Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Rom 15:1-33

EWARE NỌ E RIẸ EVA

  • Wha dede ohwohwo rehọ wọhọ epanọ Kristi o ru (1-13)

  • Pọl, ọgbodibo kẹ erẹwho na (14-21)

  • Omaa erẹ Pọl (22-33)

15  Rekọ u fo re mai nọ e ga a hai fiobọhọ kẹ enọ e ga ha evaọ ẹrọwọ je thihakọ kẹ ai, orọnikọ ma re ru eva were omobọ mai hi.  Jọ mai omomọvo o ru eware nọ e rẹ kẹ ọrivẹ riẹ erere, re ọ bọe ga.  Keme makọ Kristi o ru omobọ riẹ eva were he, rekọ wọhọ epanọ a kere nọ: “Eka nọ ahwo a be la owhẹ i hwẹ ku uzou mẹ no.”  Keme eware kpobi nọ a kere fihọ otọ anwẹdẹ na a kere ai re ma wuhrẹ no ai ze, re ma rọ ẹkwoma ithihakọ mai gbe omosasọ nọ u re no Ikereakere na ze wo ẹruore.  Jọ Ọghẹnẹ nọ ọ rẹ kẹ ithihakọ gbe omosasọ na o fiobọhọ kẹ owhai re wha jọ udevie rai wo oghẹrẹ iroro Kristi Jesu,  re wha rehọ okugbe gbe urru* ovo rọ oruaro kẹ Ọghẹnẹ gbe Ọsẹ Olori mai, Jesu Kristi.  Fikiere, wha dede ohwohwo rehọ,* wọhọ epanọ Kristi o dede omai rehọ na, re o wha oruaro se Ọghẹnẹ.  Keme mẹ be ta kẹ owhai nọ Kristi o zihe ruọ ọgbodibo enọ e yawo re ọ ruẹsi dhesẹ nọ Ọghẹnẹ ọ rẹ ta uzẹme, re o kẹ imuẹro inọ Ọghẹnẹ o ti ru eyaa nọ Ọ ya kẹ esẹ-ode rai gba,  gbe re erẹwho na a sae kẹ Ọghẹnẹ oruaro fiki ohrọ-oriọ riẹ. Nwane wọhọ epanọ a kere nọ: “Oyejabọ nọ mẹ te rọ jọ ẹgbede jiri owhẹ evaọ udevie erẹwho, yọ mẹ te so ole jiri odẹ ra.” 10  Ọ tẹ jẹ ta nọ: “Whai erẹwho, wha ghọghọ kugbe ahwo riẹ.” 11  Gbe inọ: “Wha jiri Jihova,* whai erẹwho na kpobi, jọ ahwo na kpobi a jiri ei.” 12  Aizaya ọ tẹ jẹ ta nọ: “Owọ-ure Jẹsi ọ te tha, ọnọ o ti su erẹwho buobu; erẹwho a ti fi ẹruore rai họ iẹe.” 13  Jọ Ọghẹnẹ nọ ọ rẹ kẹ ẹruore na ọ kẹ owhai oghọghọ gbe udhedhẹ ulogbo fiki eva nọ wha fihọ iẹe, re ẹruore rai ọ ruẹse jọ gaga ẹkwoma ogaga ẹzi ọfuafo na. 14  Whaọ mẹ omamẹ me wo imuẹro kpahe owhai, inievo mẹ, inọ ewoma-oruo ọ da owhai oma fia, inọ wha wo eriariẹ kpobi gbe nọ wha be sae kẹ ohwohwo ohrẹ.* 15  Rekọ, me kere kpahe ugogo eware jọ vevẹ se owhai, re mẹ rọ wariẹ kareghẹhọ owhai, fiki uwowou ulogbo nọ Ọghẹnẹ o dhesẹ kẹ omẹ 16  re mẹ jọ ọgbodibo ọrọ Kristi Jesu rọkẹ erẹwho na. Me bi ru iruo ọrẹri orọ ewhowho usi uwoma Ọghẹnẹ, re erẹwho nana e sae jọ idhe nọ Ọghẹnẹ ọ rẹ jẹrehọ, onọ ẹzi ọfuafo o ru fo no. 17  Fikiere me wo ẹjiroro nọ mẹ rẹ rọ ghọghọ evaọ Kristi Jesu kpahe eware nọ e rrọ erọ Ọghẹnẹ. 