Kpohọ eme nọ e riẹ eva

Kpohọ oria izoẹme

Luk 11:1-54

EWARE NỌ E RIẸ EVA

  • Oghẹrẹ nọ a rẹ lẹ (1-13)

    • Olẹ oriruo (2-4)

  • Uziobọ Ọghẹnẹ o ro le idhivẹri no (14-23)

  • Nọ ẹzi ogbegbe o te zihe ze (24-26)

  • Uvi evawere (27, 28)

  • Oka Jona (29-32)

  • Ukpẹ oma na (33-36)

  • Uye u te egegagọ eviẹwẹ (37-54)

11  Whaọ, Jesu ọ jọ oria jọ jẹ lẹ, nọ o kuhọ no, olele riẹ jọ ọ tẹ ta kẹe nọ: “Olori, wuhrẹ omai epanọ a rẹ lẹ, wọhọ epanọ Jọn o wuhrẹ ilele riẹ na.”  Fikiere, ọ tẹ ta kẹ ae nọ: “Oke kpobi nọ wha tẹ be lẹ, wha ta nọ: ‘Ọsẹ, jọ odẹ ra o jọ fuafo. Jọ Uvie ra o ze.  Kẹ omai emu okpẹdoke mai kẹdẹ kẹdẹ.  Jẹ rehọ izieraha mai rọvrẹ omai, keme ma be rọvrẹ ohwo kpobi nọ o ru omai thọ* re; yọ who su omai ruọ odawọ họ.’”*  Kẹsena ọ tẹ ta kẹ ae nọ: “Ma rehọ iẹe nọ whai ọjọ o wo ogbẹnyusu, whọ tẹ nya bru rie evaọ udevie aso jẹ ta kẹe nọ, ‘Ogbẹnyusu, momo ikulu ebrẹdi esa kẹ omẹ,  keme ogbẹnyusu mẹ jọ ọ nyaze te kpahe omẹ obọnana yọ me wo uvumọ oware nọ mẹ rẹ rọ ghọe he.’  Rekọ ogbẹnyusu ra na ọ tẹ jọ obeva uwou kpunu nọ: ‘Siọ omẹ ba ekpokpo. A kare ẹthẹ na no, yọ emọ mẹ a kiẹzẹ kugbe omẹ evaọ ehwa. Mẹ sae kpama kẹ owhẹ oware ovo ho.’  Mẹ be ta kẹ owhai nọ, ọ gbẹ make rọ fiki egbẹnyusu nọ a rrọ kpama re ọ kẹe oware jọ họ, ọ te kpama jẹ kẹe oware kpobi nọ ọ gwọlọ fikinọ ọ gbaudu ruabọhọ bi kporo ẹthẹ na.  Fikiere, mẹ be ta kẹ owhai nọ, wha ruabọhọ ẹyare, a te kẹ owhai; wha ruabọhọ ẹgwọlọ, wha te ruẹ; wha ruabọhọ ekporo, a ti rovie kẹ owhai. 10  Keme ohwo kpobi nọ ọ be yare, a rẹ kẹe, ohwo kpobi nọ ọ be gwọlọ, ọ rẹ ruẹ, yọ ohwo kpobi nọ o bi kporo, a ti rovie kẹe. 11  Evaọ uzẹme, ọsẹ vẹ evaọ usu rai ọmọ riẹ ọ rẹ yare eri, ọ vẹ rehọ araomuomu kẹe viukpọ eri? 12  Hayo ọ tẹ yare eke-arifẹ, ọ vẹ rehọ ọwhọhro-omuomu kẹe? 13  Fikiere, otẹrọnọ whai nọ wha rrọ erahaizi wha riẹ epanọ wha rẹ rehọ emamọ eware kẹ emọ rai, ẹvẹ Ọsẹ na nọ ọ rrọ obọ odhiwu ọ rẹ rehọ ẹzi ọfuafo kẹ enọ e be yare iẹe te!” 14  Oke ofa riẹ, o le idhivẹri nọ o ru ọzae jọ dienu noi oma. Nọ idhivẹri na o noi oma no, ọzae nọ o dienu na o te mu ẹme họ ẹta, u te gbe ogbotu na unu. 15  Rekọ ejọ rai a tẹ ta nọ: “Ogaga Beelzebọb,* osu idhivẹri na, o bi ro le idhivẹri na no.” 16  Rekọ, amọfa a jẹ gwọlọ dawo iẹe, a tẹ be ta kẹe nọ o dhesẹ oka jọ no odhiwu ze. 17  Fikinọ ọ riẹ iroro rai, ọ tẹ ta kẹ ae nọ: “Uvie kpobi nọ ahwo a be jọ họre omoma rai u re kie, yọ uviuwou kpobi nọ a be jọ họre u re kie. 18  Epọvo na re, otẹrọnọ Setan ọ be họre omobọ riẹ, kọ ẹvẹ uvie riẹ o sai ro dikihẹ? Keme wha be ta nọ ogaga Beelzebọb me bi ro le idhivẹri no. 19  Otẹrọnọ ogaga Beelzebọb me bi ro le idhivẹri no, kọ ogaga ono ahwo rai a bi ro le ai no? Fiki onana ahwo obọrai a ti brukpe owhai. 