Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Luk 12:1-59

EWARE NỌ E RIẸ EVA

  • Ẹvi otu Farisi (1-3)

  • Dhozọ Ọghẹnẹ, orọnikọ ahwo ho (4-7)

  • Rọwo Kristi evaọ aro ahwo (8-12)

  • Ọtadhesẹ ọdafe ogheghẹ na (13-21)

  • Siọ awa ba ẹruọ (22-34)

    • Uthuru okakao (32)

  • Ruabọhọ erou (35-40)

  • Orieyero nọ a re fievahọ gbe ọnọ a re fievahọ họ (41-48)

  • Udhedhẹ mẹ nyaze ti fihọ akpọ họ, rekọ ohẹriẹ (49-53)

  • O gwọlọ nọ a rẹ kiẹ otọ oke na (54-56)

  • Jọ edhere ruẹrẹhọ kugbe ọnọ o tu owhẹ ẹdhọ (57-59)

12  Evaọ oke yena, nọ ogbotu ahwo nọ a bu te idu buobu a kokohọ te epanọ a je ro thihi ohwohwo, ọ tẹ kake ta kẹ ilele riẹ nọ: “Wha muẹrohọ otọ kẹ ẹvi* otu Farisi na, onọ o rrọ eviẹhọ.  Rekọ oware ovo nọ a nabe kodhere nọ o te bẹre via ha o rrọ họ, yọ oware ovo nọ u dhere nọ a te riẹ hẹ o rrọ họ.  Fikiere, ẹme kpobi nọ wha be jọ oria nọ u dhere ta, a ti yoi evaọ ẹgbede, gbe ẹme nọ wha lẹlẹ ta evaọ iwou rai a ti whowho iei evaọ ehru iwou.  Ofariẹ, mẹ be ta kẹ owhai egbẹnyusu mẹ inọ, wha dhozọ enọ i re kpe ugboma na ha, nọ a te ru ere no a gbẹ sai ru vrẹ ere he.  Rekọ me ti dhesẹ ọnọ wha rẹ dhozọ riẹ kẹ owhai: Wha dhozọ Ọnọ ọ rẹ sai kpe ugboma na je wo udu nọ o re ro gbolo iei fihọ Gehena.* Ẹhẹ, mẹ be ta kẹ owhai nọ, wha dhozọ Ọnana.  Ibiugho esese ivẹ* a be zẹ imuedi isoi, o gbẹ rrọ ere? Ghele na, ọvuọvo rai ọ rẹ thọrọ Ọghẹnẹ ẹro ho.*  Rekọ ọ tubẹ riẹ unu ibieto kpobi nọ e rrọ uzou rai. Ozọ u mu owhai hi; wha ghare vi imuedi buobu.  “Mẹ be ta kẹ owhai nọ, ohwo kpobi nọ ọ rọwo omẹ evaọ aro ahwo, Ọmọ ohwo ọ te rọwo iẹe re evaọ aro ikọ-odhiwu Ọghẹnẹ.  Rekọ ohwo kpobi nọ ọ se omẹ evaọ aro ahwo, mẹ te se iẹe evaọ aro ikọ-odhiwu Ọghẹnẹ. 10  Yọ ohwo kpobi nọ ọ ta ẹme mukpahe Ọmọ ohwo, a te rọvrẹ riẹ, rekọ ohwo kpobi nọ ọ be ta eme-aghọ mukpahe ẹzi ọfuafo na a te rọvrẹ riẹ hẹ. 11  Nọ a tẹ rehọ owhai ziọ aro ogbotu ahwo,* ahwo egọmeti, gbe aro isu, wha du ruawa oghẹrẹ nọ wha te rọ ta ẹme hayo ẹme nọ wha te ta ro gu ẹkẹ-unu rai hi, 12  keme ẹzi ọfuafo na o ti wuhrẹ owhai evaọ auwa yena eme nọ wha rẹ ta.” 13  Kẹsena ohwo jọ evaọ ogbotu na ọ tẹ ta kẹe nọ: “Owuhrẹ, ta kẹ oniọvo mẹ re ọ ghale uku ọsẹ mai re ọvuọ ẹkẹ riẹ ọ rehọ.” 14  Jesu ọ tẹ ta kẹe nọ: “Ọzae, ono ọ rehọ omẹ mu obruoziẹ kẹ owhai imava?” 