Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Luk 1:1-80

EWARE NỌ E RIẸ EVA

  • Eme ro se Tiofilọs (1-4)

  • Gebriẹl ọ ta nọ a ti yẹ Jọn Ọhọahwo-Ame na (5-25)

  • Gebriẹl ọ ta nọ a ti yẹ Jesu (26-38)

  • Meri ọ nya bru Ẹlizabẹt (39-45)

  • Meri o jiri Jihova (46-56)

  • A yẹ Jọn je mu odẹ kẹe (57-66)

  • Eruẹaruẹ Zekaraya (67-80)

1  Nọ orọnọ ahwo buobu a daoma koko evuẹ họ kpahe eware nọ ma rọwo na je kere ai fihọ otọ no na,  wọhọ epanọ enọ e rọ ẹro ruẹ eware na no emuhọ ze gbe enọ i bi whowho ovuẹ na a gbiku rai kẹ omai na,  mẹ gba riẹ mu re inọ me re kere ai se owhẹ othotha, O Tiofilọs ọnọ ọ viodẹ, keme mẹ kiẹ eware na kpobi no emuhọ ze gbagba,  re whọ sae riẹ inọ eware nọ a wuhrẹ owhẹ na ginọ uzẹme.  Evaọ oke Herọd ovie Judia, ozerẹ jọ ọ jariẹ nọ a re se Zekaraya nọ ọ jọ utu Abaeja. Aye riẹ o no unuwou Erọn ze, yọ odẹ riẹ Ẹlizabẹt.  Aimava na a kiẹrẹe evaọ aro Ọghẹnẹ, a kare afuẹwẹ, a je koko ijaje gbe izi Jihova* kpobi.  Rekọ a wo ọmọ họ keme Ẹlizabẹt ọ jọ ọga, yọ aimava a kpako no.  Whaọ, epanọ ọ rọ jọ aro Ọghẹnẹ je ru iruo ozerẹ okenọ u te oke utu riẹ,  wọhọ epanọ o jọ uruemu enọ e rrọ ọkwa-ozerẹ, u te te oke nọ ọyomariẹ ọ rẹ rọ mahe insẹnse, ọ tẹ ruọ obeva etẹmpol Jihova.* 10  Yọ ogbotu ahwo na kpobi a jọ obọ otafe be lẹ evaọ auwa insẹnse emahọ na. 11  Ukọ-odhiwu Jihova* ọ tẹ romavia kẹe, o dikihẹ ofẹ obọze ọrọ agbada-idhe insẹnse na. 12  Oware nọ Zekaraya ọ jẹ ruẹ na u te gbei unu, ozọ u te mu ei thesiwa. 13  Rekọ ukọ-odhiwu na ọ tẹ ta kẹe nọ: “Jọ ozọ u mu owhẹ hẹ, Zekaraya, keme a yo olẹ-ayare ra no, aye ra, Ẹlizabẹt o ti yẹ ọmọzae kẹ owhẹ, who ve se odẹ riẹ Jọn. 14  Who ti wo oghọghọ gbe evawere ilogbo, yọ ahwo buobu a te ghọghọ fiki eyẹ riẹ, 15  keme ọ te jọ ruaro evaọ aro Jihova.* Rekọ ọ rẹ da uvumọ udi nọ u re mu vievie he, yọ ẹzi ọfuafo ọ te vọe oma makọ re a te ti yẹe* ze dede, 16  o ti ku emọ Izrẹl buobu rẹriẹ bru Jihova* Ọghẹnẹ rai ze. 17  Ofariẹ, Ọghẹnẹ o ti vi ei karo avọ ẹzi gbe ogaga Elaeja, re o ku udu esẹ rẹriẹ bru emọ je ru enọ e be ghẹmeeyo wo areghẹ enọ i kiẹrẹe, re ọ ruẹse ruẹrẹ ahwo họ kẹ Jihova.”