Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 2:1-18

EWARE NỌ E RIẸ EVA

  • Gaviezọ ziezi (1-4)

  • A fi eware kpobi họ otọ Jesu (5-9)

  • Jesu avọ inievo riẹ (10-18)

    • Ọnọ a rẹ rọ ẹkwoma riẹ wo esiwo (10)

    • Ozerẹ okpehru nọ o wo ohrọ-oriọ (17)

2  Oyejabọ nọ o rọ roja re ma gaviezọ ziezi kẹ eware nọ ma yo no, re ma gbe su vru no ẹrọwọ na vievie he.  Keme otẹrọnọ ẹme* nọ a rọ ẹkwoma ikọ-odhiwu ta o rugba, yọ a rọ uye kẹ ohwo kpobi nọ ọ raha uzi gbe ọnọ ọ ghẹmeeyo wọhọ epanọ uvioziẹ o gwọlọ,  ẹvẹ ma te sae rọ vabọ otẹrọnọ ma gbabọkẹ ọruẹrẹfihotọ esiwo ologbo otiọye na? Keme Olori mai ọ kake ta kpahe iẹe, enọ i yo rie a te se isẹri kpahe iẹe kẹ omai,  yọ Ọghẹnẹ o kuomagbe isẹri-ise na ẹkwoma eware eka gbe eware igbunu avọ iruo igbunu sa-sa gbe ẹzi ọfuafo nọ ọ ghale kẹ ae wọhọ epaọ oreva riẹ.  Keme orọnikọ otọ ikọ-odhiwu o fi akpọ* nọ ọ be tha na họ họ, onọ ma be ta ẹme kpahe na.  Rekọ evaọ oria jọ ose-isẹri jọ ọ ta inọ: “Ohwo-akpọ yọ ono nọ whọ be rọ kareghẹhọ iẹe, hayo ọmọ ohwo nọ whọ be rọ rẹrotei?  Who ru rie kpotọ omojọ vi ikọ-odhiwu; whọ rehọ oruaro gbe ọghọ rọ hwosa kẹe, jẹ rehọ iẹe mu ọnọ o wuzou iruo abọ ra.  Who fi eware kpobi họ otọ awọ riẹ.” Nọ orọnọ o fi eware kpobi họ otọ riẹ na, oware ovuovo o riẹ hẹ nọ Ọghẹnẹ o fihọ otọ riẹ hẹ. Rekọ evaọ enẹna ma re ruẹ nọ eware kpobi e rrọ otọ riẹ no ho.  Rekọ ma be ruẹ Jesu nọ a ru kpotọ omojọ vi ikọ-odhiwu vẹre na nọ a rehọ oruaro gbe ọghọ hwosa kẹ no fikinọ ọ ruẹ uye uwhu. O whu rọkẹ ahwo kpobi fiki uwowou ulogbo Ọghẹnẹ. 10  Eware kpobi e rrọ fiki oruaro Ọghẹnẹ yọ ẹkwoma riẹ e rọ rrọ. Fikiere, re ọ ruẹsi ru emọ buobu wo oruaro, u kiehọ re o ru Ọnọ a rẹ rọ ẹkwoma riẹ wo esiwo na gbunu ẹkwoma uye-oruẹ. 11  Keme ọnọ o bi ru ai fo gbe enọ o bi ru fo na a no obọ ọsẹ ọvo ze, fiki onana oma o be vuọ iẹe he re o se ai inievo, 12  wọhọ epanọ ọ ta nọ: “Me ti whowho odẹ ra kẹ inievo mẹ; mẹ te jọ udevie ukoko na so ole jiri owhẹ.” 13  Ọ tẹ jẹ ta nọ: “Ọye mẹ te rẹroso.” Ọ tẹ jẹ ta nọ: “Rri! Mẹ avọ emọ nọ Jihova* ọ kẹ omẹ.” 14  Fikiere, nọ orọnọ “emọ” na yọ ahwo-akpọ na, ọyomariẹ o te zihe ruọ ohwo-akpọ re, re ọ ruẹse rọ ẹkwoma uwhu riẹ raha ọnọ o wo ogaga nọ ọ rẹ rọ wha uwhu ze na, koyehọ Ẹdhọ, 15  re o si ahwo kpobi nọ a rrọ igbo anwẹdẹ fiki ozọ uwhu no igbo. 16  Keme orọnikọ ikọ-odhiwu o bi fiobọhọ kẹ hẹ, rekọ emọ* Abraham o bi fiobọhọ kẹ. 17  Fikiere o te zihe ruọ epaọ “inievo” riẹ evaọ kabọ kabọ, re ọ sae jọ ozerẹ okpehru nọ o wo ohrọ-oriọ gbe ọnọ a re fievahọ evaọ iruo Ọghẹnẹ, re ọ sai dhe idhe* fiki izieraha ahwo, onọ o rẹ ruẹrẹ ae họ kugbe Ọghẹnẹ. 18  Nọ orọnọ ọyomariẹ ọ ruẹ uye evaọ okenọ a jẹ dawo iẹe na, ọ rẹ sai fiobọhọ kẹ enọ a be dawo.

Oruvẹ-Obotọ

Koyehọ, Uzi Mosis.
Hayo “otọakpọ nọ a rẹ rria.”
Rri oria Otofa Eme.
Evaọ Griki, “ubi.”
Hayo “re o dhe idhe omavoro.”