Kpohọ eme nọ e riẹ eva

Kpohọ oria izoẹme

Eviavia 16:1-21

EWARE NỌ E RIẸ EVA

  • Imidhe ihrẹ ofu Ọghẹnẹ (1-21)

    • A ku rie fihọ otọakpọ (2), abade na (3), ithẹ gbe iyeri-ame na (4-7), ọre na (8, 9), agbara-uvie arao ojihẹ na (10, 11), ethẹ Yufretis (12-16), gbe ofou na (17-21)

    • Ẹmo Ọghẹnẹ ọrọ Amagẹdọn (14, 16)

16  Me te yo urru oruarua jọ nọ u do no oria aruẹri na ze nọ o ta kẹ ikọ-odhiwu ihrẹ na nọ: “Wha nyai ku eware nọ e rrọ imidhe ihrẹ ofu Ọghẹnẹ na fihọ otọakpọ na.”  Ọrọ ọsosuọ ọ tẹ nya, o te ku eware nọ e rrọ omodhe riẹ fihọ otọakpọ na. Ola uyoma o tẹ ruọ ahwo nọ a wo oka arao ojihẹ na oma gbe enọ e jẹ gọ ẹmema riẹ.  Ọrọ avọ ivẹ o te ku eware nọ e rrọ omodhe riẹ fihọ abade na. Abade na o te zihe ruọ azẹ, wọhọ azẹ ohwo nọ o whu no, oware kpobi nọ o rrọ uzuazọ evaọ abade na u te whu.  Ọrọ avọ esa o te ku eware nọ e rrọ omodhe riẹ fihọ ithẹ gbe iyeri-ame na. I te zihe ruọ azẹ.  Me te yo nọ ukọ-odhiwu nọ o ku uye fihọ ame na ọ be ta nọ: “O Ọghẹnẹ, whẹ Ọnọ ọ jọ, nọ ọ rrọ, Ọnọ o re ru oware nọ o gba ẹsikpobi, who kiẹrẹe, keme who bruoziẹ inọ eware nana e jọ enẹ,  fikinọ a kpe azẹ erezi gbe eruẹaro, whọ tẹ kẹ ae azẹ da; oye u fo kẹ ae.”  Me te yo nọ agbada-idhe na ọ be ta nọ: “Jihova* Ọghẹnẹ, Erumeru na, oziẹobro ra o rrọ gbagba je kiẹrẹe.”  Ọrọ avọ ene o te ku eware nọ e rrọ omodhe riẹ fihọ ọre na, a tẹ kẹ ọre na udu re ọ rehọ ẹrrorro mahe ahwo na oma wọhọ erae.  Ẹrrorro ọgaga na ọ tẹ mahe ahwo na oma, rekọ a tẹ ta eme-aghọ kpahe odẹ Ọghẹnẹ, ọnọ ọ kẹ udu inọ a kẹ iye nana, yọ a kurẹriẹ hẹ re a kẹe oruaro. 10  Ọrọ avọ isoi o te ku eware nọ e rrọ omodhe riẹ fihọ agbara-uvie arao ojihẹ na. Oria kpobi evaọ uvie riẹ u te muebi, a tẹ be rowo akọ fiki edada, 11  a tẹ ta eme-aghọ kpahe Ọghẹnẹ obọ odhiwu fiki edada gbe ela rai, yọ a kurẹriẹ no iruo iyoma rai hi. 12  Ọrọ avọ ezeza o te ku eware nọ e rrọ omodhe riẹ fihọ ethẹ Yufretis ologbo na, ame riẹ ọ tẹ kpọ no re a ruẹrẹ edhere họ kẹ ivie nọ i bi no obọ ovatha-ọre ze. 13  Mẹ tẹ ruẹ eme igbegbe* esa nọ e wọhọ ikere nọ i bi no unu araomuomu idudu na gbe unu arao ojihẹ na gbe unu ọruẹaro ọrue na ze. 14  Evaọ uzẹme, enana yọ eme nọ i no obọ idhivẹri ze. A bi ru eware eka. A tẹ nya bru ivie otọakpọ na soso, re a koko ae họ kẹ ẹmo ẹdẹ ologbo Ọghẹnẹ Erumeru na. 15  “Rri! Mẹ be nyaze wọhọ oji. Eva e te were ohwo nọ ọ jaja aro vi jẹ sẹro iwu ehru riẹ, re ọ gbẹ nya ẹbẹba ha onọ o rẹ lẹliẹ ahwo rri rie oma o vẹ vuọ iẹe.” 16  A te koko ae họ kpohọ oria nọ a rẹ rọ ẹvẹrẹ Hibru se Amagẹdọn.* 17  Ọrọ avọ ihrẹ o te ku eware nọ e rrọ omodhe riẹ fihọ ofou na. Urru oruarua jọ u te do no oria aruẹri na ze, no agbara-uvie na ze, be ta nọ: “U rugba no!” 18  Kẹsena mẹ tẹ ruẹ elo egbrara, je yo edo irru gbe egbrara nọ e va, yọ otọ u nuhu gaga, utionọ o re via ẹdẹvo ho anwẹnọ ahwo a be rọ rria otọakpọ na, otọ nọ u nuhu na o ga thesiwa jẹ kẹre gaga. 19  Okpẹwho ologbo na o tẹ bẹre kpohọ abọ esa, ikpewho erẹwho na i te kie; Ọghẹnẹ ọ tẹ kareghẹhọ Babilọn Ologbo na, re ọ kẹe egho udi ofu ọgaga riẹ da. 20  Ofariẹ, ikoliko kpobi e tẹ dhẹ, yọ a gbẹ ruẹ igbehru hu. 21  Kẹsena oso-itho ologbo ọ tẹ rrọ no obọ odhiwu ze fihọ ahwo, onọ utho ovuovo riẹ o joma gbẹdẹ te etalẹnte,* ahwo na a tẹ ta eme-aghọ kpahe Ọghẹnẹ fiki uye oso-itho na, keme a re ruẹ oghẹrẹ uye utioye ẹdẹvo ho.

Oruvẹ-Obotọ

Rri oria Otofa Eme.
Hayo “izi igbegbe.”
Otofa ẹme Hibru nana họ “Ugbehru Mẹgido.” Yọ evaọ Griki a re sei Har·ma·ge·donʹ.
Rri oria Otofa Eme.