Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Mak 11:1-33

EWARE NỌ E RIẸ EVA

  • Jesu ọ ruọ Jerusalẹm avọ ẹkoyẹ obokparọ (1-11)

  • Ọ la ure ifigi eka (12-14)

  • Jesu o ru etẹmpol na fo (15-18)

  • Uwuhrẹ no ure ifigi nọ u whu na ze (19-26)

  • A nọ Jesu udu nọ o bi ro ru eware (27-33)

11  Whaọ, nọ a kẹle Jerusalẹm no, gbe Bẹtfaji avọ Bẹtani evaọ Ugbehru Olivi, o te vi ilele ivẹ riẹ uwou,  inọ: “Wha kpohọ iwhre nọ ma be kparo ruẹ na, wha tẹ nwane ruọ iwhre na, wha te ruẹ ọmọ eketekete nọ a thuru fihọ oria ọnọ ohwo ọvo ọ re keria ha rite enẹna. Wha ra ufi noi re wha rehọ iẹe ze.  Ohwo jọ ọ tẹ nọ owhai nọ, ‘Fikieme wha bi ro ru onana?’ wha rẹ ta nọ, ‘Olori na ọ gwọlọ e riẹ, yọ o ti zihe iei ze ababọ oke oraha.’”  Fikiere a tẹ nya a tẹ ruẹ ọmọ eketekete na nọ a thuru fihọ otafe unuẹthẹ evaọ iyẹrẹ, a tẹ rae.  Rekọ ahwo jọ nọ a dikihẹ etẹe a tẹ nọ ae nọ: “Fikieme wha be rọ ra ọmọ eketekete na?”  A tẹ vuẹ ae ẹme nọ Jesu ọ ta kẹ ae, a tẹ kẹ ae uvẹ.  A tẹ rehọ ọmọ eketekete na se Jesu, a te fi iwu ehru rai họ ehru riẹ, ọ tẹ keria ehru riẹ.  Ofariẹ, ahwo buobu a tẹ rehọ iwu ehru rai hwa edhere, rekọ efa a tẹ jọ akotọ edhere gbẹre eya-iriẹ rọ hwa edhere.  Ahwo nọ a jọ aro gbe enọ e jọ emu, a te je bo nọ: “Ma lẹ nọ, siwi ei! Oghale u te ọnọ ọ be rọ odẹ Jihova* nyaze! 10  Oghale u te Uvie ọsẹ mai Devidi nọ o be tha na! Ma lẹ nọ, siwi ei, O ọnọ ọ rrọ obọ odhiwu!” 11  Ọ tẹ ruọ Jerusalẹm, o te kpobọ etẹmpol na, o te bi rri eware na kpobi wariẹ, rekọ fikinọ oke u bi kpo no, ọye avọ Ikpegbivẹ na a te kpobọ Bẹtani. 12  Okiokiọ riẹ nọ a je no Bẹtani, ohọo u te je kpei. 13  Ọ tẹ jọ ugbo ruẹ ure ifigi nọ o whẹ ebe họ, ọ tẹ nya sọ ọ sae jariẹ ruẹ ubi. Rekọ nọ ọ nya te ure na, ọ jariẹ ruẹ ubi hi ajokpaọ ebe ọvo, keme o jọ ezi nọ ire ifigi e rẹ rọ mọ họ. 14  Fikiere ọ tẹ ta kẹe nọ: “Ohwo ọvo ọ rẹ gbẹ jọ ehru ra ruẹ ubi kọrọ re ofa ha.” Yọ ilele riẹ a be gaviezọ. 