* 18  Zekaraya ọ tẹ ta kẹ ukọ-odhiwu na nọ: “Ẹvẹ onana o sai ro mu omẹ ẹro? Keme mẹ kpako no, yọ aye mẹ ọ kpako no re.” 19  Ukọ-odhiwu na ọ tẹ kpahe kẹe nọ: “Mẹ yọ Gebriẹl, ọnọ o re dikihẹ aro Ọghẹnẹ, a vi omẹ ze te ta ẹme kẹ owhẹ, je whowho emamọ usi nana kẹ owhẹ. 20  Rekọ rri! who ti dienu, whọ te sae ta ẹme he bọo ẹdẹ nọ eware nana i re rugba no, keme whọ rọwo eme mẹ hẹ, enọ i ti rugba evaọ oke nọ a fihọ kẹ ae.” 21  Evaọ oke yena kpobi, yọ ahwo na a gbẹ be hẹrẹ Zekaraya, u je gbe ai unu inọ o lehie gaga evaọ obeva etẹmpol na. 22  Nọ ọ ruọ otafe, ọ sae ta ẹme kẹ ae he, a te viẹro nọ ọ ruẹ oware igbunu jọ evaọ obeva etẹmpol na. Ọ tẹ be rọ abọ ta ẹme kẹ ae keme o dienu no. 23  Nọ edẹ iruo riẹ evaọ etẹmpol na e gba no, o te kpobọ uwou riẹ. 24  Nọ edẹ jọ e vrẹ no, Ẹlizabẹt aye riẹ o te dihọ, ọ tẹ ko omariẹ dhere evaọ emerae isoi, be ta nọ: 25  “Nọ oware nọ Jihova* o ru kẹ omẹ evaọ oke nana. Ọ kareghẹhọ omẹ no re o si ẹpoviẹ mẹ no evaọ udevie ahwo.” 26  Nọ ọ jọ amara avọ ezeza, Ọghẹnẹ o te vi ukọ-odhiwu na Gebriẹl kpohọ ẹwho Galili jọ nọ a re se Nazarẹt, 27  bru ọmọtẹ-kọkọ* jọ nọ ọzae jọ nọ a re se Josẹf, ọnọ o no unuwou Devidi ze ọ sahotọ, yọ odẹ ọmọtẹ-kọkọ na họ Meri. 28  Nọ ukọ-odhiwu na ọ nya bru rie, ọ tẹ ta nọ: “Do, ọnọ a rri aro gaga, Jihova* ọ rrọ kugbe owhẹ.” 29  Rekọ eme riẹ na e lẹliẹ udu bru rie gaga, ọ tẹ be daoma re o wo otoriẹ oware nọ uyere nana u dhesẹ. 30  Fikiere ukọ-odhiwu na ọ tẹ ta kẹe nọ: “Jọ ozọ u mu owhẹ hẹ, Meri, keme who wo aruoriwo evaọ aro Ọghẹnẹ. 31  Rri! Who ti dihọ who ve ti yẹ ọmọzae, yọ who re se odẹ riẹ Jesu. 32  Ọ te jọ ruaro yọ a ti sei Ọmọ Ọnọ Ọ Mai Kpehru na, yọ Jihova* Ọghẹnẹ ọ te kẹe agbara-uvie Devidi ọsẹ riẹ, 33  ọ te jọ Ovie nọ o ti su uwou Jekọp bẹdẹ bẹdẹ, yọ Uvie riẹ u ti wo oba ha.” 34  Rekọ Meri ọ tẹ ta kẹ ukọ-odhiwu na nọ: “Ẹvẹ onana o te rọ via, kpakiyọ ọzae o bi lele omẹ wezẹ hẹ?” 35  Ukọ-odhiwu na ọ tẹ kẹe uyo nọ: “Ẹzi ọfuafo ọ te ruọ owhẹ oma, ogaga Ọnọ Ọ Mai Kpehru na u ve ti ruru owhẹ. Fiki oyena, a ti se ọmọ nọ who bi ti yẹ na ọrẹri, Ọmọ Ọghẹnẹ. 