Kpohọ eme nọ e riẹ eva

Kpohọ oria izoẹme

Luk 14:1-35

EWARE NỌ E RIẸ EVA

  • O siwi ọzae jọ nọ o wo ẹyao ọsa evaọ Ẹdijala (1-6)

  • Romakpotọ nọ a te zizie owhẹ kpohọ oria (7-11)

  • Zizie ahwo nọ a rẹ sae hwa zihe kẹ owhẹ hẹ (12-14)

  • Ọtadhesẹ ahwo nọ a zizie nọ a je gu inoma (15-24)

  • Oware nọ o gwọlọ re a jọ olele (25-33)

  • Uwhei nọ u ku awere riẹ fiẹ (34, 35)

14  Evaọ Ẹdijala jọ, Jesu ọ nyae re emu evaọ uwou omọvo isu otu Farisi na, yọ ahwo nọ a jọ etẹe a je fiẹrohọ iẹe kiọkiọkiọ.  Rri! Ọzae jọ nọ o wo ẹyao ọsa* ọ jọ aro riẹ.  Fikiere Jesu ọ tẹ nọ enọ e riẹ Uzi na lafi gbe otu Farisi na nọ: “Kọ u fo re a siwi ohwo evaọ Ẹdijala manikọ u fo ho?”  Rekọ a kpahe ẹme he. O te kru ọzae na, o te siwi ei, ọ tẹ vuẹe inọ o kpo.  Ọ tẹ ta kẹ ae nọ: “Ono evaọ usu rai nọ ọmọ riẹ hayo eruẹ riẹ o re kie fihọ ozae nọ o re si ei noi ze vẹrẹ vẹrẹ hẹ evaọ Ẹdijala?”  A sae kpahe fihọ onọ nana ha.  Nọ ọ ruẹ ahwo nọ a zizie na nọ a be nyae keria eria nọ e mai kpehru, ọ tẹ rehọ ọtadhesẹ jọ ta ẹme kẹ ae, inọ:  “Ohwo jọ o te zizie owhẹ kpohọ ehaa orọo, whọ nyae keria oria nọ o mai kpehru hu. Ẹsejọhọ a zizie ohwo jọ nọ ọ rro vi owhẹ.  Kẹsena ọnọ o zizie owhẹ avọ ohwo yena ọ vẹ te nyaze te ta kẹ owhẹ nọ, ‘Kpama re ọzae nana ọ keria etẹe.’ Whọ vẹ te kpama avọ omovuọ nyae keria oria nọ o mai kpotọ. 10  Rekọ nọ a te zizie owhẹ, nyae keria oria nọ o mai kpotọ, re okenọ ọnọ o zizie owhẹ ọ jẹ nyaze, ọ vẹ ta kẹ owhẹ nọ, ‘Ogbẹnyusu, kpama kpohọ obehru.’ Who ve ti wo ọghọ evaọ iraro erara efa kpobi nọ a gbe zizie owhai. 11  Keme ohwo kpobi nọ ọ kpare oma riẹ kpehru a re ti hrẹ riẹ kpotọ, yọ ohwo kpobi nọ o ru oma riẹ kpotọ a rẹ te kpare iẹe kpehru.” 12  Kẹsena ọ tẹ ta kẹ ọzae nọ o zizie i rie na nọ: “Nọ who te bi zizie ahwo kẹ ẹkeriotọ emuọriọ, who du zizie egbẹnyusu ra hayo inievo ra hayo imoni ra hayo edafe he. O gbẹ rrọ ere he, a sai zizie owhẹ ẹdẹjọ re, o vẹ te jọ edhere nọ a rọ hwa zihe kẹ owhẹ. 13  Rekọ nọ who te bi se ehaa, zizie iyogbere, enọ e ko, emo, gbe enọ i tuaro; 14  who ti wo evawere keme a wo oware ovo nọ a te rọ hwa zihe kẹ owhẹ hẹ. Keme a rẹ te hwosa kẹ owhẹ evaọ ẹkparomatha ikiẹrẹe na.” 15  Nọ omọvo enọ a zizie na o yo eme nana, ọ tẹ ta kẹe nọ: “Eva e were ọnọ ọ te re emu* evaọ Uvie Ọghẹnẹ.” 16  Jesu ọ tẹ ta kẹe nọ: “Ọzae jọ o se ehaa emuọriọ ologbo, o te zizie ahwo buobu. 