Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 7:1-28

EWARE NỌ E RIẸ EVA

  • Mẹlkizẹdẹk yọ ozerẹ gbe ovie oghẹrẹsa (1-10)

  • Epanọ ọkwa-ozerẹ Kristi o mai ro woma (11-28)

    • Kristi ọ sai siwi ahwo riẹriẹriẹ (25)

7  Mẹlkizẹdẹk nana, ovie Salẹm, ozerẹ Ọghẹnẹ nọ Ọ Mai Kpehru na, o zere Abraham okenọ Abraham o je zihe kpozi no ohọre nọ o jo fi ivie na kparobọ, ọ tẹ lẹ ẹro eghale kẹe,  Abraham ọ tẹ kẹe abọvo abakpe eware kpobi. Orọ ọsosuọ, otofa odẹ riẹ họ “Ovie Ẹrẹreokie,” ọ tẹ jẹ rrọ ovie Salẹm, koyehọ “Ovie Udhedhẹ.”  Ohwo ọvo ọ riẹ ọsẹ riẹ hẹ hayo oni riẹ hẹ, u wo oria ọvo nọ a kere uyẹ nọ o no ze fihọ họ, hayo okenọ a ro yẹe hayo okenọ o ro whu, rekọ fikinọ a ru rie tho Ọmọ Ọghẹnẹ, ọ rrọ ozerẹ oke kpobi.*  Rri epanọ ọzae nana ọ rro te, ọnọ Abraham ọsẹ-orua na ọ kẹ abọvo abakpe eware nọ e mai woma nọ ọ kwa kpozi na.  Uzẹme, wọhọ epanọ o rrọ Uzi na, a jie uzi kẹ emọ Livai nọ a ro mu izerẹ inọ a rehọ abọvo abakpe eware mi ahwo na, koyehọ inievo rai, dede nọ enana yọ emọ Abraham.  Rekọ ọzae nana nọ o no orua Livai ze he na ọ rehọ abọvo abakpe mi Abraham, ọnọ Ọghẹnẹ ọ ya eyaa kẹ na, ọ tẹ lẹ ẹro eghale kẹe.  Whaọ o rrọ vevẹ inọ ọnọ ọ mae rro ọye ọ rẹ lẹ ẹro eghale kẹ ọnọ ọ kawo vi ei.  Ahwo Livai nọ a jẹ rehọ abọvo abakpe na a re whu, rekọ ọzae ọdekọ na nọ a kẹ abọvo abakpe na, Ikereakere na e ta kpahe iẹe nọ ọ rrọ uzuazọ.  Yọ a sae ta nọ makọ Livai, ọnọ a jẹ kẹ abọvo abakpe na, ọ hwa abọvo abakpe ẹkwoma Abraham, 10  keme okenọ Mẹlkizẹdẹk o ro zere Abraham, yọ Livai ọ gbẹ jọ ọmọ-uruọmọ nọ a ti yẹ evaọ obaro kẹ ọsẹ-ode riẹ Abraham. 11  O hae jọnọ a rẹ sae jọ gbagba ẹkwoma iruẹru ọkwa-ozerẹ ahwo Livai (keme o jọ abọjọ Uzi na nọ a rọ kẹ ahwo na), kọ o hae gbẹ gwọlọ nọ a rọ ozerẹ ọfa mu ọnọ a ta nọ ọ wọhọ epaọ Mẹlkizẹdẹk orọnikọ wọhọ epaọ Erọn ho? 12  Keme nọ orọnọ a bi nwene ọkwa-ozerẹ na, o roja re a nwene Uzi na re. 13  Keme ọzae nọ a ta eme nana kpahe na o no orua ọfa ze, yọ ohwo ọvo evaọ orua yena o ri ru iruo evaọ agbada-idhe na ha. 14  O rrọ vevẹ nọ orua Juda Olori mai o no ze, rekọ Mosis ọ ta ha inọ izerẹ a re no orua yena ze. 15  Onana u tube vẹ viere nọ ozerẹ ọfa ọ romavia ọnọ ọ wọhọ Mẹlkizẹdẹk, 16  ọnọ o zihe ruọ ozerẹ, orọnọ fikinọ o no orua nọ uzi o fodẹ nọ ozerẹ o re no ze he, rekọ ẹkwoma ogaga nọ u ru rie wo uzuazọ nọ a rẹ sae raha ha. 17  A jọ oria ikere na jọ ta kpahe iẹe nọ: “Whẹ yọ ozerẹ bẹdẹ bẹdẹ wọhọ epaọ Mẹlkizẹdẹk.” 18  Fikiere a si ujaje ọsosuọ na no keme u wo ẹgba ha, yọ u wo iruo ho. 19  Keme Uzi na u ru oware ovo rrọ gbagba ha, rekọ ẹruore nọ ọ mai woma nọ Ọghẹnẹ ọ rọ ze u ru ere, onọ ma be rọ ẹkwoma riẹ si kẹle Ọghẹnẹ. 20  Ofariẹ, nọ orọnọ avọ iyei-iduwo Ọghẹnẹ ọ rọ kẹe ọkwa-ozerẹ na 21  (keme ezae jọ e riẹ nọ a ro mu izerẹ ababọ iyei nọ a duwu fiki rai, rekọ a rehọ ọzae nana mu avọ iyei nọ Ọghẹnẹ o duwu fiki riẹ nọ ọ ta nọ: “Jihova* o duwu iyei no, yọ o ti nwene iroro riẹ hẹ,* ‘Whẹ yọ ozerẹ bẹdẹ bẹdẹ’”), 22  fikiere Jesu họ ọnọ a rọ kẹ imuẹro ọvọ nọ ọ mai woma. 23  Ofariẹ, ahwo buobu a zihe ruọ izerẹ unọjọ utọjọ keme enọ a ro mu a je ru iruo na ribri hi fiki uwhu, 24  rekọ fikinọ ọ rrọ uzuazọ bẹdẹ bẹdẹ, amọfa a rẹ rehọ ọkwa-ozerẹ riẹ hẹ. 25  Fikiere ọ rẹ sai je siwi enọ e be rọ ẹkwoma riẹ bru Ọghẹnẹ ze riẹriẹriẹ, keme ọ rrọ uzuazọ ẹsikpobi re ọ lẹ Ọghẹnẹ kẹ ae. 26  U woma kẹhẹ nọ ma ro wo ozerẹ okpehru otiọye nọ ọ roma kpobi kẹ Ọghẹnẹ, nọ ọ kare afuẹwẹ, kare epe, wo ohẹriẹ no erahaizi, a tẹ jẹ kpare iẹe kpehru vi idhiwu na. 27  Wo ohẹriẹ no izerẹ ikpehru yena, o du gwọlọ nọ o re dhe idhe kẹdẹ kẹdẹ hẹ, orọ ọsosuọ rọkẹ izieraha obọriẹ, kẹsena rọkẹ erọ ahwo na, keme o ru onana ẹsiẹvo rọkẹ oke kpobi nọ ọ rehọ omobọ riẹ dhe idhe. 28  Evaọ otọ Uzi na, ezae nọ e gba ha a je ro mu izerẹ ikpehru, rekọ evaọ iyei nọ o duwu nọ Uzi na o vrẹ no, ọmọ nọ ọ rrọ gbagba bẹdẹ bẹdẹ o ro mu.

Oruvẹ-Obotọ

Hayo “ribri.”
Rri oria Otofa Eme.
Hayo “ọ te vioja onana ha.”