Kpohọ eme nọ e riẹ eva

Kpohọ oria izoẹme

Mak 5:1-43

EWARE NỌ E RIẸ EVA

  • O le idhivẹri ruọ owa isi (1-20)

  • Ọmọtẹ Jairọs; aye jọ ọ rọ obọ te iwu ehru Jesu (21-43)

5  Kẹsena a te te abọdekọ abade na, evaọ ubrotọ ahwo Gẹrasa.  Nọ Jesu ọ nwani no okọ na ze, ọzae jọ nọ ẹzi ogbegbe ọ rrọ oma o te no oria nọ a re ki ahwo fihọ bru rie ze.  Oria iki na ọ jẹ hae mae jọ, yọ ri bọo oke yena, uvumọ ohwo ọ re sae gbae fihọ oria ovo ho, makọ avọ egbregba dede.  A jẹ hae rehọ egbregba rọ kare abọ gbe awọ riẹ, rekọ ọ vẹ sawo ai no; yọ ohwo ọvo o wo ogaga nọ ọ jẹ sae rọ gbae fihọ otọ họ.  Ẹsikpobi, taso tuvo, ọ jẹ hai bo evaọ oria iki na gbe evaọ igbehru na yọ ọ be rehọ ewẹ-itho bru oma riẹ.  Rekọ nọ o gbẹro ku Jesu evaọ ugbo, ọ tẹ dhẹ bru rie jẹ rọ uzou kpotọ kẹe.  Kẹsena o te bo gaga nọ: “Eme me wo kugbe owhẹ, Jesu Ọmọ Ọghẹnẹ nọ Ọ Mai Kpehru na? Mẹ gwọlọ nọ whọ rehọ odẹ Ọghẹnẹ duwu iyei nọ whọ te kẹ omẹ uye he.”  Keme Jesu ọ be ta kẹe nọ: “No oma ọzae na ze, whẹ ẹzi ogbegbe.”  Jesu ọ tẹ nọe nọ: “Didi odẹ ra?” Ọ tẹ kẹe uyo nọ: “Odẹ mẹ Ogbaẹmo* keme ma rrọ buobu.” 10  Ọ tẹ be lẹ Jesu inọ o le izi na no orẹwho na ha. 11  Whaọ, owa isi nọ o jọ buobu o jẹ re emu evaọ ugbehru na. 12  Fikiere izi na e tẹ lẹe nọ: “Kẹ omai uvẹ ruọ oma isi na.” 13  Ọ tẹ kẹ ae uvẹ nọ a ru ere. Izi igbegbe na i te no ọzae na oma e tẹ ruọ isi na, owa isi na o tẹ họrọ ruọ oria nọ o galivi, kie fihọ abade na, a bu te oware wọhọ idu ivẹ (2,000), a tẹ da ame whu. 14  Rekọ enọ e jẹ rẹrote ai a tẹ dhẹ, a tẹ niyẹrẹ na evaọ ẹwho na gbe okegbe yena soso, ahwo a tẹ nyaze te ruẹ oware nọ o via na. 15  A tẹ nya bru Jesu ze a tẹ ruẹ ọzae nọ idhivẹri buobu e jọ oma vẹre na nọ ọ keria avọ ewu nọ o kuhọ yọ iroro riẹ e rrọ gbagba, ozọ u te mu ai. 16  Ofariẹ, enọ e ruẹ oware nọ o via kẹ ọzae nọ idhivẹri e jọ oma na gbe isi na a te gbiku kẹ ae epanọ o rọ via. 17  Fikiere a te mu Jesu họ ẹlẹ inọ o no ubrotọ rai. 18  Whaọ, epanọ ọ be rọ ruọ okọ na, ọzae nọ idhivẹri e jọ oma na ọ tẹ be lẹe inọ o re lele iei. 19  Rekọ, ọ rọwo kẹe he, ukpoye ọ ta kẹe nọ: “Kpo bru imoni ra, re whọ vuẹ ae eware kpobi nọ Jihova* o ru kẹ owhẹ gbe ohrọ nọ ọ re owhẹ.” 20  Ọzae na ọ tẹ nyavrẹ, o te mu eware kpobi nọ Jesu o ru kẹe họ ewhowho evaọ Dẹkapọlis* na, u te gbe ahwo na kpobi unu. 21  Nọ Jesu ọ wariẹ ruọ okọ fa kpohọ abọdekọ no, ogbotu ahwo buobu a te su kokohọ kẹe, yọ ọ jọ akotọ abade na. 22  Omọvo enọ i wuzou evaọ uwou-egagọ na, nọ a re se Jairọs, ọ tẹ nyaze, nọ ọ ruẹ Jesu o te kigwẹ fihọ aro riẹ. 23  Ọ lẹ riẹ unuẹse buobu inọ: “Ọmọtẹ ọsese mẹ ọ be mọ gaga.