Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Rom 8:1-39

EWARE NỌ E RIẸ EVA

  • Ewo uzuazọ gbe ufuoma ẹkwoma ẹzi na (1-11)

  • Ẹzi nọ a ro ru owhai họ emọ o re se isẹri (12-17)

  • Emama a be hẹrẹ ufuoma emọ Ọghẹnẹ (18-25)

  • “Ẹzi na o re fiobọhọ kẹ omai yare” (26, 27)

  • Enọ Ọghẹnẹ ọ jiroro kpahe no anwẹdẹ (28-30)

  • Ma be kparobọ fiki uyoyou Ọghẹnẹ (31-39)

8  Fikiere enọ e rrọ usu kugbe Kristi Jesu a wo obrukpe he.  Keme uzi ẹzi ọfuafo na nọ o rẹ rọ uzuazọ kẹ enọ e rrọ usu kugbe Kristi Jesu na u si owhai no igbo uzi uzioraha gbe orọ uwhu no.  Oware nọ Uzi na o sai ru hu fiki oyẹlẹ uwo na, Ọghẹnẹ o ru rie ẹkwoma Ọmọ riẹ nọ o vi ze, ọnọ o wo oghẹrẹ oma ahwo-akpọ nọ a gba ha, re o si uzioraha no otọ. Ọ tẹ rọ ere brukpe uzioraha,  re ma sai ru eware ikiẹrẹe nọ Uzi na o gwọlọ gba ẹkwoma ekpakpọ ẹzi na nọ ma rẹ nya lele, orọnikọ orọ uwo ho.  Keme enọ e be rria lele uwo na a re fi iroro rai họ eware uwo, rekọ enọ e be rria lele ẹzi na a re fi iroro rai họ eware ẹzi na.  Keme iroro nọ a re fihọ eware uwo o rẹ wha uwhu ze, rekọ iroro nọ a re fihọ eware ẹzi o rẹ wha uzuazọ gbe udhedhẹ ze;  iroro nọ a re fihọ eware uwo u re ru ohwo họ ọwegrẹ Ọghẹnẹ, keme uwo na o rọwokugbe uzi Ọghẹnẹ hẹ, ẹhẹ, o rẹ sae jọ ere vievie he.  Fikiere ahwo nọ a bi lele isiuru uwo a rẹ sai ru Ọghẹnẹ eva were he.  Rekọ ẹzi Ọghẹnẹ ọ tẹ ginẹ rrọ owhai oma, koyehọ wha bi yeri uzuazọ nọ o rọwokugbe ẹzi na, orọnikọ uwo ho. Otẹrọnọ ohwo jọ o wo ẹzi Kristi hi, ohwo nana ọ rrọ ọriẹ hẹ. 10  Rekọ wha tẹ rrọ usu kugbe Kristi, o tẹ make rọnọ ugboma na u whu fiki uzioraha, ẹzi na ọ rẹ kẹ uzuazọ fiki ẹrẹreokie. 11  Otẹrọnọ ẹzi ọnọ ọ kpare Jesu no uwhu ze na ọ rrọ owhai oma, ọnọ ọ kpare Kristi Jesu no uwhu ze na o ti ru ugboma rai nọ u re whu na wariẹ ziọ uzuazọ ẹkwoma ẹzi riẹ nọ ọ rrọ owhai oma. 12  Fikiere, inievo, oware jọ o riẹ nọ o gba omai họ nọ ma re ru, ma rẹ rria lele isiuru uwo ho; 13  keme wha tẹ be rria lele isiuru uwo, wha ti whu hrọ; rekọ wha tẹ rọ ẹkwoma ẹzi na kpe iruemu uwo no oma rai, wha ti wo uzuazọ. 14  Keme ahwo kpobi nọ ẹzi Ọghẹnẹ ọ be kpọ yọ emọ Ọghẹnẹ. 15  Orọnikọ ẹzi nọ o re fi ohwo họ igbo ọye a kẹ owhai hi, onọ o rẹ wariẹ wha ozọ ze, rekọ a kẹ owhai ẹzi nọ a ro ru owhai họ emọ, ẹzi nọ ọ be wọ omai bo nọ: “Abba,* Ọsẹ!” 16  Ẹzi na omariẹ o re se isẹri kugbe ẹzi mai inọ mai yọ emọ Ọghẹnẹ. 17  Fikiere otẹrọnọ mai yọ emọ, mai yọ ereuku re, enọ Ọghẹnẹ ọ te kẹ ukuoriọ, ibe ereuku kugbe Kristi, thakpinọ ma lele i rie ruẹ uye re ma sai lele iei wo oruaro re. 18  Fikiere me se uye-oruẹ oke nana gboware ovo ho nọ mẹ tẹ rehọ iẹe wawo oruaro nọ a ti dhesẹ via evaọ oma mai. 19  Keme emama na e be rọ ọwhọ rẹro oke nọ a ti ro dhesẹ emọ Ọghẹnẹ via. 20  Keme o ru re emama na a yeri uzuazọ ufofe, orọnikọ fiki oreva emama na ha rekọ fiki oreva ọnọ o ru rie na, avọ ẹruore nọ ọ kẹ rai 21  inọ emama na omarai re a ti no igbo egbogbo je wo ufuoma oruaro ọrọ emọ Ọghẹnẹ. 