Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Luk 18:1-43

EWARE NỌ E RIẸ EVA

  • Ọtadhesẹ aye-uku nọ ọ jẹ lẹ obruoziẹ na kẹse kẹse (1-8)

  • Ohwo Farisi gbe ohwo nọ o re mi osa-uzou (9-14)

  • Jesu avọ emaha na (15-17)

  • Onọ osu jọ nọ ọ rrọ ọdafe (18-30)

  • Jesu ọ wariẹ ta kpahe uwhu riẹ (31-34)

  • Ọyareware jọ nọ o tuaro o mu ude họ ẹruẹ (35-43)

18  Kẹsena ọ tẹ rehọ ọtadhesẹ jọ ta ẹme kẹ ae kpahe epanọ u ro fo re a hae lẹ kẹse kẹse, gbe re udu o siọ ae ba ewhrehe,  inọ: “Evaọ okpẹwho jọ, obruoziẹ jọ ọ jariẹ nọ ọ rẹ dhozọ Ọghẹnẹ hẹ, yọ ọ rẹ daezọ ohwo ọvo ho.  Aye-uku jọ ọ jọ okpẹwho yena re nọ ọ jẹ hae nya bru rie kẹse kẹse, be ta nọ, ‘Ruẹ nọ who bru uvioziẹ kẹ omẹ evaọ ẹdhọ nọ me wo kugbe ohwo ọdekọ na.’  Evaọ omoke jọ, ọ jẹ daezọ họ, rekọ uwhremu na ọ tẹ ta kẹ omariẹ nọ, ‘Dede nọ mẹ be dhozọ Ọghẹnẹ hẹ jẹ daezọ ohwo ọvo ho,  fikinọ aye-uku nana o bi kpokpo omẹ kẹse kẹse, mẹ te ruẹ nọ me bru uvioziẹ kẹe re o gbe dhe ẹnyẹnyaze te lẹ omẹ dọ no ho.’”  Olori na ọ tẹ ta nọ: “Wha yo ẹme nọ obruoziẹ na ọ ta dede nọ o kiẹrẹe he!  Evaọ uzẹme, kọ Ọghẹnẹ o gbe ti bruoziẹ kẹ ahwo riẹ nọ ọ salọ, enọ i bi bo sei taso tuvo, yọ o bi wo odiri kẹ ae na?  Mẹ be ta kẹ owhai nọ, o ti bruoziẹ kẹ ae vẹrẹ vẹrẹ. Rekọ nọ Ọmọ ohwo ọ te nyaze, kọ ọ te ginẹ jọ otọakpọ na ruẹ ẹrọwọ nana?”*  Ọ tẹ jẹ rehọ ọtadhesẹ nana ta ẹme kẹ otujọ nọ i rri oma rai inọ a kiẹrẹe je rri amọfa inọ a fioka ha: 10  “Ezae ivẹ jọ a kpobọ etẹmpol nyae lẹ, ọjọ ohwo Farisi ọdekọ kọ ọnọ o re mi osa-uzou. 11  Ohwo Farisi na o te dikihẹ o te muhọ ẹlẹ họ eva inọ, ‘O Ọghẹnẹ, me yere owhẹ nọ mẹ wọhọ amọfa kpobi hi—enọ i re fru amọfa re, enọ i kiẹrẹe he, ibruẹnwae—hayo wọhọ ọnana nọ o re mi osa-uzou na. 12  Mẹ rẹ siọ emuọriọ ba isiava ẹkpoka; mẹ rẹ kẹ abọvo abakpe ọrọ eware kpobi nọ me wo.’ 13  Rekọ ọnọ o re mi osa-uzou na o dikihẹ ugbo, ọ jẹ gwọlọ kpare ovao rri ehru hu, rekọ ọ jẹ tehe igbama riẹ inọ, ‘O Ọghẹnẹ, jọ ohrọ mẹ o re owhẹ, mẹ yọ ọrahauzi.’ 14  Mẹ be ta kẹ owhai nọ, nọ ọzae nana o zihe kpobọ uwou riẹ, ọ jọ aro Ọghẹnẹ kiẹrẹe vi ohwo Farisi yena. Keme ohwo kpobi nọ ọ kpare oma riẹ kpehru a re ti hrẹ riẹ kpotọ, rekọ ohwo kpobi nọ o ru oma riẹ kpotọ a rẹ te kpare iẹe kpehru.” 15  Whaọ, ahwo a jẹ rehọ emọboba rai sei re ọ rọ obọ kpahe ae, rekọ nọ ilele na a ruẹ onana, a te mu ae họ edoku. 16  Rekọ Jesu o te se emọboba na rehọ, inọ: “Wha vu emaha na wa re a nya bru omẹ ze, wha whaha ae he, keme Uvie Ọghẹnẹ o rrọ kẹ itieye na. 17  Uzẹme mẹ be ta kẹ owhai, ohwo kpobi nọ ọ jẹ Uvie Ọghẹnẹ rehọ wọhọ epaọ ọmaha ha, ọ sae ruọ Uvie na vievie he.” 18  Omọvo isu na jọ ọ tẹ nọe inọ: “Owuhrẹ owoma, eme me re ru hrọ re mẹ reuku uzuazọ ebẹdẹ bẹdẹ?” 19  Jesu ọ tẹ ta kẹe nọ: “Fikieme who ro se omẹ owoma? Ohwo ọvo o woma ha ajokpaọ omọvo, Ọghẹnẹ. 