36  Yọ rri! Ẹlizabẹt omoni ra o dieva ọmọzae họ no re dede nọ ọ who no, yọ amara avọ ezeza ọ rrọ na, aye nọ a bi se ọga na; 37  keme ẹme ọvo nọ Ọghẹnẹ ọ ta nọ ọ rẹ sai ru gba ha o rrọ họ.” 38  Kẹsena Meri ọ tẹ ta nọ: “Rri! Mẹ yọ odibo-ọmọtẹ Jihova!* Jọ o via kẹ omẹ wọhọ epanọ whọ ta na.” Ukọ-odhiwu na ọ tẹ nyase iẹe ba. 39  Meri ọ tẹ wọ evaọ edẹ yena, ọ tẹ nya vẹrẹ vẹrẹ kpohọ ẹwho Juda jọ nọ ọ rrọ ẹkwotọ igbehru, 40  ọ tẹ ruọ uwou Zekaraya o te yere Ẹlizabẹt. 41  Epanọ Ẹlizabẹt o ro yo uyere Meri na, ọmọ nọ ọ rrọ edhede riẹ o te nuhu oma, ẹzi ọfuafo ọ tẹ vọ Ẹlizabẹt oma, 42  ọ tẹ kpare urru ta nọ: “Oghale u te owhẹ evaọ udevie eyae, yọ oghale u te ọmọ nọ ọ rrọ edhede ra! 43  Kọ ẹvẹ ọghọ nana o ro te omẹ obọ, nọ oni Olori mẹ ọ rọ nya bru omẹ ze? 44  Keme rri! nọ ezọ mẹ i yo uyere ra, ọmọ nọ ọ rrọ edhede mẹ o te nuhu oma avọ oghọghọ. 45  Jọ eva e were owhẹ re, whẹ nọ ọ rọwo na, keme eware kpobi nọ Jihova* ọ ta kẹ owhẹ na i ti rugba.” 46  Meri ọ tẹ ta nọ: “Me jiri Jihova,* 47  yọ ẹzi mẹ ọ rẹ ghọghọ ẹsikpobi fiki Ọghẹnẹ, Osiwi mẹ, 48  keme o muẹrohọ odibo-ọmọtẹ riẹ nọ ọ rrọ oruori. Keme rri! no umuo enẹna vrẹ, ige kpobi i ti se omẹ ọnọ o wo oghale, 49  keme Ọnọ o wo ogaga na o ru eware ilogbo kẹ omẹ no, yọ odẹ riẹ o rrọ ọrẹri, 50  yọ no oge te oge, o re dhesẹ ohrọ-oriọ kẹ enọ e be dhozọ riẹ. 51  Ọ rọ obọ riẹ ru eware ilogbo no; yọ enọ e be rehọ okpiroro nọ e rrọ udu rai dhesẹ nọ a wo omorro, ọ vaha e rai no. 52  O si ahwo nọ a wo ogaga no egbara-uvie no jẹ kpare iruori kpehru no; 53  ọ rehọ eware iwoma kuọ enọ ohọo u bi kpe je vi enọ i fe kpo ababọ no. 54  Ọ nyaze ti fiobọhọ kẹ Izrẹl odibo riẹ no, ro dhesẹ nọ ọ kareghẹhọ inọ o re dhesẹ ohrọ-oriọ 55  kẹ Abraham gbe emọ* riẹ bẹdẹ bẹdẹ, wọhọ epanọ ọ ta kẹ esẹ-ode mai.” 56  Meri ọ tẹ jọ kugbei evaọ oware wọhọ emerae esa, kẹsena o te zihe kpobọ uwou riẹ. 57  Oke u te te nọ Ẹlizabẹt o re ro yẹ, o te yẹ ọmọzae. 58  Ahwo okegbe na gbe imoni riẹ a te ti yo inọ Jihova* ọ re riẹ ohrọ no, a te lele iei ghọghọ. 