Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Eviavia 1:1-20

EWARE NỌ E RIẸ EVA

  • Eware nọ Ọghẹnẹ o rovie via ẹkwoma Jesu (1-3)

  • Uyere se ikoko ihrẹ na (4-8)

    • “Mẹ họ Alfa gbe Omẹga” (8)

  • Ẹzi na o ru Jọn jọ evaọ ẹdẹ Olori na (9-11)

  • Ọ ruẹ Jesu nọ a ru rro no na evaọ eruẹaruẹ (12-20)

1  Enana yọ eware nọ Jesu Kristi o dhesẹ via, nọ Ọghẹnẹ o rovie via kẹe. O rovie eware nana via kẹe re o dhesẹ kẹ idibo riẹ eware nọ e te via hrọ kẹle na. Jesu o vi ukọ-odhiwu riẹ ọ tẹ rọ ẹkwoma riẹ rehọ eka dhesẹ ae kẹ Jọn odibo riẹ,  ọnọ o se isẹri kpahe ẹme nọ Ọghẹnẹ ọ ta gbe isẹri nọ Jesu Kristi o se, koyehọ eware kpobi nọ ọ ruẹ.  Eva e rẹ were ohwo nọ o bi se eme eruẹaruẹ nana do via gbe enọ i bi yo, gbe enọ i bi ru lele eware nọ a kere fihọ iẹe, keme oke nọ a fihọ na o kẹle no.  Mẹ Jọn, me bi kere se ikoko ihrẹ nọ e rrọ ubrotọ Esia: Jọ wha reawere uwowou ulogbo gbe udhedhẹ no obọ “Ọnọ ọ jọ, nọ ọ rrọ, nọ ọ be tha na” ze, je no obọ izi ihrẹ nọ e rrọ aro agbara-uvie riẹ ze,  je no obọ Jesu Kristi ze ọnọ ọ rrọ “Osẹri nọ A re Fievahọ na,” “ọmọ ọsosuọ nọ a kpare no uwhu ze,” gbe “Osu ivie akpọ na.” Ajọ ọnọ o you omai nọ ọ rehọ azẹ obọriẹ si omai no igbo izieraha mai—  o je ru omai re ma jọ ivie gbe izerẹ kẹ Ọghẹnẹ gbe Ọsẹ riẹ na—o wo oruaro gbe ogaga bẹdẹ bẹdẹ. Ami.  Rri! Ọ be nyaze avọ ẹgho, yọ ibiaro kpobi e te ruẹ e riẹ, te ahwo nọ a duwu rie; yọ erua otọakpọ na kpobi a te tehe igbama rai weri fiki riẹ. Ẹhẹ, ere o te jọ. Ami.  “Mẹ họ Alfa gbe Omẹga,”* ere Jihova* Ọghẹnẹ ọ ta, “Ọnọ ọ jọ, nọ ọ rrọ, nọ ọ be tha na, Erumeru na.”  Mẹ Jọn, oniọvo rai gbe ọnọ ọ be ruẹ uye je bi thihakọ wọhọ owhai, gbe ọnọ o ti lele owhai jọ Uvie na fiki usu nọ ma rrọ kugbe Kristi, mẹ jọ ukoliko Patmọs fiki ẹme nọ mẹ be ta kpahe Ọghẹnẹ gbe isẹri-ise kpahe Jesu. 10  Ẹzi na o ru omẹ jọ evaọ ẹdẹ Olori na, mẹ tẹ jọ obemu mẹ yo edo urru oruarua jọ wọhọ edo ọgba, 11  nọ o be ta nọ: “Kere eware nọ whọ be ruẹ na fihọ uko-obe re who vi ei se ikoko ihrẹ na: evaọ Ẹfisọs, evaọ Smana, evaọ Pẹgamọm, evaọ Thiatira, evaọ Sadis, evaọ Filadelfia, gbe evaọ Laodisia.” 12  Me te kuomarẹriẹ re mẹ ruẹ ohwo nọ ọ be ta ẹme kẹ omẹ na, nọ me kuomarẹriẹ, mẹ tẹ ruẹ edada-ikpẹ igoru ihrẹ, 13  yọ evaọ udevie edada-ikpẹ na mẹ ruẹ ohwo jọ nọ ọ wọhọ ọmọ ohwo, nọ o ku ewu othethei họ jẹ rehọ ẹwẹ-ohọ igoru mu udu. 14  Ofariẹ, eto uzou riẹ e jọ fuafo wọhọ uvovo ofuafo, wọhọ ekpalekpa-ame, yọ ibiaro riẹ e jọ wọhọ ebrerae, 15  awọ riẹ e jọ wọhọ ẹroo owowoma nọ o bi lo nwranwranwra evaọ ebrerae, urru riẹ o jọ wọhọ edo ame nọ o bi kporo ẹkẹre. 16  Isi ihrẹ e rrọ obọze riẹ, avọ ọgbọdọ akọava nọ ọ rrọ thethei jẹ rrọ dada nọ u wolo no unu riẹ ze, ovao riẹ u je lo wọhọ ọre nọ o bi lo nwranwranwra. 17  Nọ mẹ ruẹ e riẹ, me te kie fihọ aro riẹ wọhọ ohwo nọ o whu no. Ọ tẹ rehọ obọze riẹ kpahe omẹ ọ tẹ ta nọ: “Ozọ u mu owhẹ hẹ. Mẹ họ ọrọ Ọsosuọ gbe ọrọ Urere na, 18  gbe ọnọ ọ rrọ uzuazọ na, me whu, rekọ rri! mẹ rrọ uzuazọ bẹdẹ bẹdẹ, yọ isiavẹ uwhu gbe erọ Uki* e rrọ omẹ obọ. 19  Fikiere kere eware nọ whọ ruẹ na fihọ otọ, gbe eware nọ e be via enẹna gbe eware nọ e te via nọ enana e tẹ vrẹ no. 20  Isi ihrẹ nọ whọ ruẹ evaọ obọze mẹ na gbe edada-ikpẹ igoru ihrẹ na yọ oware udidi ọrẹri: Isi ihrẹ na i dikihẹ kẹ enyukọ ikoko ihrẹ na, edada-ikpẹ ihrẹ na i dikihẹ kẹ ikoko ihrẹ na.

Oruvẹ-Obotọ

Hayo “ọnọ ọ rrọ A gbe Z.” Alfa gbe Omẹga họ ubiẹme ọsosuọ gbe ọrọ urere evaọ ibieme Griki.
Rri oria Otofa Eme.
Hayo “Hades,” koyehọ, uki nọ a be hai ki ahwo fihọ. Rri oria Otofa Eme.