Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Mak 13:1-37

EWARE NỌ E RIẸ EVA

  • URERE UYERO-AKPỌ (1-37)

    • Emo, etọ i re ti nuhu, ohọo (8)

    • A te ta usi uwoma na (10)

    • Uye ulogbo (19)

    • Ẹnyaze Ọmọ ohwo (26)

    • Ọtadhesẹ ure ifigi (28-31)

    • Ruabọhọ erou (32-37)

13  Epanọ o je ro no etẹmpol na, olele riẹ jọ ọ tẹ ta kẹe nọ: “Owuhrẹ, rri obọdẹ itho gbe iwou na!”  Rekọ Jesu ọ tẹ ta kẹe nọ: “Kọ whọ be ruẹ iwou ilogbo nana? A te nyasiọ utho ovo ba ehru utho evaọ etenẹ na vievie he nọ a ti kporo fihọ otọ họ.”  Epanọ ọ rọ keria ehru Ugbehru Olivi evaọ oria nọ ọ be jọ ruẹ etẹmpol na, Pita, Jemis, Jọn, gbe Andru ọvo a tẹ nya bru rie, a tẹ nọe nọ:  “Ta kẹ omai, oke vẹ eware nana e te rọ via, kọ eme ọ te jọ oka ọrọ oke nọ eware nana kpobi i ti ro kuhọ?”  Fikiere, Jesu o te mu ae họ ẹta kẹ nọ: “Wha muẹrohọ otọ re ohwo ọvo ọ siọ owhai ba esuthọ.  Ibuobu e te rọ odẹ mẹ nyaze, ta nọ, ‘Mẹ họ ọye,’ a ve ti su ibuobu thọ.  Ofariẹ, nọ wha te yo edo emo gbe usi emo, jọ ozọ u mu owhai hi; eware nana e rẹ via hrọ, rekọ ekuhọ na o ri te he.  “Keme orẹwho o rẹ te kpareso orẹwho, uvie o rẹ te kpareso uvie; etọ i re ti nuhu no oria ruọ oria; ohọo u re ti mu re. Enana kpobi yọ emuhọ eware nọ e te wha edada ze.*  “Rọkẹ owhai, wha muẹrohọ otọ. Ahwo a re ti tu owhai ẹdhọ kpohọ ekọto rai, yọ a te fa owhai evaọ iwou-egagọ je mu owhai kpohọ aro eba gbe ivie fiki mẹ re o jọ isẹri kẹ ae. 10  Ofariẹ, evaọ erẹwho na kpobi, a rẹ kake ta usi uwoma na tao. 11  Nọ a tẹ be rehọ owhai nya, wha du ruawa ẹme nọ wha rẹ ta ha; rekọ ẹme kpobi nọ a rọ kẹ owhai evaọ auwa yena, wha ta oyena, keme orọnikọ whai họ enọ e be ta ẹme na ha rekọ ẹzi ọfuafo na. 12  Ofariẹ, oniọvo o re ti vivie oniọvo riẹ re a kpei, ọsẹ o ti vivie ọmọ riẹ, emọ e te wọso esẹgbini rai, je vivie ai re a kpe ai. 13  Ahwo kpobi a ti mukpahe owhai fiki odẹ mẹ. Rekọ ọnọ o thihakọ te urere a ti siwi ei. 14  “Rekọ, nọ wha tẹ ruẹ oware otọtọ na nọ o rẹ wha ọraha ze nọ u dikihẹ oria nọ u fo nọ o rẹ jọ họ, (jọ ọnọ o bi se eme nana ọ rehọ orimuo wo otoriẹ rai), jọ enọ e rrọ Judia a muhọ ẹdhẹ kpobọ igbehru. 