Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 18:1-24

EWARE NỌ E RIẸ EVA

  • Ekie “Babilọn Ologbo na” (1-8)

    • “Wha no eva riẹ no, ahwo mẹ” (4)

  • Uweri fikinọ Babilọn o kie no (9-19)

  • Oghọghọ evaọ obọ odhiwu fikinọ Babilọn o kie no (20)

  • Ọraha Babilọn o te wọhọ utho nọ a gbolo fihọ abade (21-24)

18  Nọ onana o vrẹ no mẹ tẹ ruẹ ukọ-odhiwu ọfa nọ o bi no obọ odhiwu ze avọ ogaga ulogbo, oruaro riẹ o tẹ whẹ elo họ otọakpọ na.  Ọ tẹ rehọ urru oruarua bo nọ: “O kie no! Babilọn Ologbo na o kie no, o zihe ruọ oria nọ idhivẹri gbe oghẹrẹ ẹzi* ogbegbe kpobi gbe oghẹrẹ evra igbegbe kpobi nọ ahwo a mukpahe e be rria no.  Fiki udi isiuru* ọfariẹ-ogbe* riẹ, erẹwho na kpobi a kie kẹe no, ivie otọakpọ na a lele i rie gbe-ọfariẹ, yọ egba-ihreki* otọakpọ na a fe no fiki uzuazọ akpọriọ nọ o vrẹta nọ o bi yeri ababọ omovuọ.”  Me te yo urru ofa jọ nọ u do no obọ odhiwu ze nọ o be ta nọ: “Wha no eva riẹ no, ahwo mẹ, otẹrọnọ wha gwọlọ lele iei wobọ evaọ izieraha riẹ hẹ, gbe otẹrọnọ wha gwọlọ nọ iye riẹ jọ i te owhai hi.  Keme izieraha riẹ i kpehru te obọ odhiwu no, yọ Ọghẹnẹ ọ kareghẹhọ iruẹru okienyẹ* riẹ no.  Ru ei kele oghẹrẹ nọ o ru amọfa na, ẹhẹ, hwa eware nọ o ru zihe kẹe akuava; egho udi nọ ọ gua na, gua utioye kẹe akuava.  Ru uye gbe uweri riẹ ga te epanọ ọ kpare omariẹ kpehru te gbe epanọ o yeri uzuazọ akpọriọ nọ o vrẹta ababọ omovuọ te. Keme ọ be jọ udu riẹ ta nọ, ‘Mẹ keria wọhọ ovie-aye, mẹ rrọ aye-uku hu, yọ mẹ te rọ ẹro ruẹ uweri vievie he.’  Oyejabọ nọ iye riẹ e te rọ tha evaọ ẹdẹ ọvo, uwhu gbe uweri gbe ohọo, yọ a te rehọ erae mahe iẹe no riẹriẹriẹ, keme Jihova* Ọghẹnẹ nọ o bruoziẹ kpei na ọ rrọ gaga.  “Ivie otọakpọ na nọ i lele i rie gbe-ọfariẹ* je lele iei yeri uzuazọ akpọriọ nọ o vrẹta ababọ omovuọ na a te viẹ jẹ tehe igbama rai weri fiki riẹ okenọ a te ruẹ iwiri erae nọ a be rọ mahe iẹe. 10  A ti dikihẹ ugbo fiki ozọ uye nọ u bi tei, a vẹ te ta nọ: ‘U yoma kẹhẹ, u yoma kẹhẹ, O whẹ okpẹwho ologbo na, Babilọn okpẹwho ọgaga na, keme evaọ auwa ọvo a rọ raha owhẹ no!’ 11  “Ofariẹ, egba-ihreki otọakpọ na a be viẹ je weri fiki riẹ keme ohwo ọvo ọ gbẹ riẹ nọ ọ be dẹ eware rai nọ a be zẹ hẹ, 12  eware nọ a be zẹ na họ igoru, isiliva, itho eghaghae, izuu, emamọ ehọ-elọlọhọ, ehọ ekọlọ ogorurẹ, ehọ silki gbe ehọ ewawae; gbe eware kpobi nọ a rehọ ire nọ i re gbore awere ru; gbe oghẹrẹ eware kpobi nọ a rọ akọ-eni ru, gbe eware nọ a rọ ire eghaghae, ẹroo, ayọno gbe marbo ru; 13  gbe sinamọn, eware nọ a re ro fi awere họ emu, insẹnse, udẹ nọ u re gbo ore awere, frankinsẹs, udi, ewhri olivi, eka nọ a wuhu, eka, iruẹ,* igodẹ, enyenya avọ ekẹkẹ, erigbo, ẹhẹ ahwo-akpọ. 14  Emamọ ubi-ure nọ o rẹ were owhẹ gaga na o gbẹ riẹ hẹ, obọdẹ emu gbe obọdẹ eware na kpobi e rayẹ siọ owhẹ ba no, a gbẹ te ruẹ e rai ofa ha. 15  “Egba-ihreki nọ e jẹ zẹ eware nana, enọ e rọ ẹkwoma riẹ fe na, a ti dikihẹ ugbo fiki ozọ uye nọ u bi tei, a vẹ te viẹ je weri, 16  be ta nọ: ‘U yoma kẹhẹ, u yoma kẹhẹ, okpẹwho ologbo na, nọ ọ rehọ emamọ ehọ-elọlọhọ, ehọ ekọlọ ogorurẹ gbe ehọ ewawae gẹgọ, jẹ whẹ ekwakwa igoru gbe itho eghaghae gbe izuu họ oma na, 17  keme evaọ auwa ọvo efe obuobu yena ọ raha no!’ “Ahwo kpobi nọ a wuzou ekọ gbe ahwo kpobi nọ a rẹ ruọ ekọ gbe ibiekọ gbe ahwo kpobi nọ a rẹ kokọ evaọ abade na a te dikihẹ ugbo, 18  a te bi bo nọ a bi rri iwiri erae nọ a be rọ mahe iẹe na, a tẹ ta nọ: ‘Okpẹwho vẹ ọ wọhọ okpẹwho ologbo na?’ 19  A tẹ whẹ ovu ku uzou rai bi bo, be viẹ je bi weri, be ta nọ: ‘U yoma kẹhẹ, u yoma kẹhẹ, okpẹwho ologbo na, ọnọ ahwo kpobi nọ a wo ekọ evaọ abade a rọ ẹkwoma riẹ fe, keme evaọ auwa ọvo a raha e riẹ no!’ 20  “Wha ghọghọ fiki riẹ, O odhiwu, te owhai erezi na, ikọ na gbe eruẹaro na, keme Ọghẹnẹ o bruoziẹ kpei no fiki rai!” 21  Ukọ-odhiwu ọgaga jọ ọ tẹ wọ utho nọ o wọhọ utho ulogbo nọ a re ro wuhu eka, o te gbolo iei fihọ abade na, be ta nọ: “Ere a ti gele Babilọn okpẹwho ologbo na kie vẹrẹ te, yọ a gbẹ te ruẹ e riẹ ofa ha. 22  A gbẹ te jọ eva ra yo edo eso-ile nọ i bi kporo ekpata ha, edo egba-ile edo enọ i re kporo urete, gbe edo enọ i re kporo egba. A gbẹ te jọ eva ra ruẹ oghẹrẹ ọwena ọvo vievie he, yọ a gbẹ te jọ eva ra yo edo utho nọ a re ro wuhu eka vievie he. 23  Elo ukpẹ o gbe ti lo evaọ eva ra vievie he, yọ a gbe ti yo urru ọva gbe orọ ọmọtibobo evaọ eva ra ofa ha; keme egba-ihreki ra e jọ ahwo nọ a wo ekwa ilogbo evaọ otọakpọ na, yọ whọ rehọ iruẹru-imizi ra su erẹwho na kpobi thọ. 24  Ẹhẹ, eva riẹ a jọ ruẹ azẹ eruẹaro gbe erezi gbe azẹ ahwo kpobi nọ a kpe evaọ otọakpọ na.”

Oruvẹ-Obotọ

Hayo “ofou; eme nọ i no obọ izi ze.”
Hayo “ofu.”
Evaọ Griki, por·neiʹa. Rri oria Otofa Eme.
Hayo “Ihreki nọ i re no oria ruọ oria.”
Hayo “eware iyoma nọ o ru no.”
Rri oria Otofa Eme.
Rri oria Otofa Eme, “Ọfariẹ-ogbe.”
Hayo “imẹlu.”