59  Evaọ ẹdẹ avọ eree a tẹ nyaze te yawo ọmọ na, a tẹ gwọlọ nọ a rẹ rehọ odẹ ọsẹ riẹ Zekaraya ro sei. 60  Rekọ oni riẹ ọ tẹ ta nọ: “Ijo, Jọn họ odẹ nọ a re sei.” 61  A tẹ ta kẹe nọ: “Ohwo ọvo evaọ udevie imoni ra o wo odẹ nana ha.” 62  Kẹsena a tẹ rehọ abọ ta ẹme rọ nọ ọsẹ riẹ odẹ nọ ọ gwọlọ nọ a kẹ ọmọ na. 63  Ọ tẹ yare nọ a kẹe ẹwẹ-akpala, o te kere fihọ iẹe nọ: “Jọn họ odẹ riẹ.” Onana u te gbe aikpobi unu. 64  Unu riẹ o tẹ nwani rovie, o te mu ẹme họ ẹta, bi jiri Ọghẹnẹ. 65  Ozọ u te mu enọ e be rria okegbe yena kpobi, a te mu eware nana kpobi họ ẹta kpahe evaọ ẹkwotọ Judia soso nọ igbehru e rrọ na. 66  Ahwo kpobi nọ a yo onana a tẹ jẹ jọ udu rai ta nọ: “Oghẹrẹ ohwo vẹ ọmọ nana ọ be te jọ?” Keme obọ Jihova* o ginẹ jọ kugbei. 67  Kẹsena ẹzi ọfuafo ọ tẹ vọ Zekaraya ọsẹ riẹ oma, ọ tẹ ruẹaro, inọ: 68  “Ujiro u te Jihova,* Ọghẹnẹ Izrẹl, keme o dhesẹ ohrọ-oriọ kẹ ahwo riẹ no jẹ kẹ ae esiwo no. 69  Yọ ọ kẹ omai uzei esiwo* no evaọ uwou Devidi odibo riẹ, 70  wọhọ epanọ ọ rehọ eruẹaro anwae riẹ ta 71  kpahe esiwo no obọ ewegrẹ mai je no obọ ahwo kpobi nọ a bi mukpahe omai; 72  ro dhesẹ ohrọ-oriọ kẹ omai fiki esẹ-ode mai re o je dhesẹ nọ ọ kareghẹhọ ọvọ ọrẹri riẹ, 73  eyaa nọ ọ ya kẹ Abraham ọsẹ-ode mai, 74  re nọ o te siwi omai no obọ ewegrẹ no, ọ vẹ kẹ omai ọghọ ologbo nọ ma rẹ rọ gọe ababọ ozodhẹ 75  avọ uyoyou nọ o rẹ hiẹ hẹ gbe ẹrẹreokie evaọ edẹ uzuazọ mai kpobi. 76  Rekọ whẹ, ọmọ mẹ, a re ti se owhẹ ọruẹaro Ọnọ Ọ Mai Kpehru na, keme Jihova* o ti vi owhẹ karo re whọ ruẹrẹ idhere riẹ họ, 77  re who whowho ovuẹ esiwo kẹ ahwo riẹ, onọ a re wo ẹkwoma erọvrẹ izieraha rai, 78  fiki ohrọ-oriọ Ọghẹnẹ mai. Fiki ohrọ-oriọ nana, elo o ti lo mu omai no obọ ehru ze, 79  re ọ kẹ enọ e rrọ ebi gbe oria ebi imuozọ elo jẹ kpọ awọ mai evaọ edhere udhedhẹ.” 80  Ọmọ na ọ tẹ rro jẹ kpako evaọ iroro, ọ tẹ jọ obọ udhude ri bọo ẹdẹ nọ o ro dhesẹ oma via kẹ Izrẹl.

Oruvẹ-Obotọ

Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Hayo “no edhede oni riẹ ze.”
Rri oria Otofa Eme.
Rri oria Otofa Eme.
Rri oria Otofa Eme.
Hayo “ọmọtẹ nọ ọ riẹ ọzae he.”
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Evaọ Griki, “ubi.”
Rri oria Otofa Eme.
Rri oria Otofa Eme.
Rri oria Otofa Eme.
Hayo “osiwi nọ o wo ogaga.”
Rri oria Otofa Eme.