15  Jọ ohwo nọ ọ rrọ ehru uwou* ọ ziọ otọ te kwa oware ovo evaọ uwou riẹ hẹ; 16  jọ ohwo nọ ọ rrọ obọ ẹwọ o zihe ze te tọlọ ewu ehru riẹ hẹ. 17  U ti yoma gaga kẹ eyae nọ i dihọ gbe enọ i wo emọ unuevie evaọ edẹ yena! 18  Wha hae lẹ nọ u kie fihọ ezi ekpahe he; 19  keme edẹ yena e te jọ edẹ uye ulogbo utionọ o re jọ no emuhọ emama nọ Ọghẹnẹ ọ ma na ze ri bọo oke yena ha, yọ utioye o gbẹ te via ofa ha. 20  Evaọ uzẹme, Jihova* o gbe bru edẹ na kpẹre he, ohwo ọvo ọ te zọ họ. Rekọ fiki enọ ọ salọ na, o bru edẹ na kpẹre no. 21  “Ofariẹ, ohwo jọ ọ tẹ ta kẹ owhai nọ, ‘Rri! Kristi ọna,’ hayo, ‘Rri! Ọye ọ rrọ obei na,’ wha rọwo ho. 22  Keme Kristi erue gbe eruẹaro erue e rẹ te romavia a ve ti ru eware eka gbe eware igbunu re a su ahwo thọ, otẹrọnọ o rẹ lọhọ, enọ a salọ na dede. 23  Fikiere, wha muẹrohọ otọ. Mẹ vuẹ owhai eware kpobi kpahotọ no. 24  “Rekọ evaọ edẹ yena nọ uye na o tẹ vrẹ no, ọre na o re ti muebi, ọvẹre na o ti lo ho, 25  isi na i re ti kie no obọ ehru ze, egaga obọ ehru na i re ti nuhu. 26  Kẹsena a vẹ te ruẹ Ọmọ ohwo nọ ọ be nyaze evaọ ẹgho avọ ogaga gbe oruaro ulogbo. 27  O ve ti vi ikọ-odhiwu na, a ve ti koko eriẹ nọ a salọ na họ no ibienẹ ene akpọ na ze, no oka jọ orọ idhiwu na rite oka ọdekọ. 28  “Wha wuhrẹ onana no ure ifigi ze: Nọ egha eboba riẹ e tẹ nwane whẹ ebe họ no, yọ wha riẹ nọ ezi-uvo ọ kẹle no. 29  Epọvo na re, nọ wha tẹ ruẹ eware nana nọ e be via, wha riẹ nọ ọ kẹle unuẹthẹ no. 30  Uzẹme mẹ be ta kẹ owhai inọ oge ọnana ọ rẹ te vrẹ vievie he bẹsenọ eware nana kpobi e rẹ via no. 31  Odhiwu gbe otọakpọ e rẹ te vrẹ, rekọ eme mẹ e rẹ te vrẹ vievie he. 32  “Rọ kpahe ẹdẹ yena hayo auwa na, ohwo ọvo ọ riẹ hẹ, makọ ikọ-odhiwu hayo Ọmọ na rekọ Ọsẹ na. 33  Wha muẹrohọ otọ ẹsikpobi, wha jaja aro vi ẹsikpobi, keme wha riẹ oke nọ a fihọ na ha. 34  O wọhọ epaọ ọzae nọ o bi kpohọ erẹ evaọ orẹwho ofa nọ ọ nyasiọ uwou riẹ ba jẹ kẹ erigbo riẹ udu inọ a rẹrote eware riẹ, ọ kẹ rai ọvuọvo iruo riẹ, ọ tẹ ta kẹ ọnọ o re rou* unuẹthẹ na inọ ọ hai rou ẹsikpobi. 35  Fikiere, wha ruabọhọ erou, keme wha riẹ okenọ ọnọ o wo uwou na ọ te nyaze he, sọ owọwọ hayo udevie aso hayo okenọ ọkpa ọsosuọ o re ro bo hayo irioke, 36  re nọ ọ tẹ nyaze idudhe, o gbe di owhai họ owezẹ hẹ. 37  Rekọ ẹme nọ mẹ be ta kẹ owhai na, ahwo kpobi mẹ be tae kẹ: Wha ruabọhọ erou.”

Oruvẹ-Obotọ

Koyehọ, wọhọ edada eyẹ.
A jẹ hae bọ ehru iwou buobu praprarapra, yọ a jẹ hae jarai ru eware sa-sa.
Rri oria Otofa Eme.
Hayo “rroro.”