20  Rekọ, otẹrọnọ ẹkwoma uziobọ Ọghẹnẹ me bi ro le idhivẹri na no, kiyọ Uvie Ọghẹnẹ o ginẹ vrẹ owhai no. 21  Nọ ọgba nọ o wo ekwakwa-ẹmo ziezi o te bi rou* ighẹ riẹ, eyero riẹ e rẹ jọ gbẹsinẹdẹ. 22  Rekọ ohwo nọ ọ ga vi ei ọ tẹ nya bru rie je fi ei kparobọ, ohwo yena ọ rẹ kwa ekwakwa-ẹmo riẹ kpobi nọ ọ jẹ rẹroso na vrẹ, ọ vẹ ghale eware nọ ọ kwa mi ei kẹ amọfa. 23  Ohwo kpobi nọ ọ rrọ abọ mẹ hẹ yọ o mukpahe omẹ, yọ ohwo kpobi nọ o bi kuomagbe omẹ koko ahwo họ họ, o bi le ahwo no omẹ oma. 24  “Nọ ẹzi ogbegbe o te no ohwo oma, ọ rẹ nya eria nọ ame ọ rrọ họ be gwọlọ oria eriosehọ, ọ gbẹ ruẹ hẹ ọ vẹ ta nọ, ‘Me re zihe kpobọ uwou mẹ nọ me no ze.’ 25  Nọ o te te etẹe, ọ jẹ ruẹ nọ a hwere uwou na fihọ fuafo jẹ whẹ erru họ iẹe, 26  ọ vẹ nyavrẹ je zizie izi ihrẹ efa nọ i yoma vi ei kugbe oma, nọ a tẹ ruọ uwou na, a vẹ be rria etẹe. Uyero ohwo yena u ve yoma vi epaọ ọsosuọ.” 27  Nọ ọ jẹ ta eme nana, aye jọ evaọ ogbotu na ọ tẹ kpare urru ta kẹe nọ: “Eva e were aye nọ ọ wha eva ra gbe ivie nọ a rọ kuọ owhẹ!” 28  Rekọ ọ tẹ ta nọ: “Ijo, ukpoye, eva e were enọ i bi yo ẹme Ọghẹnẹ je bi koko iei!” 29  Nọ ogbotu na a je kokohọ, o te muhọ ẹta nọ: “Oge nana yọ oge omuomu; ọ be gwọlọ oka, rekọ a rẹ te kẹe uvumọ oka ha ajokpaọ oka Jona. 30  Keme wọhọ epanọ Jona ọ jọ oka kẹ ahwo Nanivi na, ere Ọmọ ohwo ọ te jọ kẹ oge nana. 31  Ovie-aye obọ obọze ovatha-ọre avọ ahwo oge nana a te kparoma evaọ oke ẹdhoguo na o ve ti brukpe ae keme o no ugbothabọ ze te gaviezọ kẹ eme areghẹ Solomọn. Rekọ rri! ohwo nọ ọ rro vi Solomọn ọ rrọ etenẹ. 32  Ahwo Nanivi avọ oge nana a te kparoma evaọ oke ẹdhoguo na a ve brukpe oge nana keme a kurẹriẹ nọ Jona o whowho ovuẹ Ọghẹnẹ kẹ ae. Rekọ, rri! ohwo nọ ọ rro vi Jona ọ rrọ etenẹ. 33  Ohwo ọ tẹ rọ ukpẹ tu o re fi ei họ oria nọ u siomano hayo otọ ekete* he, rekọ o re fi ei họ ehru adada-ukpẹ re enọ e ruọ uwou na a sae ruẹ elo na. 34  Ukpẹ oma na họ ubiẹro ra. Ubiẹro ra o tẹ tọvi oware ovo,* oma ra soso u re lo,* rekọ ubiẹro ra o tẹ be re ihri,* oma ra soso u re muebi. 35  Fikiere, wha yọroma re elo nọ ọ rrọ oma rai o gbẹ jọ ebi hi. 36  Fikiere, nọ oma ra soso u te bi lo nọ uvumọ abọ riẹ o gbe muebi hi, o re lo wọhọ epaọ okenọ ukpẹ o be kẹ owhẹ elo.” 37  Nọ ọ ta onana no, ohwo Farisi jọ o te zizie iei nọ ọ ziọ uwou riẹ te re emu. Ọ tẹ ruọ eva ọ tẹ keria be re emu. 38  Rekọ u gbe ohwo Farisi na unu nọ ọ ruẹ nọ ọ wozẹ* abọ họ taure o te ti mu emu họ ẹre. 39  Rekọ Olori na ọ tẹ ta kẹe nọ: “Whai otu Farisi, wha rẹ wozẹ uke egho gbe uke omodhe, rekọ obeva rai o vọ avọ uvou-uthei gbe emuemu. 