15  Ọ tẹ ta kẹ ae nọ: “Wha muẹrohọ otọ jẹ yọroma kẹ oghẹrẹ uvou-uthei* kpobi keme ohwo ọ tẹ maki wo eware buobu, eware na e rẹ kẹe uzuazọ họ.” 16  Ọ tẹ rehọ ọtadhesẹ jọ ta ẹme kẹ ae, inọ: “Ekakọ ọdafe jọ e mọ ziezi. 17  Fikiere ọ tẹ be jọ udu riẹ roro nọ, ‘Enẹna nọ me gbe wo oria nọ me re koko ivuẹvu mẹ fihọ họ na, kọ eme me re ru?’ 18  Ọ tẹ ta nọ, ‘Enẹ me ti ru: Me ti kporo iwou nọ mẹ rẹ jọ rawo eware fihọ otọ mẹ vẹ bọ ilogbo, kọ etẹe me re koko eka mẹ kpobi gbe eware mẹ kpobi fihọ, 19  mẹ vẹ ta kẹ omamẹ nọ: “Who wo emamọ eware buobu nọ who kokohọ no kẹ ikpe buobu nọ e be tha; who gbe du ruawa ha, re, da, reakpọ kuoma.”’ 20  Rekọ Ọghẹnẹ ọ tẹ ta kẹe nọ, ‘Ogheghẹ, aso nana a ti mi owhẹ uzuazọ ra no. Kọ ono o ti wo eware nọ who kokohọ na?’ 21  Ere o rẹ jọ kẹ ohwo nọ o koko efe họ kẹ omobọ riẹ rekọ nọ o fe evaọ obọ Ọghẹnẹ hẹ.” 22  Ọ tẹ ta kẹ ilele riẹ nọ: “Oyejabọ mẹ be rọ ta kẹ owhai nọ: Wha siọ awa ba ẹruọ kpahe uzuazọ rai fiki onọ wha rẹ re hayo kpahe ugboma rai fiki oware nọ wha re kuhọ. 23  Keme uzuazọ o ghare vi emu, yọ ugboma o ghare vi iwu. 24  Wha roro kpahe ekọlọbe: A rẹ kọ ibi hayo vu hu; a wo eru hayo uwou nọ a rẹ jọ rawo eware he; ghele na, Ọghẹnẹ ọ be kuọ ae. Kọ wha gbẹ ghare gaga vi evra? 25  Ono evaọ usu rai ọ rẹ sae rọ fiki awaọruọ fi omoke jọ ba uzuazọ riẹ? 26  Kọ otẹrọnọ wha sai ru oware okakao utioye he, kọ fikieme wha jẹ ruawa kpahe eware edekọ na? 27  Wha roro kpahe epanọ idodo obọ ẹwọ e be rọ rro: A re kporo udhu hayo ko iwu hu; rekọ mẹ be ta kẹ owhai nọ makọ epanọ Solomọn o fe te, ọ gẹgọ woma te idodo nana ọvuọvo ho. 28  Whaọ otẹrọnọ Ọghẹnẹ ọ be gọ ododo obọ ẹwọ ẹgọ te enẹ, onọ o rrọ nẹnẹ odẹnotha a ve gbolo iei fihọ erae, kọ ọ gbẹ sae gọ owhai ẹgọ viere, whai nọ i wo ẹrọwọ ọkakao! 29  Fikiere, wha siọ awa ba ẹruọ kpahe emu nọ wha te re gbe onọ wha te da, wha siọ awaọruọ ọgaga ba; 30  keme enana kpobi họ eware nọ erẹwho akpọ na a bi le kiti kiti, rekọ Ọsẹ rai ọ riẹ nọ eware nana e roja kẹ owhai. 