20  Whọ riẹ ijaje na: ‘Who bruẹnwae he, who kpe ohwo ho, who tho uji hi, who se isẹri ọrue he, rọ ọghọ kẹ ọsẹ ra avọ oni ra.’” 21  Ọzae na ọ tẹ ta nọ: “Me bi koko izi nana kpobi anwọ emaha mẹ ze.” 22  Nọ Jesu o yo onana, ọ tẹ ta kẹe nọ, “Oware ovo jọ u gbe kiọkọ kẹ owhẹ: Zẹ eware kpobi nọ who wo re whọ ghale igho nọ whọ rọ zẹ ai kẹ iyogbere, who ti wo efe evaọ obọ odhiwu; whọ vẹ nyaze te jọ olele mẹ.” 23  Nọ o yo eme nana, ọ tẹ vọ avọ uweri, keme o fe gaga. 24  Jesu o te rri rie, ọ tẹ ta nọ: “O te jọ bẹbẹ gaga kẹ enọ i wo igho re a ruọ Uvie Ọghẹnẹ! 25  Evaọ uzẹme, o rẹ mae lọhọ re ekamẹle ọ nya eghogho ẹguede lafi viọ ọdafe nọ ọ rẹ ruọ Uvie Ọghẹnẹ.” 26  Enọ i yo ẹme nana a tẹ ta nọ: “Kọ ono a te sai gine siwi?” 27  Ọ tẹ ta nọ: “Eware nọ ahwo a rẹ sai ru hu, Ọghẹnẹ ọ rẹ sai ru ae.” 28  Rekọ Pita ọ tẹ ta nọ: “Rri! Ma nyasiọ eware mai ba ma te lele owhẹ.” 29  Ọ tẹ ta kẹ ae nọ: “Uzẹme mẹ be ta kẹ owhai, ohwo ọvo nọ ọ nyasiọ uwou hayo aye hayo inievo-emezae hayo ọsẹgboni hayo emọ ba fiki Uvie Ọghẹnẹ 30  nọ o ti wo ai ẹko buobu evaọ oke nana ha ọ rrọ họ gbe evaọ uyero-akpọ* nọ o be tha na, uzuazọ ebẹdẹ bẹdẹ.” 31  Kẹsena o te se Ikpegbivẹ na họ akotọ, ọ tẹ ta kẹ ae nọ: “Rri! Obọ Jerusalẹm ma be nya na, yọ eware kpobi nọ a rehọ eruẹaro na kere kpahe Ọmọ ohwo i re ti rugba.* 32  Wọhọ oriruo, a te rehọ iẹe kẹ ahwo erẹwho na, a vẹ te rehọ iẹe jijehwẹ, a ti gboja kẹe je nwo eya ku ei. 33  Nọ a jẹ te fae no, a ve ti kpei, rekọ evaọ ẹdẹ avọ esa, ọ te kparoma ze.” 34  Rekọ a wo otoriẹ eme nana ha, keme a ko otofa eme na dhere ai. 35  Whaọ, nọ Jesu ọ nya kẹle Jẹriko no, yọ ọzae jọ nọ o tuaro ọ keria akotọ edhere be yare eware. 36  Nọ o yo edo ogbotu ahwo nọ a be nyavrẹ, ọ tẹ be nọ oware nọ o be via. 37  A tẹ ta kẹe nọ: “Jesu ohwo Nazarẹt na ọ be nyavrẹ na!” 38  O te bo nọ: “Jesu, Ọmọ Devidi, jọ ohrọ mẹ o re owhẹ!” 39  Enọ e jọ obaro a te bi do ku ei, be ta kẹe nọ o fibo, rekọ o te bo ga viere inọ: “Ọmọ Devidi, jọ ohrọ mẹ o re owhẹ!” 40  Jesu o te dikihẹ ọ tẹ ta nọ a rehọ ọzae na sei. Nọ o tei oma no, Jesu ọ tẹ nọe nọ: 41  “Eme whọ gwọlọ nọ me ru kẹ owhẹ?” Ọ tẹ ta nọ: “Olori, jọ mẹ wariẹ mu ude họ ẹruẹ.” 42  Jesu ọ tẹ ta kẹe nọ: “Mu ude họ ẹruẹ; ẹrọwọ ra o siwi owhẹ no.” 43  Ọ tẹ nwani mu ude họ ẹruẹ, o te mu ei họ elele be kẹ Ọghẹnẹ oruaro. Nọ ahwo na kpobi a ruẹ onana, a te jiri Ọghẹnẹ.

Oruvẹ-Obotọ

Hayo “oghẹrẹ ẹrọwọ nana.” Evaọ Griki, “ẹrọwọ na.”
Rri oria Otofa Eme.
Hayo “rugba re no.”