40  Whai igheghẹ! Ohwo nọ o ru uke na o ru obeva na re, o gbẹ rrọ ere? 41  Rekọ wha rehọ eware nọ e rrọ obọ udu na kẹ ekẹ ohrọ, wha vẹ te jọ fuafo evaọ eware kpobi. 42  Rekọ uye u te owhai, otu Farisi, keme wha rẹ kẹ abọvo abakpe ọrọ mint gbe olugbo gbe oghẹrẹ ẹbe ọfa kpobi nọ a rẹ re, rekọ wha bi gbabọkẹ uvioziẹ gbe uyoyou Ọghẹnẹ! O gba owhai họ nọ wha re ru eware yena, rekọ orọnọ wha re gbabọkẹ eware edekọ họ. 43  Uye u te owhai, otu Farisi, keme wha rẹ gwọlọ keria egbara obaro* evaọ iwou-egagọ, jẹ gwọlọ nọ ahwo a yere owhai evaọ eria eki! 44  Uye u te owhai, keme wha wọhọ iki nọ a rẹ kaki rri mu hu,* nọ ahwo a rẹ nya ehru rai vrẹ yọ a rẹ riẹ hẹ!” 45  Omọvo enọ e riẹ Uzi na lafi ọ tẹ kpahe kẹe nọ: “Owuhrẹ, whọ be rọ eme ra na la omai eka re.” 46  Ọ tẹ kpahe kẹe nọ: “Uye u te owhai re, whai enọ e riẹ Uzi na lafi, keme wha re kru ewha egbẹgbẹdẹ họ ahwo uzou, rekọ wha rẹ rehọ uziobọ rai te ai hi! 47  “Uye u te owhai, keme wha be bọ iki eruẹaro na, dede nọ esẹ rai họ enọ i kpe rai! 48  Ababọ avro, wha riẹ eware nọ esẹ-ode rai a ru, ghele na e be were owhai, keme ae a kpe eruẹaro na rekọ wha tẹ be bọ iki rai. 49  Oyejabọ nọ Ọghẹnẹ ọ rọ rehọ areghẹ riẹ ta nọ: ‘Me ti vi eruẹaro gbe ikọ bru rai, yọ a ti kpe je kpokpo ejọ rai, 50  re azẹ eruẹaro kpobi nọ a kpe no emuhọ akpọ* na ze o jọ uzou oge nana, 51  no azẹ Ebẹle rite azẹ Zekaraya, ọnọ a kpe evaọ udevie agbada-idhe gbe uwou* na.’ Ẹhẹ, mẹ be ta kẹ owhai nọ, o te jọ uzou oge nana. 52  “Uye u te owhai enọ e riẹ Uzi na lafi, keme wha si usiavẹ eriariẹ Ọghẹnẹ no. Whai omarai wha ruọ eva ha, yọ wha be whaha enọ e gwọlọ ruọ eva!” 53  Fikiere nọ o no etẹe no, otu ikere-obe gbe otu Farisi na a te je su ruru ei jẹ be nọe enọ buobu, 54  bi fiẹrohọ iẹe sọ ọ te ta ẹme jọ nọ a re ro kru rie.

Oruvẹ-Obotọ

Evaọ Griki, “nọ ọ riosa mai.”
Koyehọ, whọ kẹ omai uvẹ kie kẹ odawọ họ.
Odẹ ọfa Setan, ọnọ ọ rrọ osu idhivẹri na.
Hayo “rroro.”
Hayo “ekete nọ a rẹ rọ wawo eware.”
Hayo “be ruẹ vevẹ.” Evaọ Griki, “lọhọ.”
Hayo “vọ avọ elo.”
Evaọ Griki, “u te yoma; rrọ muomu.”
Abọ ọwozẹ nana orọnikọ orọ abọ nọ i gine gbe he, rekọ uruemu ahwo Ju nọ a jẹ hai ro voro omarai.
Hayo “nọ e mai woma.”
Hayo “iki nọ a fi oka họ họ.”
Onana u dhesẹ okenọ Adamu avọ Ivi a ro mu emọ họ eyẹ.
Hayo “etẹmpol.”