Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 20:1-15

EWARE NỌ E RIẸ EVA

  • A rọ ogbregba kare Setan evaọ odu-ikpe (1-3)

  • Ahwo nọ a ti lele Kristi su evaọ odu-ikpe (4-6)

  • A siobọno Setan, a tẹ raha iẹe no (7-10)

  • A gu enọ i whu no ẹdhọ evaọ aro agbara-uvie ọfuafo na (11-15)

20  Mẹ tẹ ruẹ ukọ-odhiwu jọ nọ o bi no obọ odhiwu ze avọ usiavẹ unu ọgọdọ odidi na gbe ogbregba ologbo nọ o rrọ obọ riẹ.  O te mu araomuomu idudu na, araomuomu anwae na, ọnọ a re se Ẹdhọ gbe Setan, ọ tẹ rọ ogbregba kare iẹe odu-ikpe (1,000).  O te gbolo iei fihọ ọgọdọ odidi na, ọ tẹ kare ọgọdọ na dhei je fi oka họ ehru riẹ, re o gbe su erẹwho na thọ ofa ha bẹsenọ odu-ikpe (1,000) na o re re no. Nọ onana o tẹ vrẹ no a ve ti siobọnoi evaọ omoke kakao.  Mẹ tẹ ruẹ egbara-uvie yọ a kẹ enọ e keria ae udu nọ a re ro bruoziẹ. Mẹ tẹ jẹ ruẹ ahwo nọ a kpe* fiki isẹri nọ a se kpahe Jesu gbe ẹme nọ a ta kpahe Ọghẹnẹ, gbe enọ e gọ arao ojihẹ na hayo ẹmema riẹ hẹ, yọ a rọwo nọ a kpokahọ aruezo rai hayo obọ rai hi. A tẹ wariẹ ziọ uzuazọ, a tẹ jọ ivie je lele Kristi su evaọ odu-ikpe (1,000).  (Ahwo nọ a whu no nọ a kiọkọ a ziọ uzuazọ họ bẹsenọ odu-ikpe [1,000] na o ro re.) Onana họ ẹkparomatha ọsosuọ na.  Ohwo kpobi nọ a te kpare ze evaọ ẹkparomatha ọsosuọ na o re wo evawere ọ tẹ jẹ rrọ ọrẹri; uwhu avọ ivẹ na u wo ogaga evaọ oma rai hi, rekọ a te jọ izerẹ kẹ Ọghẹnẹ gbe Kristi, yọ a te jọ ivie nọ i ti lele iei su evaọ odu-ikpe (1,000).  Odu-ikpe (1,000) na ọ tẹ nwani re no, a ti siobọno Setan no uwou-odi ze,  ọ vẹ te nyai su erẹwho nọ e rrọ ibienẹ ene akpọ na thọ, Gọg avọ Magọg, re o koko ai họ kẹ ẹmo na. Unu ahwo nana o te jọ wọhọ uwẹkpẹ abade.  A tẹ nya ruọ otọakpọ na soso jẹ wariẹ evuẹ erezi na họ gbe okpẹwho nọ Ọghẹnẹ o you na. Rekọ erae i te no obọ odhiwu ze e tẹ mahe ae kpobi no. 10  A te gbolo Ẹdhọ nọ o je su ai thọ na fihọ ẹtẹre erae nọ isọ-ọre e be jọ to na, oria nọ arao ojihẹ na gbe ọruẹaro ọrue na a rrọ no vẹre; yọ a te kẹ ae uye* taso tuvo bẹdẹ bẹdẹ. 11  Mẹ tẹ ruẹ agbara-uvie ọfuafo ologbo jọ gbe Ọnọ ọ keria agbara-uvie na. Otọakpọ na gbe odhiwu na e tẹ dhẹ no aro riẹ, a gbẹ ruẹ e rai ofa ha. 12  Mẹ tẹ ruẹ enọ i whu no, te ilogbo te esese nọ i dikihẹ aro agbara-uvie na, yọ a rovie iko-ebe fihọ. Rekọ a te rovie uko-obe ofa jọ; uko-obe uzuazọ. A tẹ rehọ eware nọ a kere fihọ iko-ebe na ro bruoziẹ enọ i whu no na wọhọ epanọ a ru. 13  Abade o te siobọno enọ i whu nọ e rrọ eva riẹ, uwhu gbe Uki* a te siobọno enọ e rrọ eva rai, a te bruoziẹ rai omomọvo wọhọ epanọ a ru. 14  A te gbolo uwhu gbe Uki* fihọ ẹtẹre erae na. Ẹtẹre erae na u dikihẹ kẹ uwhu avọ ivẹ na. 15  Ofariẹ, ohwo kpobi nọ a ruẹ odẹ riẹ evaọ obe uzuazọ na ha, a te gbolo iei fihọ ẹtẹre erae na.

Oruvẹ-Obotọ

Evaọ Griki, “enọ a rehọ ewhe kpe.”
Hayo “bru ai dhe; fi ai họ uwou-odi.” A rẹ rehọ ẹme Griki nọ a jọ etenẹ fa na ta ẹme kpahe iriekarọ.—Rri Mt 18:34.
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.