22  Keme ma riẹ nọ emama kpobi a bi dimẹ jẹ be ruẹ uye edada kugbe rite enẹna. 23  Orọnikọ ere ọvo ho, rekọ mai omamai re nọ i wo ubi ọsosuọ na, koyehọ ẹzi na, ẹhẹ, ma be jọ eva mai dimẹ nọ ma be rọ ọwhọ hẹrẹ okenọ a ti ru omai họ emọ, okenọ a te rọ ẹkwoma ẹtanigbo na si omai no ugboma iwo mai na. 24  Keme nọ a siwi omai no igbo uzioraha ma te wo ẹruore nana; rekọ ẹruore nọ o rugba no o gbẹ rrọ ẹruore he, keme nọ ohwo ọ tẹ ruẹ oware no, kọ o re je rẹro riẹ? 25  Rekọ ma te bi rẹro oware nọ ma re ruẹ hẹ, ma rẹ rọ ọwhọ hẹrẹ iẹe avọ ithihakọ. 26  Epọvo na re, ẹzi na o re kuobọgbe fiobọhọ kẹ omai evaọ eria nọ ma jọ ga ha; keme ẹbẹbẹ na họ ma riẹ oware nọ ma rẹ lẹ kẹ hẹ wọhọ epanọ o gwọlọ, rekọ ẹzi na o re fiobọhọ kẹ omai yare nọ ma gbẹ riẹ ẹme nọ ma rẹ rọ ta idhọvẹ nọ e rrọ udu mai hi. 27  Rekọ ọnọ ọ rẹ kiẹ udu riwi na ọ riẹ oware nọ ẹzi na ọ be yare na, keme ọ be yare eware nọ e rọwokugbe oreva Ọghẹnẹ kẹ erezi na. 28  Ma riẹ nọ Ọghẹnẹ o bi ru iruo riẹ kpobi rọwokugbe ohwohwo rọkẹ ewoma enọ i you Ọghẹnẹ, enọ a se na wọhọ epaọ ẹjiroro riẹ; 29  keme ọ jiroro na no anwẹdẹ inọ enọ ọ kake rẹriẹ ovao ku na a rẹ te jọ wọhọ Ọmọ riẹ, re ọ ruẹse jọ otuyẹ evaọ udevie inievo buobu. 30  Ofariẹ, enọ ọ jiroro kpahe no anwẹdẹ na eye o se re; yọ enọ o se na eye o kuenu kẹ re inọ a kiẹrẹe. Ukuhọ riẹ, enọ o kuenu kẹ inọ a kiẹrẹe na eye ọ kẹ oruaro re. 31  Kọ eme ma rẹ ta kpahe eware nana? Ọghẹnẹ ọ tẹ rrọ abọ mai, ono ọ rẹ sae rọ suọ omai? 32  Nọ orọnọ ọ tubẹ gboke Ọmọ obọriẹ hẹ rekọ o siobọnoi re a kpei fiki mai kpobi na, kọ tei te Ọmọ na a gbẹ te rọ evawere kẹ omai eware efa kpobi? 33  Ono ọ rẹ sae ta nọ enọ Ọghẹnẹ ọ salọ na a reabe? Ọghẹnẹ họ ọnọ o kuenu kẹ ae nọ a kiẹrẹe. 34  Ono o re brukpe ai? Kristi Jesu họ ọnọ o whu, ẹhẹ, ọnọ a kpare no uwhu ze, ọnọ ọ rrọ obọze Ọghẹnẹ jẹ be yare Ọghẹnẹ kẹ omai re. 35  Ono ọ rẹ hẹriẹ omai no uyoyou Kristi? Kọ uye hayo idhọvẹ hayo ukpokpoma hayo ohọo hayo ẹbẹba hayo ozọ hayo ọgbọdọ? 36  Nwane wọhọ epanọ a kere nọ: “Fiki ra ma be rọ rẹriẹ ovao dhe uwhu kẹse kẹse; a rehọ omai wọhọ igodẹ nọ a re kpe.” 37  Ghele na, ma be kparobọ evaọ udevie eware nana kpobi ẹkwoma ọnọ o you omai na. 38  Keme u mu omẹ ẹro inọ makọ uwhu hayo uzuazọ hayo ikọ-odhiwu hayo egọmeti, hayo eware nọ e rrọ enẹna hayo eware nọ e te tha hayo ogaga 39  hayo ekpehru hayo edidi hayo omama ofa jọ kpobi o rẹ sae hẹriẹ omai no uyoyou Ọghẹnẹ hẹ onọ o rrọ eva Kristi Jesu Olori mai.

Oruvẹ-Obotọ

Ẹme ẹvẹrẹ ahwo Aremia nọ otofa riẹ o rrọ “O Ọsẹ.”