Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Jemis 1:1-27

EWARE NỌ E RIẸ EVA

  • Uyere (1)

  • Ithihakọ e rẹ wha evawere ze (2-15)

    • Ẹrọwọ nọ a dawo no (3)

    • Hae yare avọ ẹrọwọ (5-8)

    • Isiuru i re su kpohọ uzioraha gbe uwhu (14, 15)

  • Okẹ uwoma kpobi obọ ehru u re no ze (16-18)

  • Yo je ru lele ẹme na (19-25)

    • Ohwo nọ o bi rri ughẹgbe (23, 24)

  • Egagọ efuafo nọ i gbeku hu (26, 27)

1  Mẹ Jemis, ọrigbo Ọghẹnẹ gbe ọrọ Olori na Jesu Kristi, ro se erua ikpegbivẹ na nọ e vaha ruọ eria sa-sa: Me yere owhai!  Inievo mẹ, jọ wha ghọghọ nọ edawọ sa-sa i te bi te owhai,  keme wha riẹ nọ ẹrọwọ rai nọ a dawo evaọ edhere nana o rẹ wha ithihakọ ze.  Rekọ wha kuvẹ re ithihakọ i ru iruo riẹ gba, re wha sae gbunu jẹ kare afuẹwẹ evaọ kabọ kabọ, oware ovo o gbẹ kare owhai hi.  Fikiere, otẹrọnọ ohwo jọ evaọ usu rai o wo areghẹ te he, jọ ọ hae yare Ọghẹnẹ, keme o re siobọno kẹ ahwo kpobi, yọ ọ rẹ wọviẹ ohwo ho,* ọ te kẹe.  Rekọ jọ ọ hae yare avọ ẹrọwọ, jọ ọ vro vievie he, keme ọnọ ọ be vro ọ wọhọ ẹkporo abade nọ ofou ọ be wọ fi kpenẹ avọ enẹ.  Evaọ uzẹme, jọ ohwo yena o rẹro oware ovo mi Jihova* ha;  ohwo yena yọ ọnọ ọ rẹ sae jiroro evo dhobọ họ, nọ ọ dọmu hu evaọ idhere riẹ kpobi.  Rekọ jọ oniọvo nọ ọ rrọ oruori ọ ghọghọ* fikinọ a kpare riẹ kpehru no, 10  jọ ọnọ ọ rrọ ọdafe ọ ghọghọ fikinọ a hrẹ riẹ kpotọ no, keme wọhọ ododo obọ ẹwọ o ti lo no. 11  Wọhọ epanọ ọre ọ rẹ bẹre ze avọ ẹrrorro ọgaga riẹ u ve ru okakọ obọ ẹwọ whu, ododo riẹ ọ vẹ kpare no, o gbe wo erru hu na, ere ọvona re ọdafe o ti whu evaọ udevie eware nọ o bi le na. 12  Eva e were ohwo nọ ọ ruabọhọ bi thihakọ odawọ, keme nọ Ọghẹnẹ o te kuenu kẹe no, o ti wo etu-uvie uzuazọ, onọ Jihova* ọ ya eyaa nọ ọ te kẹ enọ i you Rie te urere. 13  Nọ odawọ u te te ohwo, jọ ọ ta ha inọ: “Ọghẹnẹ ọ be dawo omẹ.” Keme a sae rọ eware imuomu rọ dawo Ọghẹnẹ hẹ, yọ ọyomariẹ ọ rẹ rehọ eware itieye dawo ohwo ọvo ho. 14  Rekọ odawọ u re te omomọvo fiki isiuru obọriẹ nọ e rẹ wọe jẹ lẹliẹe họ.* 15  Kẹsena nọ isiuru na i te dihọ no, i ve yẹ uzioraha; nọ ohwo o te kie ruọ uzioraha na no, o vẹ wha uwhu ze. 16  Inievo iyoyou mẹ, jọ a su owhai thọ họ. 17  Okẹ uwoma kpobi gbe okẹ ogbagba kpobi obọ ehru u re no ze, obọ Ọsẹ elo* na u re no ze ọnọ o re nwene he wọhọ uwoho nọ u re go. 18  Fikinọ o rrọ oreva riẹ, ọ rehọ ẹkwoma ẹme uzẹme na ro se omai ze, re ma jọ ibi ọsosuọ nọ ọ salọ evaọ emama riẹ. 19  Jọ wha riẹ onana inievo iyoyou mẹ: Jọ ohwo kpobi ọ jọ ọnọ ọ rẹ kaki yo, ọnọ ọ rẹ rọ okpakpa ta ẹme he, ọnọ ọ rẹ kaki muofu hu, 20  keme ofu ohwo-akpọ u re ru ei ru oware nọ u kiẹrẹe evaọ aro Ọghẹnẹ hẹ. 21  Fikiere, wha siobọno egbegbe kpobi gbe oghẹrẹ eyoma kpobi,* re wha rọ ẹwolẹ jẹ ẹme na nọ a be kọ fihọ udu rai na rehọ onọ o rẹ sai siwi owhai. 22  Rekọ, wha jọ enọ i re ru lele ẹme na orọnikọ enọ i re yo ọvo ho, be rehọ iroro ethọthọ viẹ omarai họ. 23  Keme ohwo jọ ọ tẹ rrọ ọnọ o re yo ẹme na rekọ o re ru ei hi, ọ wọhọ ohwo nọ o bi rri ovao riẹ evaọ ughẹgbe. 24  O re rri omariẹ, rekọ nọ ọ tẹ nyavrẹ no, oghẹrẹ ohwo nọ ọ rrọ o vẹ nwane thọrọ iẹe ẹro. 25  Rekọ ohwo nọ o re rri uzi ogbagba nọ o rẹ wha ufuoma ze na kokodo jẹ ruabọhọ iẹe yọ ọnọ o bi ru lele ẹme na orọnikọ ọnọ o yo no o vẹ thọrọ iẹe ẹro ho; yọ o ti wo evawere evaọ oware nọ o bi ru na. 26  Ohwo jọ o te bi roro nọ ọ be gọ Ọghẹnẹ, rekọ ọ rẹ kpọ ẹrọo riẹ hẹ, ọ be viẹ udu obọriẹ họ, egagọ riẹ e tẹ jẹ rrọ ofofe. 27  Oghẹrẹ egagọ nọ o rrọ fuafo nọ u gbeku hu evaọ aro Ọghẹnẹ gbe Ọsẹ mai họ: re a rẹrote emọ nọ i wo ọsẹ hayo oni hi avọ eyae-uku nọ e rrọ uye, jegbe re ohwo o ru omariẹ kare epe evaọ akpọ na.

Oruvẹ-Obotọ

Hayo “fuọ ohwo ho.”
Rri oria Otofa Eme.
Evaọ Griki, “seha.”
Rri oria Otofa Eme.
Hayo “mu ei wọhọ agbefẹ.”
Onana u dikihẹ kẹ ọre, ọvẹre, gbe isi na.
Hayo o sae jọ nọ, “eyoma nọ ọ vọ oria kpobi.”