Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Rom 14:1-23

EWARE NỌ E RIẸ EVA

  • Wha brukpe ohwohwo ho (1-12)

  • Who ru amọfa zoruẹ hẹ (13-18)

  • Ru eware nọ e rẹ wha udhedhẹ gbe okugbe ze (19-23)

14  Dede ohwo nọ ẹrọwọ riẹ ọ ga ha rehọ, rekọ who bruoziẹ hẹ evaọ oware nọ ahwo a jọ wo ọvuọ iroro riẹ.  Ẹrọwọ ohwo jọ ọ rẹ sae kẹe uvẹ re oware kpobi, rekọ ohwo nọ ẹrọwọ riẹ ọ ga ha ọ sae gwọlọ re ẹbe ọvo.  Jọ ọnọ ọ be re o rri ọnọ ọ be re he vo ho, yọ ọnọ ọ be re he o brukpe ọnọ ọ be re na ha, keme Ọghẹnẹ o dede ohwo yena rehọ no.  Whẹ yọ ono nọ o re brukpe odibo omọfa? Olori riẹ họ ọnọ ọ rẹ ta sọ o dikihẹ hayo o kie. Yọ o ti dikihẹ keme Jihova* ọ rẹ sai ru ei dikihẹ.  Ohwo jọ ọ sai rri ẹdẹ jọ inọ ọ rro vi ẹdẹ ọfa; omọfa ọ sai rri edẹ na kpobi ẹrẹrẹe; jọ ohwo kpobi ọ ruẹ inọ eriwo riẹ na o mu rie ẹro ziezi evaọ udu riẹ.  Ohwo nọ o bi koko ẹdẹ na, o bi koko iei rọ kẹ Jihova* orro. Yọ ọnọ ọ be re, ọ be re rọ kẹ Jihova* orro, keme ọ be lẹ yere Ọghẹnẹ; yọ ọnọ ọ be re he, o bi ru ei rọ kẹ Jihova* orro keme ọ be lẹ yere Ọghẹnẹ.  Evaọ uzẹme, mai ọvuọvo ọ be rria kẹ omobọ riẹ ọvo ho, yọ ohwo ọvo o re whu kẹ omobọ riẹ ọvo ho.  Keme ma tẹ rrọ uzuazọ, ma rrọ uzuazọ kẹ Jihova,* yọ ma te whu, ma whu kẹ Jihova.* Fikiere, ma tẹ rrọ uzuazọ hayo ma whu, Jihova* o wo omai.  Keme fiki onana Kristi o ro whu jẹ wariẹ ziọ uzuazọ, re ọ ruẹse jọ Olori ọrọ enọ i whu no gbe enọ e rrọ uzuazọ. 10  Kọ fikieme who bi ro brukpe oniọvo ra? Hayo fikieme who bi ro rri oniọvo ra inọ o fioka ha? Keme mai kpobi ma ti dikihẹ aro akaba oziẹobro Ọghẹnẹ. 11  Keme a kere nọ: “‘Nọ mẹ rrọ uzuazọ na,’ ere Jihova* ọ ta, ‘ighilawọ kpobi i ti kigwẹ kẹ omẹ, yọ ẹrọo kpobi o ti jiri Ọghẹnẹ.’” 12  Fikiere, mai omomọvo o ti gu ẹkẹ-unu riẹ kẹ Ọghẹnẹ. 13  Fikiere, jọ ma gbe brukpe ohwohwo ho, rekọ gbaemu nọ who re fi utho ezoruẹ họ kẹ oniọvo ho hayo oware nọ u re gele iei kie. 14  Mẹ riẹ, u te je mu omẹ ẹro evaọ Olori na Jesu inọ oware ovo o rrọ gbegbe he; ajokpaọ okenọ ohwo o te rri oware gbegbe ẹsiẹe o rẹ jọ gbegbe kẹe. 15  Keme otẹrọnọ who bi ru oniọvo ra eva dha fiki emu, kiyọ who gbe bi dhesẹ uyoyou hu. Whọ rehọ emu ra ro kpe ẹrọwọ ohwo yena ha, ọnọ Kristi o whu kẹ na. 16  Fikiere, who ru re a ta eme iyoma kpahe ewoma nọ who bi ru hu. 17  Keme orọnọ ẹkwoma emuọriọ gbe idieda a rẹ rọ ruọ Uvie Ọghẹnẹ hẹ, rekọ ẹkwoma ẹrẹreokie gbe udhedhẹ gbe oghọghọ nọ ẹzi ọfuafo o re ru ohwo wo. 18  Keme ohwo kpobi nọ ọ be rọ enẹ gbodibo kẹ Kristi ọ rẹ were Ọghẹnẹ jẹ were ahwo. 19  Fikiere, joma hai ru eware nọ e rẹ wha udhedhẹ ze gbe eware nọ e rẹ bọ ohwohwo ga. 20  Wha siọ iruo Ọghẹnẹ ba ẹraha fiki emuore gheghe. Ginọ uzẹme inọ eware kpobi e rrọ fuafo, rekọ o rẹ jọ oware enwoma re ohwo ọ re emu otẹrọnọ o te wha ezoruẹ ze. 21  O mai woma re ohwo ọ siọ arao ba ẹre, siọ udi ba ẹda, hayo oware ofa jọ kpobi nọ o rẹ lẹliẹ oniọvo ra zoruẹ. 22  Jọ ẹrọwọ ra o jọ onọ o rẹ jọ udevie ra avọ Ọghẹnẹ. Jọ eva e were ohwo nọ o brukpe omariẹ hẹ evaọ oware nọ ọ jiroro riẹ nọ u kiehọ. 23  Rekọ o te wo avro, yọ o wo obrukpe no nọ ọ tẹ re, keme ọ be re avọ ẹrọwọ họ. Evaọ uzẹme, oware kpobi nọ a rọ ẹrọwọ ru hu yọ uzioraha.

Oruvẹ-Obotọ

Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.