Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 12:1-17

EWARE NỌ E RIẸ EVA

  • Aye na, ọmọzae na, gbe araomuomu idudu na (1-6)

  • Maekẹl o lele araomuomu idudu na fi ẹmo (7-12)

    • A gele araomuomu idudu na ziọ otọakpọ (9)

    • Ẹdhọ ọ riẹ nọ omoke kakao o wo (12)

  • Araomuomu idudu na o kpokpo aye na (13-17)

12  Kẹsena oware oka ulogbo jọ o tẹ romavia evaọ obọ odhiwu: Aye jọ nọ ọ rehọ ọre gẹgọ, yọ ọvẹre na ọ rrọ otọ awọ riẹ, etu-uvie nọ o wo isi ikpegbivẹ ọ rrọ uzou riẹ,  yọ o dihọ. O te je bo fiki edada gbe ẹrova epanọ o re ro yẹ.  Oka ofa jọ o tẹ romavia evaọ obọ odhiwu. Rri! Araomuomu idudu jọ nọ ọ rrọ wawae, nọ o wo izou ihrẹ avọ izei ikpe, yọ itu-uvie ihrẹ e rrọ izou na;  ọ tẹ rehọ uweli riẹ si abọvo abasa isi obọ odhiwu, o te gele ai fihọ otọakpọ. Araomuomu idudu na o te dikihẹ aro aye nọ o bi ti yẹ na be hẹrẹ, re nọ ọ tẹ nwani yẹ no ọ vẹ lọ ọmọ riẹ no.  O te yẹ ọmọzae, ọnọ ọ te rehọ ọkpọ ayọno su erẹwho na kpobi. A tẹ nwani vo ọmọ na bru Ọghẹnẹ evaọ obọ agbara-uvie riẹ.  Aye na ọ tẹ dhẹ kpobọ udhude, obonọ Ọghẹnẹ ọ jọ ruẹrẹ oria họ kẹe, yọ a te jọ etẹe kuọ iẹe edẹ odu ọvo gbe egba ivẹ gbe udhosa (1,260).  Ẹmo o te du lahwe evaọ obọ odhiwu: Maekẹl* avọ ikọ-odhiwu riẹ a tẹ jẹ họre araomuomu idudu na, araomuomu idudu na avọ ikọ-odhiwu riẹ a tẹ jẹ họre ai re,  rekọ a kparobọ họ,* yọ a gbe wo oria ovo nọ a rẹ jọ evaọ obọ odhiwu hu.  Fikiere a te gele araomuomu idudu ologbo na fihọ otọ, araomuomu anwae na, ọnọ a re se Ẹdhọ gbe Setan na, nọ o bi su akpọ na soso thọ; a gele i rie fihọ otọakpọ, yọ a gele ikọ-odhiwu riẹ lele iei. 10  Me te yo urru oruarua jọ evaọ obọ odhiwu nọ o ta nọ: “Esiwo o no obọ Ọghẹnẹ mai ze no, o dhesẹ ogaga riẹ via no, a rehọ Uvie Ọghẹnẹ mai mu no, yọ Kristi riẹ o wo udu-esuo no, keme a gele ọnọ o re gu inievo mai na fihọ otọ no, ọnọ o re gu erue fihọ ai uzou taso tuvo evaọ aro Ọghẹnẹ mai! 11  A fi rie kparobọ fiki azẹ Omogodẹ na gbe fiki ovuẹ nọ a se isẹri kpahe, yọ a tubẹ daezọ uzuazọ rai hi, makọ okenọ a rẹriẹ ovao dhe uwhu. 12  Fiki onana, wha ghọghọ whai idhiwu gbe enọ e be rria ae eva! Uye u te otọakpọ gbe abade no, keme Ẹdhọ o bru owhai ze no, o wo ofu ọgaga keme ọ riẹ nọ omoke kakao o wo.” 13  Nọ araomuomu idudu na ọ ruẹ nọ a gele i rie fihọ otọakpọ no, o te kpokpo aye nọ o yẹ ọmọzae na. 14  Rekọ a tẹ rehọ ibekpe ivẹ erọ ugo ulogbo kẹ aye na, re ọ rra kpohọ oria riẹ evaọ udhude na, oria nọ a te jọ kuọ iẹe evaọ oke, eke gbe ubro oke,* oria nọ araomuomu na ọ gbẹ te jọ ruẹ e riẹ hẹ. 15  Araomuomu na o te nwo ame buobu nọ o wọhọ ethẹ no unu riẹ ze ku aye na re ọ da ame whu. 16  Rekọ otọakpọ na o tẹ nyai fiobọhọ kẹ aye na, otọ u te rovie unu riẹ o tẹ da ame nọ araomuomu idudu na o nwo no unu ze na no. 17  Fikiere eva aye na e tẹ dha araomuomu idudu na gaga, ọ tẹ nyai fi enọ i kiọkọ evaọ emọ* aye na ẹmo, enọ i bi koko ijaje Ọghẹnẹ je bi ru iruo isẹri-ise kpahe Jesu.

Oruvẹ-Obotọ

Otofa riẹ họ, “Ono Ọ Wọhọ Ọghẹnẹ?”
Hayo o sae jọ nọ, “rekọ a fi rie [koyehọ, araomuomu idudu na] kparobọ.”
Koyehọ, oke esa gbe ubro.
Evaọ Griki, “ubi.”