17  Nọ oke emuọriọ na u te, o te vi ọrigbo riẹ re ọ nyae ta kẹ enọ o zizie na nọ, ‘Wha nyaze, keme a ruẹrẹ eware kpobi họ no.’ 18  Rekọ aikpobi a te mu inoma họ egu. Ọrọ ọsosuọ ọ ta kẹe nọ, ‘Mẹ dẹ udhu yọ o gwọlọ nọ mẹ rẹ nyai rri rie; ivie, mẹ te sae nyaze he.’ 19  Ọfa ọ ta nọ, ‘Mẹ dẹ iruẹ ikpe yọ mẹ be nyai rri epanọ e rrọ; ivie, mẹ te sae nyaze he.’ 20  Ọfa ọ tẹ jẹ ta nọ, ‘Mẹ nwane rọo obọ, fikiere mẹ te sae nyaze he.’ 21  Ọrigbo na ọ tẹ nyaze ọ tẹ vuẹ olori riẹ eware nana kpobi. Eva e tẹ dha olori uwou na, ọ tẹ ta kẹ ọrigbo riẹ nọ, ‘Nya vẹrẹ vẹrẹ kpohọ iyẹrẹ gbe oko-ore okpẹwho na re who se iyogbere gbe enọ e ko gbe enọ i tuaro gbe emo ze.’ 22  Nọ omoke jọ o vrẹ no, ọrigbo na ọ tẹ ta nọ, ‘Olori, me ru epanọ whọ ta na no, rekọ uwou na o re vọ ghele he.’ 23  Fikiere olori na ọ tẹ ta kẹ ọrigbo na nọ, ‘Nya kpobọ idhere na gbe oko-ore na, whọ vẹ gba ahwo nọ whọ ruẹ họ re a nyaze re uwou mẹ o sae vọ. 24  Keme mẹ be ta kẹ owhai nọ, ohwo ọvo evaọ usu ahwo yena nọ a zizie na o ti dhunu te emu mẹ hẹ.’” 25  Whaọ, ogbotu obuobu a je lele iei, o te kuomarẹriẹ ọ tẹ ta kẹ ae nọ: 26  “Otẹrọnọ ohwo jọ ọ nya bru omẹ ze o gbe mukpahe* ọsẹ, oni, aye, emọ, inievo-emezae, gbe inievo-emetẹ riẹ hẹ, ẹhẹ, makọ omobọ riẹ* dede, ọ sae jọ olele mẹ hẹ. 27  Ohwo kpobi nọ ọ wọ ure-oja* riẹ je lele omẹ hẹ ọ sae jọ olele mẹ hẹ. 28  Wọhọ oriruo, ono evaọ usu rai ọ rẹ gwọlọ bọ uwou nọ ọ rẹ kake keria tao ho re o roro araha na sọ ugho riẹ u ti tei bọe re? 29  O gbẹ rrọ ere he, ọ sae wọ otọhotọ uwou na họ rekọ ọ sae bọe re he, kẹsena ahwo kpobi nọ a be ruẹ e riẹ a ve mu ei ẹkoko họ ese, 30  inọ: ‘Ọzae nana o mu uwou họ ẹbọ rekọ ọ sae bọe re he.’ 31  Hayo kọ ovie vẹ nọ ọ be nyae za ovie ọfa dhe evaọ ẹmo ọ rẹ kake keria tao ho re o lele ekiroro riẹ jiroro sọ ọ te sae rehọ egbaẹmo idu ikpe (10,000) họre ovie ọdekọ nọ ọ wha egbaẹmo idu udhe (20,000) ze te họre iẹe? 32  Otẹrọnọ ọ te sae họre iẹe he, nọ ovie ọdekọ na ọ gbẹ rrọ ugbothabọ na, o ve vi enyukọ nyae lẹe inọ ọ gwọlọ udhedhẹ. 33  Ere ọvona re, jọ wha riẹ vevẹ inọ ohwo kpobi evaọ usu rai nọ ọ kpairoro vrẹ eyero riẹ kpobi hi ọ sae jọ olele mẹ hẹ. 34  “Uzẹme riẹ họ, uwhei u woma. Rekọ otẹrọnọ uwhei u te ku awere riẹ fiẹ, kọ eme a sae rọ wariẹ ru ei were? 35  U re wo iruo kẹ otọ na ha. Ahwo a re ku ei fiẹ. Jọ ọnọ o wo ezọ nọ o re ro yo, o yo.”

Oruvẹ-Obotọ

Hayo “ẹyao ọlọlọhọ,” ẹyao nọ o rẹ lẹliẹ oria jọ evaọ oma na sohọ hayo fu.
Evaọ Griki, “re ebrẹdi.”
Hayo “you omẹ vi.”
Hayo “uzuazọ obọriẹ.”
Rri oria Otofa Eme.