Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 2:1-29

EWARE NỌ E RIẸ EVA

  • Evuẹ kpobọ Ẹfisọs (1-7), kpobọ Smana (8-11), kpobọ Pẹgamọm (12-17), kpobọ Thiatira (18-29)

2  “Kere se ọnyukọ ukoko nọ o rrọ Ẹfisọs nọ: Enẹ ọnọ o kru isi ihrẹ na họ obọze riẹ na, nọ ọ be nya evaọ udevie edada-ikpẹ igoru ihrẹ na ọ ta:  ‘Mẹ riẹ eware nọ who bi ru, iruo egaga ra gbe ithihakọ ra gbe nọ whọ rẹ kẹ ahwo oyoma uvẹ vievie he, yọ whọ dawo ahwo nọ a bi se omarai ikọ, rekọ nọ a rrọ ikọ họ, whọ tẹ ruẹ nọ eterue a rrọ.  Who bi thihakọ re, yọ who dikihẹ whawha fiki odẹ mẹ, oma o re rrọ owhẹ hẹ.  Rekọ, mẹ be whọku owhẹ evaọ onana, whọ nyasiọ uyoyou nọ who wo oke ọsosuọ ba no.  “‘Fikiere kareghẹhọ oria nọ who kie no na, je kurẹriẹ re who ru eware nọ who je ru oke ọsosuọ na. Who gbe ru ere he, mẹ te nya bru owhẹ ze, me ve ti si adada-ukpẹ ra no oria riẹ, ajokpanọ who kurẹriẹ.  Rekọ, whọ be riẹ ru evaọ onana: who mukpahe eware nọ utu Nikolas a bi ru, enọ me mukpahe re.  Jọ ọnọ o wo ezọ o yo ẹme nọ ẹzi na ọ be ta kẹ ikoko na: Mẹ te kẹ ohwo nọ o fi kparobọ uvẹ re ọ re ibi ure uzuazọ na, onọ o rrọ evaọ aparadase Ọghẹnẹ.’  “Kere se ọnyukọ ukoko nọ o rrọ Smana nọ: Enẹ ‘ọrọ Ọsosuọ gbe ọrọ Urere na,’ ọnọ o whu jẹ wariẹ ziọ uzuazọ na ọ ta:  ‘Mẹ riẹ uye nọ whọ be ruẹ gbe uvuhu nọ o rrọ owhẹ oma—rekọ who fe—yọ mẹ riẹ ahwo nọ a bi se omarai ahwo Ju rekọ nọ a rrọ ahwo Ju hu, nọ a rrọ utu* Setan nọ a be ta eme-aghọ kẹ owhẹ. 10  Who du dhozọ eware nọ whọ be te ruẹ uye rai hi. Rri! Ẹdhọ ọ te hai gbolo owhai ejọ fihọ uwou-odi re a ruẹse dawo owhai te oka, yọ wha te ruẹ uye edẹ ikpe. Kru ẹrọwọ ra makọ rite uwhu, mẹ te kẹ owhẹ etu-uvie uzuazọ. 11  Jọ ọnọ o wo ezọ o yo ẹme nọ ẹzi na ọ be ta kẹ ikoko na: Ọnọ o fi kparobọ o ti whu uwhu avọ ivẹ na vievie he.’ 12  “Kere se ọnyukọ ukoko nọ o rrọ Pẹgamọm nọ: Enẹ ọnọ o wo ọgbọdọ akọava nọ ọ rrọ thethei jẹ rrọ dada na ọ ta: 13  ‘Mẹ riẹ oria nọ whọ be rria, koyehọ, oria nọ agbara-uvie Setan ọ rrọ; ghele na whọ gbẹ dadamu abọ mẹ,* whọ vro ẹrọwọ nọ who fihọ omẹ hẹ makọ evaọ oke Antipas, osẹri mẹ nọ o wo ẹrọwọ na, ọnọ a kpe evaọ abotọ rai, evaọ oria nọ Setan ọ be rria. 14  “‘Rekọ, umutho eware jọ e riẹ nọ mẹ be jọ whọku owhẹ, ahwo jọ a rrọ udevie ra nọ a bi lele uwuhrẹ Belam, ọnọ o wuhrẹ Belak inọ o fi utho ezoruẹ họ kẹ emọ Izrẹl, re a re eware nọ a ro dhe idhe kẹ emedhọ je gbe-ọfariẹ.