a wo no obọ esẹ rai ze nọ a talamu, wọhọ oriruo, a re du igho-ame esese avọ ilogbo gbe ido-ẹroo họ ame le no ro voro ai oma.)  Fikiere otu Farisi gbe otu ikere-obe nana a tẹ nọe nọ: “Fikieme ilele ra a gbe bi ro lele uruemu ahwo oke anwae he, rekọ a rẹ re emu avọ abọ ogbegbe?”  Ọ tẹ ta kẹ ae nọ: “Aizaya ọ ta gba nọ ọ ruẹaro kpahe owhai eviẹwẹ na, nọ o kere nọ, ‘Igbenu rai ahwo nana a be rọ kẹ omẹ ọghọ, rekọ udu rai u thabọ gaga no omẹ.  A be gọ omẹ kufiẹ gheghe, keme iwuhrẹ ahwo a bi ro wuhrẹ.’  Wha nyasiọ ijaje Ọghẹnẹ ba, wha tẹ talamu uruemu nọ u no obọ ahwo ze.”  Ọ tẹ jẹ ta kẹ ae nọ: “Wha be rehọ ẹghẹ gbabọkẹ ujaje Ọghẹnẹ re wha ruẹse sẹro uruemu obọrai. 10  Wọhọ oriruo, Mosis ọ ta nọ, ‘Rọ ọghọ kẹ ọsẹ ra avọ oni ra,’ yọ ‘Ọnọ ọ ta ẹme oyoma kpahe ọsẹ hayo oni riẹ a re kpei no.’ 11  Rekọ wha ta nọ, ‘Otẹrọnọ ohwo ọ ta kẹ ọsẹ hayo oni riẹ nọ: “Oware kpobi nọ me wo nọ o hae kẹ owhẹ erere o rrọ kọban (koyehọ, okẹ nọ a ro mudhe kẹ Ọghẹnẹ),”’ 12  wha gbẹ be kẹe uvẹ ru oware ovo kẹ ọsẹ hayo oni riẹ hẹ. 13  Fikiere, wha be rehọ uruemu rai nọ wha wo no oke anwae ze nọ wha be wha họ aro rọ raha ẹme Ọghẹnẹ no. Eware itienana buobu e riẹ nọ wha bi ru.” 14  Nọ ọ wariẹ se ogbotu na kẹle oma, ọ tẹ ta kẹ ae nọ: “Whai kpobi wha gaviezọ kẹ omẹ, re wha wo otoriẹ ẹme nọ mẹ be te ta na. 15  Uvumọ oware nọ o ruọ obeva ohwo nọ u re zue ei oma o riẹ hẹ; rekọ eware nọ i no obeva ohwo ze eye i re zue ei oma.” 16  —— 17  Whaọ, nọ ọ nyasiọ ogbotu na ba ruọ evaọ uwou no, ilele riẹ a te mu ei họ ẹnọ kpahe ọtadhesẹ na. 18  Ọ tẹ ta kẹ ae nọ: “Kọ wha kare otoriẹ re wọhọ e rai? Kọ wha gbẹ riẹ nọ uvumọ oware nọ o ruọ obeva ohwo nọ u re zue ei oma o riẹ hẹ? 19  Keme orọnikọ udu riẹ u re kpohọ họ rekọ eva riẹ, o ve nei kufiẹ.” Ọ tẹ rọ enẹ dhesẹ nọ emu kpobi ọ fo. 20  Ọ tẹ jẹ ta nọ: “Oware nọ u no obeva ohwo ze oye u re zue ei oma. 21  Keme obeva na, koyehọ udu ohwo oye iroro iyoma i re no ze, ọfariẹ-ogbe,* uji-utho, ohwo-okpe, 22  ẹnwae-obro, uvou-uthei, umuomu, eviẹhọ, uruemu nọ u fo ho nọ a re ru ababọ omovuọ,* ubiẹro nọ o rẹ re ihri, eme-aghọ, omorro, gbe ugheghẹ. 23  Obeva eware imuomu nana kpobi i re no ze yọ eye i re zue ohwo oma.” 24  O te no etẹe o te kpobọ ubrotọ Taya avọ Saedọn. Ọ tẹ jọ etẹe ruọ evaọ uwou yọ ọ gwọlọ re ohwo ọvo ọ riẹ nọ ọ rrọ etẹe he, rekọ ahwo a ruẹ e riẹ ghele. 25  Aye jọ nọ ẹzi ogbegbe ọ jọ ọmọtẹ riẹ oma ọ tẹ nwani yo kpahe Jesu, ọ tẹ nyaze, o te kigwẹ fihọ aro riẹ. 26  Aye na ohwo Griki nọ ọ rrọ ọmotọ Sairofonisia, ọ tẹ be lẹe re o le idhivẹri na no ọmọtẹ riẹ oma. 27  Rekọ Jesu ọ tẹ ta kẹe nọ: “Jọ emọ na a kake re eva vọ, keme u kiehọ họ re a tọlọ ebrẹdi emọ na gbolo kẹ emọ erakọ.” 28  Rekọ aye na ọ tẹ ta kẹe nọ: “Ginọ ere, ọga, rekọ emọ erakọ nọ e rrọ otọ emẹjẹ na dede a rẹ re ehẹhẹ nọ i kie no emọ esese na abọ fihọ otọ.” 29  Jesu ọ tẹ ta kẹe nọ: “Fiki ẹme nana nọ whọ ta na, nya kpo; idhivẹri na o no ọmọtẹ ra oma no.” 30  Ọ tẹ nya kpo ọ tẹ ruẹ ọmọtẹ riẹ nọ o kiẹzẹ ehwa, yọ idhivẹri na o no rie oma no. 31  Nọ Jesu o zihe no ubrotọ Taya ze, ọ tẹ nya orọ Saedọn ruọ ubrotọ Dẹkapọlis* ziọ obọ Abade Galili. 32  A tẹ jọ etẹe rọ ọzae jọ nọ o diezọ nọ uleliutagha o rrọ ẹrọo riẹ bru rie ze, a tẹ lẹe re ọ rọ obọ kpahe iẹe. 33  Ọ tẹ rehọ ọzae na ruọ akotọ nyasiọ ogbotu na ba. O te dhe iziabọ riẹ họ ezọ ọzae na, nọ o nwo eya no, ọ tẹ rọ obọ te ẹrọo ọzae na. 34  Nọ o rri ehru, o te kuẹwẹ ọgaga jẹ ta kẹe nọ: “Efata,” koyehọ, “Rovie.” 35  Ezọ riẹ i te rovie, uleliutagha na u te no ẹrọo riẹ, o te mu ẹme họ ẹta gbagba. 36  Ọ tẹ vẹvẹ ai unu nọ a vuẹ ohwo ọvo ho, rekọ epanọ ọ vẹvẹ e rai unu te ere a je whowho iei ga te. 37  Ẹhẹ, u gbe rai unu thesiwa, a tẹ ta nọ: “O ru eware na kpobi gba no. O bi tube ru enọ i diezọ yo ẹme gbe enọ i dienu ta ẹme.”

Oruvẹ-Obotọ

Rri eme-obotọ Mt 15:2.
Evaọ Griki, por·neiʹa. Rri oria Otofa Eme.
Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
Hayo “Ubrotọ Ewho Ikpe.”