15  Kẹsena a te te Jerusalẹm. Ọ tẹ ruọ etẹmpol na o te mu enọ e jẹ zẹ eware gbe enọ e jẹ dẹ evaọ etẹmpol na họ ele ruọ otafe, o te gele emẹjẹ inwene-igho na kie gbe ekpala enọ e jẹ zẹ irueruẹ, 16  yọ ọ jẹ kuvẹ hẹ re ohwo jọ ọ wọ oware jọ nya etẹmpol na vrẹ. 17  O te je wuhrẹ be ta kẹ ae nọ: “Kọ a gbe kere inọ, ‘A re ti se uwou mẹ uwou olẹ rọkẹ erẹwho na kpobi’? Rekọ wha ru rie fihọ eghogho-utho iwhewheriwhe no.” 18  Ilori izerẹ na gbe otu ikere-obe na a yo onana, a tẹ jẹ gwọlọ epanọ a re ro kpei; keme ozọ riẹ u je mu ae fikinọ ewuhrẹ riẹ o bi gbe ogbotu na kpobi unu. 19  Nọ oke u bi kpo no, a te no okpẹwho na no. 20  Rekọ nọ a jẹ nyavrẹ evaọ irioke, a tẹ ruẹ ure ifigi na nọ u whu no, no otọ du ehru. 21  Pita ọ tẹ kareghẹhọ oware nọ o via ẹdẹ nọ ọ vrẹ na, ọ tẹ ta kẹe nọ: “Owuhrẹ, rri! ure ifigi nọ who duwu iyei na u whu no.” 22  Jesu ọ tẹ ta kẹ ae nọ: “Wha fi ẹrọwọ họ Ọghẹnẹ. 23  Uzẹme mẹ be ta kẹ owhai inọ ohwo kpobi nọ ọ ta kẹ ugbehru nana nọ, ‘Kparoma re whọ nyai kie fihọ abade na,’ yọ ọ jọ udu riẹ wo avro ho, rekọ o te wo ẹrọwọ inọ oware nọ ọ ta na o te via, o te via ere kẹe. 24  Oyejabọ nọ mẹ be rọ ta kẹ owhai nọ, eware kpobi nọ wha be lẹ kẹ jẹ yare, wha wo ẹrọwọ inọ i te owhai obọ no, wha ti wo ai. 25  Yọ okenọ wha be lẹ, wha rọvrẹ ohwo kpobi nọ o ru owhai thọ, re Ọsẹ rai nọ ọ rrọ obọ odhiwu ọ sae rọ izieraha rai rọvrẹ owhai.” 26  —— 27  A tẹ wariẹ ziọ Jerusalẹm. Epanọ ọ jẹ rọ nya evaọ etẹmpol na, ilori izerẹ na gbe otu ikere-obe na gbe ekpako na a tẹ nyaze 28  a tẹ nọe nọ: “Udu vẹ who bi ro ru eware nana? Hayo ono ọ kẹ owhẹ udu nọ who bi ro ru eware nana?” 29  Jesu ọ tẹ ta kẹ ae nọ: “Mẹ te nọ owhai onọ jọ. Wha tẹ kẹ omẹ uyo riẹ, mẹ te vuẹ owhai udu nọ me bi ro ru eware nana. 30  Bovẹ udu nọ Jọn ọ jẹ rọ họ ahwo ame u no ze, obọ odhiwu manikọ obọ ahwo? Wha kẹ omẹ uyo na.” 31  A te mu omoma rai họ ẹta kẹ nọ: “Ma tẹ ta nọ, ‘Obọ odhiwu,’ ọ te ta nọ, ‘Emejabọ wha gbẹ rọwo iẹe he?’ 32  Kọ ma sae dariẹ ta nọ, ‘Obọ ahwo’?” A jẹ dhozọ ogbotu na, keme aikpobi a rọwo nọ Jọn ọ jọ ọruẹaro dẹẹ. 33  Fikiere a tẹ kẹ Jesu uyo nọ: “Ma riẹ hẹ.” Jesu ọ tẹ ta kẹ ae nọ: “Mẹ be vuẹ owhai udu nọ me bi ro ru eware nana gbe he.”

Oruvẹ-Obotọ

Rri oria Otofa Eme.