Kpohọ eme nọ e riẹ eva

Kpohọ oria izoẹme

Ahwo Rom 12:1-21

EWARE NỌ E RIẸ EVA

  • Wha rehọ omarai dhe idhe nọ e rrọ uzuazọ (1, 2)

  • Ekẹ sa-sa, rekọ ugboma ọvo (3-8)

  • Ohrẹ epanọ Oleleikristi o re yeri uzuazọ (9-21)

12  Fikiere, inievo, mẹ be rehọ ohrọ-oriọ Ọghẹnẹ rọ lẹ owhai inọ wha rehọ oma rai dhe idhe nọ e rrọ uzuazọ, ọrẹri, onọ Ọghẹnẹ ọ rẹ jẹrehọ, re wha rọ enẹ rehọ ẹgba iroro rai gọe.  Wha gbẹ kuvẹ re uyero-akpọ nana o kpọ* owhai hi, rekọ wha nwene oghẹrẹ ohwo nọ wha rrọ ẹkwoma iroro rai nọ wha re nwene, re wha sai ru omarai wo imuẹro kpahe oware nọ o rrọ oreva Ọghẹnẹ nọ u woma, nọ o rẹ were iẹe, jẹ rrọ gbagba.  Keme fiki uwowou ulogbo nọ a dhesẹ kẹ omẹ, mẹ be ta kẹ owhai kpobi inọ ajọ ohwo ọvo o roro omariẹ kpehru vi epanọ u fo ho, rekọ wha roro evaọ oghẹrẹ nọ u re dhesẹ nọ wha wo iroro egbagba, wọhọ epaọ utho ẹrọwọ nọ Ọghẹnẹ ọ kẹ* omomọvo.  Keme wọhọ epanọ ma wo ekwakwa sa-sa evaọ ugboma ovona, rekọ aikpobi a wo iruo evona ha na,  ere ọvona, dede nọ ma rrọ buobu, mai yọ ugboma ọvo evaọ usu kugbe Kristi, rekọ mai omomọvo yọ ekwakwa nọ e jẹhọ ohwohwo.  Nọ orọnọ ma wo ekẹ sa-sa wọhọ epaọ uwowou ulogbo nọ a dhesẹ kẹ omai na, o tẹ rrọ orọ eruẹaruẹ, joma ruẹaro wọhọ epaọ ẹrọwọ nọ ma wo;  hayo o tẹ rrọ odibọgba, joma ruabọhọ odibọgba na; hayo ọnọ o re wuhrẹ, jọ ọ ruabọhọ ewuhrẹ riẹ;  hayo ọnọ ọ rẹ tuduhọ ahwo awọ,* jọ ọ kẹ uduotahawọ;* ọnọ ọ be kẹ, jọ ọ kẹ buobu; ọnọ ọ be sẹro, jọ ọ romatotọ ru ei avọ ọwhọ; ọnọ ọ rẹ re ohrọ, jọ o ru ei avọ evawere.  Jọ uyoyou rai o jọ ababọ eviẹhọ. Rọ udu ra kpobi mukpahe oware uyoma; talamu oware uwoma. 10  Wha wo uvi uyoyou-inievo kẹ ohwohwo. Evaọ ọghọ ọrọkẹ ohwohwo, kobaro.* 11  Wha goma iruo,* wha moyẹlẹ hẹ. Jọ ẹzi na o fi ọwhọ họ owhai oma. Gbodibo kẹ Jihova.* 12  Wha ghọghọ evaọ ẹruore na. Thihakọ evaọ otọ uye. Ruabọhọ olẹ. 13  Wha ghale eware nọ wha wo kugbe erezi na wọhọ epaọ ẹgwọlọ rai. Wo uruemu ọrara-odederehọ. 14  Wha hae lẹ olẹ ewoma kẹ enọ i bi kpokpo owhai; wha lẹ olẹ ewoma kẹ ahwo, wha duwu ahwo iyei hi. 15  Lele enọ e be ghọghọ ghọghọ; lele enọ e be viẹ viẹ. 16  Wha ru amọfa epanọ wha bi ru omarai; wha fi iroro rai họ ikpeware he,* rekọ wha roma kẹ eware esese. Wha rri omarai inọ wha wo areghẹ gaga ha. 17  Wha rọ eyoma hwosa eyoma kẹ ohwo ọvo ho. Wha roro kpahe oware nọ ahwo kpobi a rri nọ u woma.* 18  O tẹ lọhọ, wha dawo ẹgba rai kpobi re wha lele ahwo kpobi rria dhedhẹ. 19  Iyoyou, wha kioja kẹ omobọ rai hi, rekọ wha kuvẹ kẹ ofu Ọghẹnẹ; keme a kere nọ: “‘Orukele ọmẹ; mẹ te hwa zihe,’ ere Jihova* ọ ta.” 20  Rekọ “ohọo u te bi kpe ọwegrẹ ra, kẹe emu re; uruame u te bi kpei, kẹe oware nọ ọ rẹ da; keme ẹkwoma enẹ oruo, who ti koko iwowo-erae fihọ iẹe uzou.”* 21  Whọ kuvẹ re eyoma o fi owhẹ kparobọ họ, rekọ hae rehọ ewoma ro fi eyoma kparobọ.

Oruvẹ-Obotọ

Hayo “ma.”
Hayo “ghale kẹ.”
Hayo “kẹ ohrẹ.”
Hayo “ohrẹ.”
Hayo “mu ei họ.”
Hayo “romatotọ ru iruo; wo ajọwha.”
Rri oria Otofa Eme.
Hayo “wo okpiroro ho.”
Hayo “nọ u woma evaọ aro ahwo kpobi.”
Rri oria Otofa Eme.
Koyehọ, re u ru udu ohwo na lọhọ jẹ ghra eyoma riẹ no.