Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Luk 13:1-35

EWARE NỌ E RIẸ EVA

  • Wha kurẹriẹ hayo a te raha owhai (1-5)

  • Ọtadhesẹ ure ifigi nọ o mọ ibi hi (6-9)

  • O siwi aye nọ o zulẹ evaọ Ẹdijala (10-17)

  • Etadhesẹ ubi mọstad gbe ẹvi na (18-21)

  • O gwọlọ omodawọ re a rọ unuẹthẹ ohwahwa na ruọ eva (22-30)

  • Herọd “uruakọ yena” (31-33)

  • Jesu o weri kẹ Jerusalẹm (34, 35)

13  Evaọ oke yena, ahwo jọ nọ a jọ etẹe a tẹ vuẹe kpahe ahwo Galili nọ Pailet o kpe okenọ a je dhe idhe.  Ọ tẹ kpahe kẹ ae nọ: “Kọ wha roro nọ ahwo Galili yena a mae rrọ erahaizi vi ahwo Galili efa kpobi fikinọ oware nana o via kẹ ae?  Ijo, mẹ be ta kẹ owhai nọ; rekọ wha gbe kurẹriẹ hẹ, ere ọvona whai kpobi wha ti whu re.  Hayo ahwo ikpegberee nọ uwou ukpehru Siloam u kie ruru, u je kpe ai no, kọ wha roro nọ ae a mai yoma vi amọfa kpobi nọ a be rria Jerusalẹm?  Ijo, mẹ be ta kẹ owhai nọ, wha gbe kurẹriẹ hẹ, whai kpobi wha ti whu, wọhọ epanọ a whu na.”  Kẹsena ọ tẹ rehọ ọtadhesẹ nana ta ẹme inọ: “Ọzae jọ ọ kọ ure ifigi họ ọgbọ riẹ, ọ tẹ nyaze be gwọlọ ubi evaọ ehru riẹ rekọ ọ ruẹ hẹ.  Ọ tẹ ta kẹ ọruẹrẹ-ọgbọ na nọ, ‘Anwọ ikpe esa na mẹ be rọ nyaze te gwọlọ ubi evaọ ure ifigi nana, rekọ mẹ re ruẹ ubi ovo ho. Koi fihọ otọ! Kọ fikieme o jẹ raha otọ na kufiẹ?’  Ọ tẹ ta kẹe nọ, ‘Olori, nyase iẹe ba ukpe ọvo ofa re mẹ tọe wariẹ jẹ whẹ ẹkpẹ ezuzu fihọ iẹe.  O tẹ mọ ubi evaọ obaro, yọ u woma; rekọ o gbẹ mọ họ, who ve koi fihọ otọ.’” 10  Whaọ ọ jọ uwou-egagọ jọ je wuhrẹ ahwo evaọ Ẹdijala. 11  Rri! Aye jọ ọ jọ etẹe nọ ẹzi ogbegbe o fou họ ẹyao anwọ ikpe ikpegberee; yọ o zulẹ, ọ rẹ sai dikihẹ kpomavi vievie he. 12  Nọ Jesu ọ ruẹ e riẹ, ọ tẹ ta kẹe nọ: “Aye, jọ ẹyao ra na o kpo.” 13  Ọ tẹ rọ obọ kpahe iẹe, ẹsiẹvo na o te dikihẹ kpọvi o te mu Ọghẹnẹ họ ejiri. 14  Rekọ eva e tẹ dha ọnọ o wuzou evaọ uwou-egagọ na fikinọ Jesu o siwi ohwo evaọ Ẹdijala, ọ tẹ ta kẹ ogbotu na nọ: “Edẹ ezeza u fo nọ a re ro ru iruo; fikiere wha hae nyaze re o siwi owhai evaọ edẹ yena, orọnikọ evaọ ẹdẹ Ẹdijala ha.” 15  Rekọ Olori na ọ tẹ kpahe kẹe nọ: “Whai eviẹwẹ, kọ whai omomọvo ọ gbẹ be hae ra eruẹ hayo eketekete riẹ evaọ Ẹdijala o ve su ei vrẹ nyae da ame? 16  Kọ u gbe fo re a si aye nana nọ ọ rrọ ọmọ Abraham, ọnọ Setan ọ be lahiẹ anwọ ikpe ikpegberee na no igbo nana evaọ ẹdẹ Ẹdijala?” 