18  Keme mẹ rẹ rọ udu obọmẹ ta kpahe oware ovo ho ajokpaọ eware nọ Kristi ọ rọ ẹkwoma mẹ ru re erẹwho na a sai yoẹme. O ru onana ẹkwoma eme gbe iruo mẹ, 19  eware eka gbe eware igbunu, ogaga ẹzi Ọghẹnẹ, fikiere no Jerusalẹm gbe ewho nọ e wariẹ oyena họ je rite ugbobọ Ilirikọm, mẹ romatotọ whowho usi uwoma kpahe Kristi. 20  Enẹ mẹ rọ gbaemu re mẹ siọ usi uwoma na ba ẹta evaọ oria nọ a jọ ta kpahe odẹ Kristi no, re mẹ gbẹ bọ họ otọhotọ omọfa ha; 21  rekọ wọhọ epanọ a kere nọ: “Enọ a re ta kẹ kpahe iẹe he a te ruẹ, yọ enọ i ri yo kpahe iẹe he a ti wo otoriẹ.” 22  Onana o whaha omẹ unuẹse buobu re nọ mẹ gbẹ re rọ nya bru owhai ze he. 23  Rekọ enẹna, ẹkwotọ ọvo o gbe kiọkọ eria enana ha nọ mẹ re jọ ta usi uwoma na ha, yọ anwọ ikpe buobu* ze na o rrọ isiuru mẹ re mẹ nya bru owhai ze. 24  Fikiere me bi rẹro nọ okenọ me ti kpobọ Spen, mẹ te ruẹ owhai, wha ve je su omẹ họ aro nọ mẹ tẹ raha oke jọ kugbe owhai no. 25  Rekọ obọnana mẹ gwọlọ ruọ edhere kpobọ Jerusalẹm re mẹ nyae gbodibo kẹ erezi na. 26  Keme inievo nọ e rrọ Masidonia avọ Akeya a rọ evawere zọhọ eware rai ze bi ro se iyogbere nọ e rrọ udevie erezi na evaọ obọ Jerusalẹm. 27  Uzẹme, evawere a ro ru ere, ẹhẹ, a reosa rai; keme otẹrọnọ erẹwho na a bi wo erere no iruo nọ erezi na a bi ru evaọ egagọ Ọghẹnẹ ze, o gba rai họ nọ a rẹ rehọ eware nọ a wo rọ gbodibo kẹ ae. 28  Fikiere nọ mẹ tẹ rehọ eware nọ a zọhọ ze na te ai oma gbẹsinẹdẹ no, mẹ te nya orọ oborai re mẹ ruẹ owhai nọ me ti kpobọ Spen. 29  Ofariẹ, mẹ riẹ nọ okenọ mẹ te nya bru owhai ze, mẹ te wha eghale buobu no obọ Kristi ze. 30  Whaọ inievo, mẹ be rọ ẹkwoma Olori mai Jesu Kristi gbe uyoyou orọ ẹzi na tuduhọ owhai awọ, inọ wha lele omẹ lẹ gaga se Ọghẹnẹ rọkẹ omẹ, 31  re a sai siwi omẹ no obọ enọ e rrọ ilele Jesu hu evaọ Judia gbe re erezi na a sae jẹ eware nọ mẹ be wha kpobọ Jerusalẹm na rehọ, 32  re nọ o tẹ rrọ oreva Ọghẹnẹ, mẹ vẹ te nya bru owhai ze avọ oghọghọ, ma ve wo omosasọ kugbe. 33  Ajọ Ọghẹnẹ nọ ọ rẹ kẹ udhedhẹ na ọ jọ kugbe owhai kpobi. Ami.

Oruvẹ-Obotọ

Evaọ Griki, “unu.”
Hayo “jẹ ohwohwo rehọ.”
Rri oria Otofa Eme.
Hayo “wuhrẹ ohwohwo.”
Hayo o sae jọ nọ, “ikpe jọ.”