31  Ukpoye, wha ruabọhọ gwọlọ Uvie riẹ, o ti fi eware nana ba kẹ owhai. 32  “Ozọ u mu owhai hi, uthuru okakao, keme o ruọ Ọsẹ rai no inọ ọ rẹ kẹ owhai Uvie na. 33  Wha zẹ eware rai, re wha kẹ ekẹ ohrọ.* Wha ko emekpa nọ e rẹ raha ha nọ wha re fi igho rai họ, koyehọ, efe nọ ọ rẹ raha ha evaọ obọ odhiwu, oria nọ uvumọ oji ọ rẹ kẹle he, yọ uvumọ amara ọ rẹ jọ raha eware he. 34  Keme oria nọ efe rai ọ rrọ, etẹe udu rai o rẹ jọ re. 35  “Wha ku iwu rai họ jẹ ruẹrẹ oma kpahe,* jọ ikpẹ rai e hai lo, 36  wha jọ wọhọ erigbo nọ e be hẹrẹ olori rai nọ o kpohọ ehaa orọo, re nọ ọ tẹ nyaze je kporo ẹthẹ, a vẹ nwani rovie kẹe. 37  Eva e were erigbo yena nọ Olori rai ọ nyaze di họ bi rou!* Uzẹme mẹ be ta kẹ owhai, o ti ku ewu iruo họ ọ vẹ ta kẹ ae nọ a keria re a re emu, ọ vẹ gbodibo kẹ ae. 38  Yọ otẹrọnọ ọ nyaze evaọ etoke iroi avọ ivẹ,* hayo makọ ọrọ avọ esa* o je di ae họ nọ a ruẹrẹ oma kpahe, eva e rẹ were ai! 39  Rekọ wha riẹ onana, o hae jọnọ ọnọ o wo uwou na ọ riẹ auwa nọ oji na ọ te rọ nyaze, ọ hae kuvẹ hẹ re o kporo uwou riẹ ruọ eva. 40  Whai omarai wha ruẹrẹ oma kpahe re keme evaọ auwa nọ wha roro ho oye Ọmọ ohwo ọ te rọ nyaze.” 41  Pita ọ tẹ ta nọ: “Olori, mai whọ be rehọ ọtadhesẹ nana ta ẹme kẹ manikọ te ahwo kpobi re?” 42  Olori na ọ tẹ ta nọ: “Ginọ ono họ orieyero* nọ a re fievahọ na, ọnọ o wo areghẹ, ọnọ Olori riẹ o ro mu inọ ọ rẹrote idibo uwou riẹ, re ọ rehọ emu kẹ ae evaọ ẹruoke? 43  Eva e were ọrigbo yena otẹrọnọ olori riẹ ọ nyaze di ei họ ere oruo! 44  Uzẹme mẹ be ta kẹ owhai, ọ te rehọ iẹe mu ọnọ ọ rẹ rẹrote eyero riẹ kpobi. 45  Rekọ otẹrọnọ ọrigbo yena ọ rẹ jọ udu riẹ ta nọ, ‘Olori mẹ o lehie ẹnyaze no,’ o je muọ idibo ezae gbe erọ eyae na họ ekpe, jẹ be re jẹ da, jẹ da vrẹ oma, 46  olori ọrigbo yena ọ te nyaze evaọ ẹdẹ nọ o bi rẹro riẹ hẹ gbe auwa nọ ọ riẹ hẹ, ọ vẹ te kẹe uye nọ o mae ga je fi ei họ kugbe enọ i yoẹme he. 47  Kẹsena ọrigbo yena nọ ọ riẹ oreva olori riẹ rekọ nọ ọ ruẹrẹ oma kpahe he hayo nọ o ru oware nọ ọ ta* ha na, a te fae eviaviẹ buobu. 