Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 9:1-28

EWARE NỌ E RIẸ EVA

  • Ẹgọ Ọghẹnẹ evaọ etẹmpol otọakpọ na (1-10)

  • Kristi ọ ruọ odhiwu avọ azẹ riẹ (11-28)

    • Obruthe ọvọ ọkpokpọ (15)

9  Ọvọ ọsosuọ na o wo izi nọ a re lele evaọ ẹgọ Ọghẹnẹ, u te je wo oria ọrẹri evaọ otọakpọ.  Keme uwou-udhu egagọ nọ a bọ na u wo ubrukpẹ ọsosuọ onọ eware nana e jọ: adada-ukpẹ na gbe emẹjẹ na avọ ebrẹdi nọ a ro mudhe kẹ Ọghẹnẹ* nọ a fihọ iẹe; yọ a se rie Oria Ọrẹri na.  Rekọ ubrukpẹ obeva uwou-udhu egagọ na nọ a se Ọrẹri Erẹri na o jọ obemu ekọtini avọ ivẹ na.  Eware nọ e jọ oria Ọrẹri Erẹri na họ, omodhe insẹnse emahọ nọ a rọ igoru ru gbe okọ ọvọ na nọ a tehe igoru tamu omariẹ soso. Yọ omothẹ igoru nọ a fi emana họ gbe ọkpọ Erọn nọ ọ dhẹ idodo gbe ewẹ-itho eme ọvọ na e jọ evaọ okọ ọvọ na;  yọ emema cherub ivẹ nọ i bi lo e jọ ehru okọ ọvọ na, nọ ẹwoho rai o ruru ururu ọruẹrẹhọ* na. Rekọ orọnọ oke nana ma rẹ rọ ta eme buobu kpahe eware nana ha.  Nọ a ru eware nana enẹ no, izerẹ na a jẹ hae ruọ ubrukpẹ ọsosuọ uwou-udhu egagọ na kẹse kẹse nyai ru iruo ọrẹri;  rekọ ozerẹ okpehru na ọvo ọ rẹ ruọ ubrukpẹ avọ ivẹ na ẹsiẹvo ẹgbukpe, yọ ọ rẹ ruọ eva ababọ azẹ hẹ, onọ o re ro dhe idhe kẹ omariẹ jẹ rọkẹ izieraha ahwo na nọ a rọ ogbori raha.  Fikiere ẹzi ọfuafo na o dhesẹ vevẹ nọ okenọ uwou-udhu egagọ ọsosuọ na o jariẹ yọ a ri dhesẹ edhere nọ a rẹ rọ ruọ oria ọrẹri na via ha.  Uwou-udhu egagọ nana o rrọ oware oriruo kẹ oke nana, yọ evaọ ọruẹrẹfihotọ yena, a jẹ kẹ ekẹ je dhe idhe. Rekọ eware nana e rẹ sai ru obruoziẹ-iroro ohwo nọ ọ be gọ Ọghẹnẹ jọ gbagba ha. 10  Eware nọ i wobọ kpahe kpobi họ emu gbe idi gbe oghoghẹrẹ idhere nọ a rẹ rọ wozẹ oma hayo eware.* E jọ izi nọ i kie kpahe ugboma na, yọ a je lele ai bọo oke nọ a fihọ nọ a rẹ rọ kpọ eware vi. 11  Rekọ nọ Kristi ọ nyaze wọhọ ozerẹ okpehru ọrọ emamọ eware nọ e via no na, ọ nya uwou-udhu egagọ nọ o mae rro jẹ mae rrọ gbagba na vrẹ, onọ a rọ abọ bọ họ, koyehọ, orọ otọakpọ na ha. 12  Ọ ruọ oria ọrẹri na, orọnikọ avọ azẹ ewe gbe ọrọ emọ iruẹ hẹ, rekọ avọ azẹ obọriẹ, onọ o ru ẹsiẹvo rọkẹ oke kpobi, ọ tẹ wha esiwo* ebẹdẹ bẹdẹ se omai. 13  Keme otẹrọnọ azẹ ewe gbe ọrọ iruẹ gbe enwo ọmọ eruẹ nọ a frẹ ku enọ i zue oma u re ru ai fo evaọ ugboma, 14  ẹvẹ azẹ Kristi, ọnọ ọ rọ ẹkwoma ẹzi ebẹdẹ bẹdẹ na rọ omariẹ dhe idhe nọ o kare epe kẹ Ọghẹnẹ, u re ru obruoziẹ-iroro mai fo no iruo ifofe te re ma sae gọ Ọghẹnẹ nọ ọ rrọ uzuazọ na? 15  Oyejabọ nọ ọ rọ rrọ obruthe ọvọ ọkpokpọ, keme o whu rọ hwa osa ẹtanigbo ro si ai no igbo izieraha nọ a raha evaọ otọ ọvọ ọsosuọ na, re enọ a se na a ruẹsi wo eyaa ukuoriọ ebẹdẹ bẹdẹ na. 16  Keme nọ a tẹ re ọvọ, o rẹ gwọlọ nọ ohwo-akpọ nọ ọ re ọvọ na* o re whu, 17  keme uwhu u re ru ọvọ wo iruo, nọ orọnọ ọvọ o re wo iruo ho na nọ ohwo-akpọ nọ ọ re ọvọ na ọ tẹ gbẹ rrọ uzuazọ. 18  Fikiere ọvọ ọsosuọ na o mu iruo họ ababọ azẹ hẹ. 19  Keme nọ Mosis ọ fodẹ ijaje kpobi nọ e rrọ evaọ Uzi na kẹ ahwo na kpobi no, ọ tẹ rehọ azẹ emọ iruẹ gbe ọrọ ewe ọ tẹ rọ ame gwae. Ọ tẹ rehọ umure hisọp nọ ọ gba omohọ owawae fihọ rọ frẹ azẹ na ku obe* na gbe ahwo na kpobi, 20  ọ tẹ ta nọ: “Onana họ azẹ ọvọ na onọ Ọghẹnẹ o jie uzi kẹ owhai nọ wha re koko.” 21  Ọ tẹ jẹ frẹ azẹ na ku uwou-udhu egagọ na gbe ekwakwa kpobi nọ a bi ro ru iruo ọrẹri na. 22  Ẹhẹ, wọhọ epanọ o jọ evaọ otọ Uzi na, azẹ a re ro ru enwenọ eware kpobi fo, yọ ajokpanọ azẹ o hwẹ, a re wo erọvrẹ izieraha ha. 23  Fikiere, o gwọlọ nọ a rẹ rọ idhere nana ro ru eware nọ e rrọ oriruo eware obọ odhiwu na fo, rekọ eware obọ odhiwu na e gwọlọ idheidhe nọ i woma vi enana. 24  Keme orọnikọ oria ọrẹri nọ a rọ abọ bọ oye Kristi ọ ruọ eva ha, onọ o rrọ oriruo ugogo oria na, rekọ ọ ruọ odhiwu dẹẹ, re ọ hae romavia evaọ aro Ọghẹnẹ fiki mai. 25  Orọnikọ o ru onana re ọ hae rọ omariẹ dhe idhe kẹse kẹse he, wọhọ epanọ ozerẹ okpehru na ọ jẹ hae ruọ eva oria ọrẹri na kukpe kukpe avọ azẹ nọ ọ rrọ ọriẹ hẹ. 26  O hae jọ ere, ọ hae ruẹ uye unuẹse buobu no emuhọ akpọ na ze.* Rekọ enẹna ọ romavia ẹsiẹvo rọkẹ oke kpobi evaọ urere uyero-akpọ* na re o si uzioraha no ẹkwoma omariẹ nọ o ro dhe idhe. 27  Yọ wọhọ epanọ ahwo a re whu ẹsiẹvo, kẹsena a ve gu ai ẹdhọ na, 28  ere Kristi ọ rọ omariẹ dhe idhe ẹsiẹvo rọkẹ oke kpobi re ọ wha izieraha ahwo buobu vrẹ; yọ orọ avọ ivẹ nọ ọ te romavia, o te jọ re ọ wha uzioraha vrẹ hẹ, yọ enọ e be rọ ọwhọ gwọlọ iẹe re o siwi ai a te ruẹ e riẹ.

Oruvẹ-Obotọ

Hayo “ebrẹdi udhesẹ.”
Rri oria Otofa Eme.
Evaọ Griki, “oghoghẹrẹ ame-ọhọ.”
Evaọ Griki, “ẹtanigbo.”
Hayo “obruthe ọvọ nọ a re.”
Hayo “uko-obe.”
Onana u dhesẹ okenọ Adamu avọ Ivi a ro mu emọ họ eyẹ.
Rri oria Otofa Eme.