17  Nọ ọ ta eme nana, oma u te mu enọ e jẹ wọso ẹe kpobi họ ẹvo, rekọ ogbotu na soso a te muhọ ẹghọghọ fiki eware urirẹ nọ o ru. 18  Fikiere, ọ tẹ ta nọ: “Eme Uvie Ọghẹnẹ o wọhọ, kọ eme mẹ sae rọ wawo iẹe? 19  O wọhọ ubi mọstad, onọ ọzae jọ ọ rehọ ọ tẹ kọe fihọ ọgbọ riẹ, o tẹ dhẹze je zihe ruọ ure, evra ehru e tẹ bọ iwou fihọ egha riẹ.” 20  Ọ tẹ jẹ ta nọ: “Kọ eme mẹ sae rọ wawo Uvie Ọghẹnẹ? 21  O wọhọ ẹvi nọ aye ọ gua kugbe eka nọ a wuhu nọ e rẹ vọ owawo-eka ilogbo esa bẹsenọ u ro ru ukulu eka na soso fu.” 22  O te je no ẹwho ruọ ẹwho, je no iwhre ruọ iwhre, bi wuhrẹ ahwo nọ o bi kpohọ Jerusalẹm na. 23  Ọzae jọ ọ tẹ nọe nọ: “Olori, kọ ahwo nọ a ti siwi a rrọ kakao?” Ọ tẹ ta kẹ ogbotu na nọ: 24  “Wha dawo ẹgba rai kpobi re wha rehọ unuẹthẹ ohwahwa na ruọ eva, keme mẹ be ta kẹ owhai nọ, ibuobu e te gwọlọ ruọ eva rekọ a te sae ruọ eva ha. 25  Nọ ọnọ o wo uwou na ọ tẹ kpama nyae kare ẹthẹ na no, wha ve ti dikihẹ otafe bi kporo ẹthẹ na be ta nọ, ‘Olori, rovie kẹ omai.’ Rekọ ọ vẹ te ta kẹ owhai nọ: ‘Mẹ riẹ obonọ wha no ze he.’ 26  Kẹsena wha vẹ te ta nọ, ‘Ma re jẹ da evaọ aro ra, yọ who je wuhrẹ ahwo evaọ oko-ore ẹwho mai.’ 27  Rekọ ọ vẹ te ta kẹ owhai nọ, ‘Mẹ riẹ obonọ wha no ze he. Wha no etenẹ no, whai irumuomu!’ 28  Etẹe wha te jọ vioja jẹ reakọ, nọ wha te ruẹ Abraham, Aiziki, Jekọp, gbe eruẹaro na kpobi evaọ Uvie Ọghẹnẹ rekọ a gbolo owhai fihọ otafe. 29  Ofariẹ, ahwo a ti no obọ ovatha-ọre gbe ukiediwo-ọre gbe ẹkpẹlobọ ovatha-ọre gbe obọze ovatha-ọre ze, a vẹ te keria wariẹ emẹjẹ họ evaọ Uvie Ọghẹnẹ. 30  Rri! Otujọ nọ e rrọ erọ urere e te jọ erọ ọsosuọ, ejọ nọ e rrọ erọ ọsosuọ e te jọ erọ urere.” 31  Evaọ auwa yena, otu Farisi na jọ a tẹ nyaze, a tẹ ta kẹe nọ: “Nyavrẹ, no etenẹ no keme Herọd ọ be gwọlọ owhẹ kpe.” 32  Ọ tẹ ta kẹ ae nọ: “Wha nyae vuẹ uruakọ yena nọ, ‘Rri! Me bi le idhivẹri no ahwo oma je bi siwi ahwo nẹnẹ gbe odẹnotha, evaọ ẹdẹ avọ esa yọ me ru no.’ 33  Oghẹrẹ kpobi kẹhẹ, mẹ rẹ ruabọhọ onya mẹ nẹnẹ, odẹnotha gbe okiokiọ riẹ keme o rẹ sae via ha* inọ a rẹ jọ oria ofa kpe ọruẹaro u te no evaọ Jerusalẹm no. 34  Jerusalẹm, Jerusalẹm, ọnọ o re kpe eruẹaro na jẹ rọ itho fi enọ a vi sei; unuẹse buobu mẹ jẹ gwọlọ koko emọ ra họ epanọ ovu o re koko emọ riẹ họ otọ ibekpe riẹ! Rekọ wha rọwo ho. 35  Rri! A siọ uwou rai ba kẹ owhai no. Mẹ be ta kẹ owhai nọ, wha te gbẹ ruẹ omẹ ofa vievie he bẹsenọ wha rẹ ta nọ: ‘Oghale u te ọnọ ọ be rọ odẹ Jihova* nyaze!’”

Oruvẹ-Obotọ

Hayo “o rẹ kake via ha.”
Rri oria Otofa Eme.