Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Rom 7:1-25

EWARE NỌ E RIẸ EVA

  • Oriruo epanọ a ro si ahwo no otọ Uzi na no (1-6)

  • Uzi o fere uzioraha via (7-12)

  • Ohọre kugbe uzioraha (13-25)

7  Inievo, kọ o sae jọnọ wha riẹ hẹ (keme mẹ be ta ẹme kẹ enọ e riẹ uzi) inọ Uzi na o rrọ olori kẹ ohwo nọ ọ rrọ otọ riẹ evaọ edẹ uzuazọ riẹ kpobi?  Wọhọ oriruo, uzi o gba aye nọ ọ rọo no họ inọ ọ rẹ jọ kugbe ọzae riẹ nọ ọzae na ọ rrọ uzuazọ; rekọ nọ ọzae riẹ o te whu, yọ o no otọ uzi ọzae riẹ no.  Fikiere nọ ọzae riẹ ọ rrọ uzuazọ na, a re sei obruẹnwae nọ ọ tẹ rọo ọzae ọfa. Rekọ nọ ọzae riẹ o te whu, yọ o no otọ uzi riẹ no, fikiere a re sei obruẹnwae he nọ ọ tẹ rọo ọzae ọfa.  Fikiere, inievo mẹ, epọvo na a ru owhai whu no ro si owhai no otọ Uzi na ẹkwoma ugboma Kristi, re wha ruẹsi zihe ruọ erọ Kristi, ọnọ a kpare no uwhu ze na, re ma mọ ubi nọ o rẹ wha orro se Ọghẹnẹ.  Keme okenọ ma jẹ rria lele isiuru uwo, isiuru iyoma nọ Uzi na o fere via na i je su oma* mai, re ma ruẹsi ru eware nọ e rẹ wha uwhu ze.  Rekọ a si omai no otọ Uzi na no, keme ma whu kẹ oyena nọ o jẹ rọ ifi gba omai na no, re ma sae jọ erigbo evaọ edhere ọkpokpọ ẹkwoma ẹzi na, orọnikọ evaọ edhere anwae na ha orọ uzi na nọ a kere fihọ otọ.  Kọ eme ma rẹ ta? Kọ Uzi na o thọ?* Vievie! Evaọ uzẹme, mẹ hae riẹ oware nọ uzioraha o rrọ họ o gbẹ rrọ Uzi na ha. Wọhọ oriruo, mẹ hae riẹ nọ urusio o thọ họ Uzi na o gbẹ ta ha inọ: “Who siuru oware omọfa vievie he.”  Rekọ fiki ujaje na, uzioraha o fere oghẹrẹ urusio kpobi nọ o rrọ eva mẹ via, keme okenọ uzi o jariẹ hẹ, uzioraha o jariẹ hẹ.  Evaọ uzẹme, evaọ okenọ uzi o jariẹ hẹ mẹ jọ uzuazọ. Rekọ nọ ujaje na o ze, uzioraha o tẹ ziọ uzuazọ, rekọ me te whu. 10  Yọ ujaje nana nọ o hai su kpohọ uzuazọ, mẹ ruẹ nọ u su kpohọ uwhu. 11  Fiki ujaje na, uzioraha o ruẹ uvẹ bẹbẹ omẹ họ, o tẹ rọ ẹkwoma riẹ kpe omẹ. 12  Fikiere Uzi na omariẹ o rrọ ọrẹri, yọ ujaje na o rrọ ọrẹri je kiẹrẹe je woma. 13  Kọ oware uwoma o wha uwhu se omẹ na? Vievie! Rekọ uzioraha oye o rehọ ẹkwoma oware uwoma wha uwhu se omẹ re o ruẹsi dhesẹ oware nọ uzioraha o rrọ via. Yọ ujaje na u dhesẹ via nọ uzioraha u yoma gaga. 14  Keme ma riẹ nọ obọ Ọghẹnẹ Uzi na u no ze, rekọ mẹ uwo, a zẹ omẹ fihọ otọ uzioraha. 15  Keme me wo otoriẹ oware nọ me bi ru hu. Keme oware nọ mẹ gwọlọ ru, me bi ru ei hi, rekọ oware nọ me mukpahe me bi ru. 16  Rekọ otẹrọnọ oware nọ mẹ gwọlọ ru hu oye me bi ru, mẹ rọwo nọ Uzi na u woma. 17  Fikiere orọnikọ mẹ o bi ru eware nana ha, rekọ uzioraha nọ o rrọ eva mẹ. 18  Keme mẹ riẹ nọ oware uwoma ovo o rrọ eva mẹ hẹ, koyehọ evaọ uwo mẹ; keme mẹ gwọlọ ru oware uwoma, rekọ me wo ẹgba nọ me re ro ru ei hi. 19  Keme oware uwoma nọ mẹ gwọlọ ru me bi ru ei hi, rekọ oware uyoma nọ mẹ gwọlọ ru hu oye me bi ru. 20  Otẹrọnọ oware nọ mẹ gwọlọ ru hu oye me bi ru, kiyọ mẹ o bi ru ei na ha, rekọ uzioraha nọ o rrọ eva mẹ. 21  Fikiere mẹ jọ oma mẹ vuhu uzi nana mu: Nọ mẹ tẹ gwọlọ ru oware nọ u kiehọ, kọ oware uyoma me re ru. 22  Evaọ udu mẹ, o rrọ isiuru mẹ re me koko uzi Ọghẹnẹ, 23  rekọ mẹ be jọ oma mẹ ruẹ uzi ofa jọ nọ o be họre so uzi iroro mẹ, u te bi ru omẹ jọ igbo kẹ uzi uzioraha nọ o rrọ oma* mẹ. 24  Me fioka ohwo ho! Ono o ti siwi omẹ no ugboma nana nọ u bi su omẹ kpohọ uwhu na? 25  Uyere u te Ọghẹnẹ ẹkwoma Jesu Kristi Olori mai! Fikiere, mẹ rrọ ọrigbo kẹ uzi Ọghẹnẹ evaọ iroro mẹ, rekọ evaọ uwo mẹ, mẹ rrọ ọrigbo kẹ uzi uzioraha.

Oruvẹ-Obotọ

Evaọ Griki, “ekwakwa oma.”
Evaọ Griki, “uzioraha.”
Evaọ Griki, “ekwakwa oma.”