Kpohọ eme nọ e riẹ eva

Kpohọ oria izoẹme

Mak 15:1-47

EWARE NỌ E RIẸ EVA

  • Jesu evaọ aro Pailet (1-15)

  • A se rie ẹkoko evaọ ẹgbede (16-20)

  • A tehe riẹ fihọ ure evaọ Golgota (21-32)

  • Uwhu Jesu (33-41)

  • A ki Jesu (42-47)

15  Nọ oke o nwane ke no, ilori izerẹ avọ ekpako na gbe otu ikere-obe na, ẹhẹ, ogbẹgwae Sanhẹdrin na soso a tẹ gba ẹgwae, a tẹ gba Jesu abọ je su ei vrẹ a tẹ rehọ iẹe kẹ Pailet.  Pailet ọ tẹ nọe nọ: “Kọ whẹ họ Ovie ahwo Ju na?” Ọ tẹ kẹ uyo nọ: “Whẹ ọvo whọ ta riẹ na.”  Rekọ ilori izerẹ na a je gu eware buobu fihọ iẹe uzou.  Pailet ọ tẹ be wariẹ nọe nọ: “Kọ who wo ẹme ọvo nọ whọ rẹ kpahe? Rri epanọ eware nọ a be ta kpahe owhẹ i bu te.”  Rekọ Jesu ọ gbẹ kpahe ẹme viere he, u te gbe Pailet unu gaga.  Whaọ evaọ oke ehaa Ọnyavrẹ kpobi, ọ jẹ hai siobọno ohwo jọ nọ ọ rrọ uwou-odi kẹ ogbotu na, ọnọ a yare.  Evaọ oke yena, ọzae jọ nọ a re se Barabas ọ jọ uwou-odi kugbe otu nọ e kpareso egọmeti, enọ i kpe ahwo evaọ ọkparesuọ rai.  Ogbotu na a tẹ nyaze a tẹ be yare Pailet nọ o siobọno ohwo jọ kẹ ae wọhọ epanọ ọ be hai ru kẹ ae.  Ọ tẹ nọ ae nọ: “Kọ wha gwọlọ nọ me siobọno Ovie ahwo Ju na kẹ owhai?” 10  Keme Pailet ọ riẹ inọ fiki ihri-eriọ ilori izerẹ na a rọ rehọ Jesu sei. 11  Rekọ ilori izerẹ na a tẹ tuduhọ ogbotu na awọ inọ a ta nọ Barabas a gwọlọ nọ o siobọno kẹ ae. 12  Pailet ọ tẹ wariẹ nọ ae nọ: “Kọ eme me re ru ọnọ wha bi se Ovie ahwo Ju na?” 13  A tẹ wariẹ bo nọ: “Kare iẹe fihọ ure!”* 14  Rekọ Pailet ọ tẹ nọ ae nọ: “Fikieme? Didi oware uyoma o ru?” A te gbe bi bo ga viere inọ: “Kare iẹe fihọ ure!”* 15  Fikinọ Pailet ọ gwọlọ ru ogbotu na eva were, o te siobọno Barabas kẹ ae; ọ tẹ ta kẹ isoja na nọ a fa Jesu, nọ a fae no, ọ tẹ rehọ iẹe kẹ ae re a nyae kare iẹe fihọ ure kpe. 16  Isoja na a te su ei ruọ etegu, koyehọ ruọ ighẹ ọba na, a te se ogbaẹmo na soso ze kokohọ. 17  A te fi ogbru ekọlọ ogorurẹ họ iẹe oma jẹ nwa etu idhigbo a tẹ rehọ iẹe tu ei uzou; 18  a te bi yere iei nọ: “Do, whẹ Ovie ahwo Ju!” 19  Ofariẹ, a jẹ rehọ ukpoko fae uzou je bi nwo eya ku ei, a te kigwẹ a tẹ rọ uzou kpotọ kẹe. 20  Ukuhọ riẹ, nọ a rehọ iẹe jijehwẹ bẹ no, a te si ogbru na noi oma a je ku iwu ehru riẹ fihọ iẹe. A te su ei vrẹ re a tehe iẹe fihọ ure na. 21  Ofariẹ, a te kru ọzae jọ nọ ọ jẹ nyavrẹ, Saemọn, ohwo ẹwho Sairini, ọnọ ọ rrọ ọsẹ Alẹkzanda gbe Rufọs, nọ o je no iwhre jọ ze, a tẹ gbae họ nọ ọ wọ ure-oja* Jesu. 22  Kẹsena a tẹ rehọ iẹe ziọ oria nọ a re se Golgota, onọ otofa riẹ o rrọ “Oria Ukolo-Uzou.” 23  Etenẹ a jẹ jọ gwọlọ kẹe udi nọ a rehọ mọr gua, rekọ ọ rọwo dae he. 24  A tẹ tehe iẹe fihọ ure na, a tẹ rehọ edhọ-ifio ghale iwu ehru riẹ re a riẹ onọ omomọvo ọ rẹ rehọ. 25  Evaọ oware wọhọ auwa avọ esa,* a tẹ tehe iẹe fihọ ure