* Ivie nyaze whọ rọ abọ ra kpahe iẹe re ẹyao riẹ o kpo.” 24  Jesu o te lele iei, yọ ogbotu obuobu a je lele iei je bi tunyẹe. 25  Whaọ, aye jọ ọ jariẹ nọ o je hwẹ azẹ ikpe ikpegbivẹ soso. 26  Ọ ruẹ uye gaga no* evaọ obọ edọkita buobu, ọ tẹ jẹ raha igho riẹ kpobi no, yọ ẹyao na o je kpo ho, ukpoye, ẹsiẹe o jẹ ga. 27  Nọ o yo eware nọ Jesu o bi ru, ọ tẹ nyaze, thuẹthuẹ oma họ udevie ogbotu na ziọ emu Jesu, ọ tẹ rọ obọ te ewu ehru riẹ, 28  keme ọ jẹ ta kẹ omariẹ nọ: “Mẹ tẹ sae rọ obọ te ewu ehru riẹ ọvo dede, ẹyao mẹ o ti kpo.” 29  Ẹsiẹvo na, azẹ nọ o je hwẹ na o te serihọ, ọ tẹ jọ oma riẹ inọ ẹyao nọ ọ be lahiẹ iẹe na o kpo no. 30  Jesu ọ tẹ nwane jọ oma riẹ nọ ogaga u no rie oma, o te kuomarẹriẹ evaọ udevie ogbotu na ọ tẹ nọ nọ: “Ono ọ rọ obọ te ewu mẹ?” 31  Rekọ ilele riẹ a tẹ ta kẹe nọ: “Whọ be ruẹ ogbotu na nọ a bi tu nyẹ owhẹ na, whọ tẹ be nọ nọ, ‘Ono ọ rọ obọ te omẹ?’” 32  Ghele na, o te je rri wariẹ re ọ ruẹ ohwo nọ o ru onana. 33  Fikinọ aye na ọ riẹ oware nọ o via kẹe, ozọ u te mu ei o te je nuhu, ọ tẹ roma lahwe o te kigwẹ fihọ aro riẹ ọ tẹ ta uzẹme na kpobi kẹe. 34  Jesu ọ tẹ ta kẹe nọ: “Ọmọtẹ, ẹrọwọ ra o siwi owhẹ no. Nya kpo tou, jọ ẹyao na ọ gbẹ lahiẹ owhẹ ofa ha.” 35  Nọ ọ gbẹ jẹ ta ẹme na, ezae jọ nọ i no obọ uwou ọnọ o wuzou evaọ uwou-egagọ na ze a tẹ ta nọ: “Ọmọtẹ ra o whu no! Who gbe du kpokpo Owuhrẹ na ha.” 36  Rekọ Jesu o yo eme rai na ọ tẹ ta kẹ ọnọ o wuzou evaọ uwou-egagọ na nọ: “Jọ ozọ u mu owhẹ hẹ;* thakpi wo ẹrọwọ.” 37  Whaọ, ọ kẹ amọfa uvẹ re a lele iei hi ajokpaọ Pita, Jemis gbe Jọn oniọvo Jemis. 38  Nọ a te uwou ọnọ o wuzou evaọ uwou-egagọ na, ọ tẹ ruẹ oria na nọ o rrọ zighi zighi, gbe enọ e be viẹ je bi bo gaga. 39  Nọ ọ ruọ eva no, ọ tẹ ta kẹ ae nọ: “Fikieme wha be rọ viẹ je bi ru edo? Ọmọ na o whu hu rekọ ọ be wezẹ.” 40  A te mu ei họ ẹhwẹ avọ ẹkoko. Rekọ nọ o vi ai kpobi ruọ otafe no, o te se ọsẹ avọ oni ọmọ na gbe enọ e jọ kugbei kugbe oma, ọ tẹ ruọ oria nọ ọmọ na ọ jọ. 41  Kẹsena nọ o kru obọ ọmọ na, ọ tẹ ta kẹe nọ: “Talita kumi,” onọ otofa riẹ o rrọ: “Ọmọtẹ ọsese, mẹ be ta kẹ owhẹ nọ, ‘Kpama!’” 42  Ọmọtẹ na ọ tẹ nwane kpama o te muhọ ẹnya. (Ikpe ikpegbivẹ ọ jọ.) Ọsẹgboni riẹ a te duola be ghọghọ gaga. 43  Rekọ ọ vẹvẹ e rai unu unuẹse buobu* inọ a vuẹ ohwo ọvo ho, ọ tẹ ta nọ a kẹ ọmọ na emu re ọ re.

Oruvẹ-Obotọ

Hayo “Lijiọn.” Evaọ egbaẹmo Rom anwae, Lijiọn yọ ẹko ogbaẹmo ọvo nọ u re wo isoja bu te umuo idu ene rite idu ezeza.
Rri oria Otofa Eme.
Hayo “Ubrotọ Ewho Ikpe.”
Hayo “ọ kẹle uwhu no.”
Hayo “ruẹ uye edada buobu no.”
Hayo “Ozọ u gbe mu owhẹ hẹ.”
Hayo “ọ vẹvẹ e rai unu gaga.”