Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 17:1-18

EWARE NỌ E RIẸ EVA

  • Oziẹ nọ a bru kpe “Babilọn Ologbo na” (1-18)

    • Ogberẹ ologbo na ọ keria ehru arao ojihẹ ọwawae (1-3)

    • Arao ojihẹ na ‘ọ jọ vẹre, ọ gbẹ rrọ họ, rekọ o ti no ọgọdọ odidi na ze’ (8)

    • Izei ikpe na e te họre Omogodẹ na (12-14)

    • Izei ikpe na i ti mukpahe ogberẹ na (16, 17)

17  Omọvo ikọ-odhiwu ihrẹ nọ i kru imidhe ihrẹ na ọ tẹ nyaze, ọ tẹ ta kẹ omẹ nọ: “Nyaze, re me dhesẹ oziẹ nọ a brukpe ogberẹ ologbo na kẹ owhẹ, ọnọ ọ keria ehru ame buobu na,  ọnọ ivie otọakpọ na a lele gbe-ọfariẹ,* ọnọ udi ọfariẹ-ogbe* riẹ u mu ahwo nọ a be rria otọakpọ na.”  Ọ tẹ rọ ogaga ẹzi na wọ omẹ kpobọ udhude. Mẹ tẹ ruẹ aye jọ nọ ọ keria ehru arao ojihẹ ọwawae nọ edẹ ekela e vọ oma, o te je wo izou ihrẹ avọ izei ikpe.  Aye na o ku ewu ekọlọ ogorurẹ gbe ewu ọwawae họ, yọ ọ rehọ igoru gbe itho eghaghae gbe izuu gẹgọ, o te je kru egho igoru họ obọ onọ o vọ avọ eware etọtọ gbe eware igbegbe ọfariẹ-ogbe* riẹ.  A kere odẹ jọ fihọ aruezo riẹ, odẹ aghẹruẹ: “Babilọn Ologbo na, oni igberẹ gbe eware etọtọ otọakpọ na.”  Mẹ ruẹ nọ aye na ọ da azẹ erezi na gbe azẹ isẹri Jesu vọ eva. Nọ mẹ ruẹ e riẹ, u gbe omẹ unu gaga.  Fikiere ukọ-odhiwu na ọ tẹ ta kẹ omẹ nọ: “Fikieme u ro gbe owhẹ unu? Mẹ te vuẹ owhẹ ohwo nọ aye na ọ rrọ gbe arao ojihẹ nọ ọ wọ riẹ na nọ o wo izou ihrẹ avọ izei ikpe na:  Arao ojihẹ nọ whọ ruẹ na ọ jọ vẹre, rekọ ọ gbẹ rrọ họ, ghele na o bi ti no ọgọdọ odidi na ze, yọ a te raha iẹe no. Enọ e be rria otọakpọ na, nọ a kere odẹ rai fihọ uko-obe uzuazọ na ha no emuhọ akpọ* na ze, u ti gbe ai unu okenọ a tẹ ruẹ nọ arao ojihẹ na ọ jọ vẹre, rekọ ọ gbẹ rrọ họ, ghele na ọ te wariẹ jariẹ.  “Re a sai wo otoriẹ onana o gwọlọ areghẹ: Izou ihrẹ na i dikihẹ kẹ igbehru ihrẹ, enọ aye na ọ keria obọ ehru rai. 10  Ivie ihrẹ e riẹ: Isoi i kie no, ọvo jọ ọ rrọ, ọnọ o kiọkọ ọ re nyaze he; rekọ okenọ ọ tẹ nyaze, ọ te jariẹ omoke kakao. 11  Arao ojihẹ nọ ọ jọ vẹre rekọ nọ ọ gbẹ rrọ họ na yọ ovie avọ eree, rekọ oma ivie ihrẹ na o no ze, yọ a te raha iẹe no. 12  “Izei ikpe nọ whọ ruẹ na i dikihẹ kẹ ivie ikpe nọ i ri wo uvie no ho, rekọ a te kẹ ae udu nọ a rẹ rọ jọ ivie evaọ auwa ọvo kugbe arao ojihẹ na. 13  Enana i wo iroro evo, fikiere a te rọ ogaga gbe udu nọ a wo kẹ arao ojihẹ na. 14  Enana a ti lele Omogodẹ na họre, rekọ fikinọ Omogodẹ na họ Olori ilori gbe Ovie ivie, Omogodẹ na o ti fi ae kparobọ. Ere ọvona, enọ e rrọ kugbei nọ a se jẹ salọ nọ i kru ẹrọwọ rai a ti fi ae kparobọ re.” 15  Ọ tẹ ta kẹ omẹ nọ: “Ame nọ whọ ruẹ na, nọ ogberẹ na ọ keria na u dikihẹ kẹ ahwo, ogbotu, erẹwho gbe erọunu.* 16  Izei ikpe nọ whọ ruẹ na gbe arao ojihẹ na a ti mukpahe ogberẹ na a ve ti fi ei họ ababọ jẹ bae fihọ, a vẹ te re uwo-oma riẹ no jẹ rehọ erae mahe iẹe no riẹriẹriẹ. 17  Keme Ọghẹnẹ o ti fi iroro na họ udu rai re a ru ẹjiroro riẹ, ẹhẹ, re a ru iroro evo nọ a wo na gba ẹkwoma uvie rai nọ a te rọ kẹ arao ojihẹ na, bẹsenọ eme Ọghẹnẹ i re rugba no. 18  Aye nọ whọ ruẹ na o dikihẹ kẹ okpẹwho ologbo na nọ o bi su ivie otọakpọ na.”

Oruvẹ-Obotọ

Rri oria Otofa Eme, “Ọfariẹ-ogbe.”
Evaọ Griki, por·neiʹa. Rri oria Otofa Eme.
Evaọ Griki, por·neiʹa. Rri oria Otofa Eme.
Onana u dhesẹ okenọ Adamu avọ Ivi a ro mu emọ họ eyẹ.
Hayo “evẹrẹ.”