na. 26  Yọ a kere uzi nọ a ta nọ ọ thọ fihọ ẹwẹ-akpala jẹ tehe iẹe họ ure na, inọ: “Ovie ahwo Ju.” 27  Ofariẹ, a kare igbulegbu ivẹ fihọ ire evaọ akotọ riẹ, ọjọ ofẹ obọze riẹ ọdekọ kọ ẹkpẹlobọ riẹ. 28  —— 29  Enọ e jẹ nyavrẹ a tẹ jẹ rehọ iẹe jijehwẹ, bi nuhu uzou rai jẹ ta nọ: “Ha! Whẹ nọ ọ ta nọ o re kporo etẹmpol na fihọ otọ ọ vẹ bọe evaọ edẹ esa, 30  siwi omara, nwrotọ no ure-oja* na ze.” 31  Epọvo na re, ilori izerẹ na gbe otu ikere-obe na a jẹ rehọ iẹe jijehwẹ be ta nọ: “O siwi amọfa; ọ be sai siwi omariẹ hẹ! 32  Jọ Kristi na, Ovie Izrẹl o nwrotọ no ure-oja* na ze re ma ruẹ jẹ rọwo.” Makọ enọ a kare fihọ ire evaọ akotọ riẹ na a je sei ẹkoko re. 33  Nọ auwa avọ ezeza* o te, oria kpobi u te muebi rite auwa avọ izii.* 34  Evaọ auwa avọ izii na, Jesu o te bo gaga nọ: “Eli, Eli, lama sabaktani?” onọ otofa riẹ o rrọ, “Ọghẹnẹ mẹ, Ọghẹnẹ mẹ, fikieme whọ rọ siọ omẹ ba?” 35  Nọ ejọ evaọ usu ahwo nọ a dikihẹ etẹe a yo onana, a te muhọ ẹta nọ: “Rri! O bi se Elaeja.” 36  Ohwo jọ ọ tẹ dhẹ nyai duwu uzi họ udi-ogho, ọ tẹ jẹe họ ukpoko, ọ tẹ rehọ iẹe kẹe re ọ da, be ta nọ: “Wha vu ei wa. Joma ruẹ sọ Elaeja ọ te nyaze ti si ei no ure na fihọ otọ.” 37  Rekọ Jesu o te bo gaga o te se ẹwẹ họ.* 38  Ekọtini aruẹri na ọ tẹ bẹre ewẹ ivẹ no ehru duwu otọ. 39  Nọ oletu ogbaẹmo* nọ o dikihẹ etẹe je rri rie ọ ruẹ eware nọ e via evaọ oke nọ o ro whu, ọ tẹ ta nọ: “Ababọ avro, ọzae nana Ọmọ Ọghẹnẹ.” 40  Eyae jọ e jariẹ nọ e jọ ugbo je rri, ejọ rai họ, Meri Magdalini gbe Meri oni Jemis Ọsese na avọ Josis, gbe Salomi, 41  enọ e jẹ hai lele iei jẹ gbodibo kẹe evaọ oke nọ ọ jọ obọ Galili, gbe eyae efa buobu nọ i lele i rie ziọ obọ Jerusalẹm. 42  Whaọ fikinọ owọwọ u bi te no, o tẹ jẹ rrọ ẹdẹ Omaruẹrẹ-Kpahe, koyehọ ẹdẹ nọ o vrẹ no a ve te Ẹdijala, 43  Josẹf ohwo Arimatia ọ tẹ nyaze, ọnọ ọ jọ omọvo Ogbẹgwae na nọ ọ viodẹ, nọ ọ jẹ hẹrẹ Uvie Ọghẹnẹ re. Ọ tẹ gbaudu nya bru Pailet ọ tẹ yare nọ a rehọ ori Jesu kẹe. 44  Rekọ u mu Pailet ẹro ho sọ Jesu o whu no, o te se oletu ogbaẹmo na, ọ tẹ nọe sọ Jesu o whu no. 45  Nọ oletu ogbaẹmo na ọ vuẹe nọ o whu no, o te siobọno ori na kẹ Josẹf. 46  Ọ tẹ dẹ emamọ ehọ-elọlọhọ, ọ tẹ wọe jẹ rehọ ehọ-elọlọhọ na vare iẹe, ọ tẹ wọe fihọ uki* nọ ọ tọ fihọ utho; o te ghelie utho ro di unu uki na. 47  Rekọ Meri Magdalini avọ Meri oni Josis a tẹ gbẹ jọ etẹe bi rri oria nọ a wọ riẹ fihọ na.

Oruvẹ-Obotọ

Hayo “Kare iẹe fihọ ure kpe!”
Hayo “Kare iẹe fihọ ure kpe!”
Rri oria Otofa Eme.
Koyehọ, oware wọhọ ighọjọ izii ohiohiẹ.
Rri oria Otofa Eme.
Rri oria Otofa Eme.
“Auwa avọ ezeza,” koyehọ, oware wọhọ ighọjọ ikpegbivẹ uvo.
“Auwa avọ izii,” koyehọ, oware wọhọ ighọjọ esa uvo.
Hayo “ku ẹwẹ urere riẹ.”
Koyehọ, “ọnọ o wuzou isoja udhusoi.”
Hayo “uki ekareghẹhọ.”