Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Rom 6:1-23

EWARE NỌ E RIẸ EVA

  • Uzuazọ okpokpọ ẹkwoma ame-ọhọ fihọ Kristi (1-11)

  • Wha kuvẹ hẹ re uzioraha u su evaọ ugboma rai (12-14)

  • No erigbo uzioraha kpohọ erigbo Ọghẹnẹ (15-23)

    • Osohwa uzioraha họ uwhu; okẹ Ọghẹnẹ họ uzuazọ (23)

6  Kọ eme ma rẹ ta? Kọ ma rẹ ruabọhọ uzioraha re Ọghẹnẹ ọ ruẹsi dhesẹ uwowou ulogbo buobu kẹ omai?  Vievie! Nọ ma no igbo uzioraha no na, kọ ma rẹ gbẹ jọ eva riẹ yeri?  Hayo kọ wha gbẹ riẹ nọ mai kpobi nọ e họ-ame fihọ Kristi Jesu na e họ-ame fihọ uwhu riẹ?  Fikiere a ki omai kugbei ẹkwoma ame nọ ma họ fihọ uwhu riẹ, re wọhọ epanọ a kpare Kristi no uwhu ze ẹkwoma oruaro Ọsẹ na, ere ọvona ma re yeri uzuazọ okpokpọ re.  Otẹrọnọ ma kuomagbei evaọ oghẹrẹ uwhu nọ o whu, ma ti kuomagbei re evaọ oghẹrẹ ẹkparomatha riẹ.  Keme ma riẹ nọ a tehe uruemu anwae mai fihọ ure na kugbei, re oma uzioraha mai o siọ omai ba esu, re ma gbẹ jọ erigbo kẹ uzioraha ha.  Keme ọnọ o whu no yọ ọ hwosa* uzioraha riẹ no.  Ofariẹ, otẹrọnọ ma lele Kristi whu, ma rọwo nọ ma te rria kugbei re.  Keme ma riẹ nọ enẹna nọ a kpare Kristi no uwhu ze no na, o gbe ti whu ofa ha; uwhu nọ o wọhọ olori na u gbe wo ogaga evaọ oma riẹ hẹ. 10  Keme uwhu nọ o whu na, o whu ẹsiẹvo rọkẹ oke kpobi re o si uzioraha no otọ, rekọ uzuazọ nọ ọ be rria, ọ be rria re o ru oreva Ọghẹnẹ. 11  Epọvo na re, wha rri omarai nọ wha whu kẹ uzioraha no rekọ wha be rria uzuazọ re wha ru oreva Ọghẹnẹ ẹkwoma Kristi Jesu. 12  Fikiere, wha kuvẹ hẹ re uzioraha u gbe su owhai wọhọ ovie evaọ ugboma rai nana nọ u re whu na, re wha ru lele isiuru ugboma rai. 13  Yọ wha gbẹ rehọ oma* rai kẹ uzioraha ha wọhọ ekwakwa nọ e rrọ rọkẹ emuemu, rekọ wha rehọ oma rai kẹ Ọghẹnẹ wọhọ enọ e kparoma no uwhu ze no, wha vẹ jẹ rehọ oma* rai kẹ Ọghẹnẹ wọhọ ekwakwa nọ e rrọ rọkẹ ẹrẹreokie. 14  Keme uzioraha o rẹ jọ olori kẹ owhai hi nọ orọnọ wha rrọ otọ uzi hi na rekọ otọ uwowou ulogbo. 15  Kọ eme ma rẹ sae ta? Kọ ma rẹ raha uzi fikinọ ma rrọ otọ uzi hi rekọ otọ uwowou ulogbo? Vievie! 16  Kọ wha gbẹ riẹ nọ wha tẹ be roma kẹ ohwo jọ wọhọ erigbo nọ i re yoẹme, whai yọ erigbo kẹ ọnọ wha bi yoẹme kẹ na, o gbẹ rrọ igbo uzioraha nọ u re su kpohọ uwhu hu o vẹ jọ orọ ẹmeoyo nọ u re su kpohọ ẹrẹreokie? 17  Rekọ uyere u te Ọghẹnẹ inọ dede nọ wha jọ erigbo kẹ uzioraha vẹre, wha yoẹme no udu ze kẹ uwuhrẹ nọ a rehọ owhai ziọ otọ riẹ na. 18  Ẹhẹ, nọ a si owhai no igbo uzioraha no na, wha te zihe ruọ erigbo ẹrẹreokie. 19  Eme nọ i re vẹ ahwo-akpọ ẹro mẹ be rọ ta ẹme kẹ owhai na fiki uwo rai nọ o ga ha; nwane wọhọ epanọ wha rehọ ekwakwa oma rai ru erigbo kẹ egbegbe avọ emuemu nọ u re su kpohọ uzioraha na, enẹna wha rehọ ekwakwa oma rai ru erigbo kẹ ẹrẹreokie nọ u re su kpohọ ẹfuọ. 20  Keme okenọ wha jọ erigbo kẹ emuemu, wha jọ otọ ẹrẹreokie he. 21  Oghẹrẹ ubi vẹ wha jẹ mọ evaọ oke yena? Eware nọ e be vuọ owhai oma enẹna. Keme uwhu họ ekuhọ eware yena. 22  Rekọ, enẹna nọ a si owhai no otọ igbo uzioraha no nọ wha je zihe ruọ erigbo kẹ Ọghẹnẹ no na, wha be mọ ubi evaọ edhere ẹfuọ, yọ uzuazọ ebẹdẹ bẹdẹ u ti noi ze. 23  Keme uwhu họ osohwa uzioraha, rekọ okẹ nọ Ọghẹnẹ ọ rẹ kẹ họ uzuazọ ebẹdẹ bẹdẹ ẹkwoma Kristi Jesu Olori mai.

Oruvẹ-Obotọ

Hayo “siobọnoi no; rọvrẹ riẹ no.”
Evaọ Griki, “ekwakwa oma.”
Evaọ Griki, “ekwakwa oma.”