48  Rekọ ọnọ o wo otoriẹ oreva olori riẹ hẹ, ghele na o ru eware nọ a rẹ rọ fae eviaviẹ, a te fae umutho eviaviẹ. Evaọ uzẹme, ohwo kpobi nọ a kẹ buobu, a te jọ obọ riẹ gwọlọ buobu, yọ ọnọ a ro mu ọnowuzou eware buobu, a te jọ obọ riẹ gwọlọ buobu. 49  “Mẹ nyaze ti tu erae họ otọakpọ na, kọ eme ọfa mẹ gbẹ gwọlọ otẹrọnọ erae na i muhọ ẹware no? 50  Evaọ uzẹme, me wo ame-ọhọ jọ nọ a be te họ omẹ, yọ mẹ be ruawa gaga bẹsenọ u re rugba no! 51  Kọ wha bi roro nọ mẹ nyaze ti fi udhedhẹ họ otọakpọ na? Ijo, ukpoye mẹ be ta kẹ owhai nọ, ohẹriẹ. 52  Keme no enẹna vrẹ, ohẹriẹ o te jọ udevie imasoi nọ e rrọ uwou ovo, imasa e te wọso imava, imava e te wọso imasa. 53  A te wọso ohwohwo, ọsẹ ọ te wọso ọmọzae riẹ, ọmọzae ọ te wọso ọsẹ riẹ, oni ọ te wọso ọmọtẹ riẹ, ọmọtẹ ọ te wọso oni riẹ, oniọrọo ọ te wọso aye ọmọ riẹ, aye ọ te wọso oniọrọo riẹ.” 54  Kẹsena ọ tẹ ta kẹ ogbotu na re nọ: “Nọ wha tẹ ruẹ ehru nọ o bi evaọ obọ ukiediwo-ọre, wha rẹ nwane ta nọ, ‘Okposo ọ be te rrọ,’ yọ ere o rẹ via. 55  Nọ wha tẹ ruẹ ofou nọ o bi fou no obọze ovatha-ọre ze, wha rẹ ta nọ, ‘Ẹrrorro ọ te jọ gaga,’ yọ ere o rẹ via. 56  Whai eviẹwẹ, wha riẹ oghẹrẹ nọ wha rẹ rọ kiẹ otọ epanọ otọakpọ gbe ovao ehru e rrọ, kọ ẹvẹ wha gbẹ rọ riẹ epanọ wha rẹ rọ kiẹ otọ uzedhe oke nana ha? 57  Kọ fikieme wha gbẹ be sai vuhu oware nọ u kiẹrẹe kẹ omarai hi? 58  Wọhọ oriruo, nọ whẹ avọ ohwo nọ o tu owhẹ ẹdhọ wha te bi kpobọ osu, nọ wha rrọ edhere na, daoma ruẹrẹhọ kugbei re ọ siọ owhẹ ba ẹrehọ kẹ obruoziẹ na, obruoziẹ na ọ vẹ rehọ owhẹ kẹ alakpa okọto, o ve gbolo owhẹ fihọ uwou-odi. 59  Mẹ be ta kẹ owhẹ nọ, who ti no etẹe ze he bẹsenọ whọ rẹ hwa ubiugho osese urere nọ who wo no.”*

Oruvẹ-Obotọ

Koyehọ, iyisti nọ a re ro ru ebrẹdi nọ u re ru ei fu.
Rri oria Otofa Eme.
Evaọ Griki, “assarions ivẹ.”
Hayo “Ọghẹnẹ o re gbabọkẹ ọvuọvo rai hi.”
Hayo “uwou-egagọ.”
Hayo “urusio oware omọfa.”
Hayo “kẹ iyogbere okẹ.”
Evaọ Griki, “Wha rehọ ohọ mu eku rai.”
Hayo “rroro.”
No oware wọhọ ighọjọ izii aso rite ighọjọ ikpegbivẹ. Rri eme-obotọ Mt 14:25.
No oware wọhọ ighọjọ ikpegbivẹ aso rite ighọjọ esa. Rri eme-obotọ Mt 14:25.
Hayo “ọnọ ọ rẹ rẹrote iruẹru uwou.”
Hayo “ru oreva riẹ.”
Evaọ Griki, “lẹpta urere.” Rri “Lẹpta” evaọ oria Otofa Eme.