* 15  Ere ọvona re, enọ i bi lele uwuhrẹ utu Nikolas e rrọ udevie ra re. 16  Fikiere kurẹriẹ. Who gbe ru ere he, mẹ te nya bru owhẹ ze vẹrẹ vẹrẹ, mẹ vẹ te rehọ ọgbọdọ othethei nọ ọ rrọ unu mẹ na fi ae ẹmo. 17  “‘Jọ ọnọ o wo ezọ o yo ẹme nọ ẹzi na ọ be ta kẹ ikoko na: Ọnọ o fi kparobọ mẹ te jọ emana nọ a sino na kẹe ejọ, mẹ vẹ te jẹ kẹe ubiutho ofuafo, yọ a kere odẹ okpokpọ fihọ ubiutho na, onọ ohwo ọvo ọ riẹ hẹ ajokpaọ ọnọ a be rehọ iẹe kẹ na.’ 18  “Kere se ọnyukọ ukoko nọ o rrọ Thiatira nọ: Enẹ Ọmọ Ọghẹnẹ, ọnọ ibiaro riẹ e wọhọ ebrerae, yọ awọ riẹ e wọhọ emamọ ẹroo na ọ ta: 19  ‘Mẹ riẹ eware nọ who bi ru, uyoyou gbe ẹrọwọ gbe iruo ra evaọ egagọ Ọghẹnẹ gbe ithihakọ ra, yọ eware nọ who bi ru enẹna i vi enọ who ru evaọ ọsosuọ. 20  “‘Rekọ, oware jọ o riẹ nọ mẹ be jọ whọku owhẹ, whọ be kẹ aye nọ a re se Jezibẹl na uvẹ, ọnọ o bi se omariẹ ọruẹaro-aye, nọ o bi wuhrẹ jẹ viẹ idibo mẹ họ re a gbe-ọfariẹ* jẹ re eware nọ a ro dhe idhe kẹ emedhọ. 21  Mẹ kẹ riẹ oke re o kurẹriẹ, rekọ ọ gwọlọ kurẹriẹ no ọfariẹ-ogbe* riẹ hẹ. 22  Rri! Me ti ru ei mọ okpẹyao, jẹ rọ uye ulogbo kẹ enọ i bi lele iei bruẹnwae, ajokpanọ a kurẹriẹ no eware nọ ọ viẹ rai họ bi ru na. 23  Yọ mẹ te rehọ ẹyao ọgaga kpe emọ riẹ, re ikoko na kpobi a riẹ nọ mẹ họ ọnọ ọ rẹ kiẹ iroro ididi* gbe udu na riwi, mẹ vẹ te hwosa kẹ owhai omomọvo wọhọ epanọ wha ru. 24  “‘Rekọ, mẹ be ta kẹ owhai otu nọ i kiọkọ evaọ Thiatira, ahwo kpobi nọ a bi lele uwuhrẹ Jezibẹl na ha, nọ a riẹ eware nọ a bi se “eware ididi Setan” he inọ: Mẹ be wọ owha ofa fihọ owhai uzou hu. 25  Ghele na, kru oware nọ who wo na ga bẹsenọ mẹ rẹ nyaze. 26  Ọnọ o fi kparobọ je lele edhere mẹ rite urere mẹ te kẹe udu nọ o ti ro su erẹwho na, 27  wọhọ epaọ udu-esuo nọ Ọsẹ mẹ ọ kẹ omẹ na. Ọ te rehọ ọkpọ ayọno su ahwo na, a ve ti bru ibribro wọhọ othẹ nọ o whu ehehẹhẹ. 28  Yọ mẹ te kẹe esi ohiohiẹ na. 29  Jọ ọnọ o wo ezọ o yo ẹme nọ ẹzi na ọ be ta kẹ ikoko na.’

Oruvẹ-Obotọ

Evaọ Griki, “uwou-egagọ.”
Evaọ Griki, “who gbe kru odẹ mẹ gaga.”
Rri oria Otofa Eme, “Ọfariẹ-ogbe.”
Rri oria Otofa Eme, “Ọfariẹ-ogbe.”
Evaọ Griki, por·neiʹa. Rri oria Otofa Eme.
Evaọ Griki, “ibieku.”