Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 13:1-25

EWARE NỌ E RIẸ EVA

  • Uduotahawọ urere gbe uyere (1-25)

    • Jọ ọrara-odederehọ o thọrọ owhai ẹro ho (2)

    • Rọ ọghọ kẹ orọo (4)

    • Yoẹme kẹ enọ e be kpọ eware evaọ udevie rai (7, 17)

    • Dhe idhe ajiri kẹ Ọghẹnẹ (15, 16)

13  Wha gbẹ hai dhesẹ uyoyou-inievo.  Jọ uruemu ọrara-odederehọ* o thọrọ owhai ẹro ho, keme ere otujọ a rọ ghọ ikọ-odhiwu dede nọ a riẹ hẹ.  Wha hai wo enọ e rrọ uwou-odi* họ iroro wọhọ ẹsenọ wha gbẹ rrọ uwou-odi, gbe enọ a be lahiẹ, nọ orọnọ whai omarai re wha rrọ evaọ ugboma* na.  Jọ ahwo kpobi a rọ ọghọ kẹ orọo, jọ a zue ehwa orọo na ha, keme Ọghẹnẹ ọ te rehọ enọ i bi gbe-ọfariẹ* gbe ibruẹnwae gu ẹdhọ.  Jọ edhere uzuazọ rai o kare uyoyou ugho, jọ onọ wha wo o da owhai ẹro. Keme ọ ta nọ: “Mẹ te nyasiọ owhẹ ba vievie he, yọ me ti gbabọkẹ owhẹ vievie he.”  Fikiere, ma rẹ sae ta ududu nọ: “Jihova* họ ọnọ o bi fiobọhọ kẹ omẹ; ozọ u re mu omẹ hẹ. Eme ohwo ọ rẹ sai ru omẹ?”  Wha kareghẹhọ enọ e be kpọ eware evaọ udevie rai, enọ e ta ẹme Ọghẹnẹ kẹ owhai, yọ nọ wha bi muẹrohọ eware iwoma nọ i bi no uruemu rai ze na wha rọ aro kele ẹrọwọ rai.  Epanọ Jesu Kristi ọ jọ odẹnukpo, ere ọvona ọ rrọ nẹnẹ, yọ ere ọ te jọ bẹdẹ bẹdẹ.  Wha kuvẹ hẹ re iwuhrẹ sa-sa nọ i wo ohẹriẹ no enọ ma rọwo na i su owhai thọ, keme o mai woma re uwowou ulogbo Ọghẹnẹ o bọ udu na ga viukpọ emuore jọ, enọ i wo erere he kẹ enọ e roma kẹ ae. 10  Ma wo agbada-idhe onọ ahwo nọ a bi ru iruo Ọghẹnẹ evaọ uwou-udhu egagọ na a wo udu nọ a rẹ rọ jariẹ re oware he. 11  Keme oma erao nọ ozerẹ okpehru na ọ rehọ azẹ rai ruọ oria ọrẹri na rọkẹ idhe uzioraha na, a rẹ mahe ai to no evaọ otafe evuẹ na. 12  Fikiere, Jesu ọ ruẹ uye evaọ obọ otafe unuẹthẹ okpẹwho na re, re ọ sae rọ azẹ obọriẹ ru ahwo na fo. 13  Fikiere, joma nya bru rie evaọ obọ otafe evuẹ na, re ma wọ owha ekela nọ ọ wọ, 14  keme ma jọ etenẹ wo okpẹwho nọ ọ rrọ bẹdẹ bẹdẹ hẹ, ukpoye ma be rọ ọwhọ hẹrẹ onọ o be tha na. 15  Joma rọ ẹkwoma riẹ dhe idhe ajiri kẹ Ọghẹnẹ ẹsikpobi, koyehọ unu mai nọ ma re ro whowho odẹ riẹ via evaọ ẹgbede. 16  Ofariẹ, jọ ewoma oruo gbe oware nọ who wo nọ whọ rẹ ghale kugbe amọfa o thọrọ owhai ẹro ho, keme idheidhe itieye e rẹ were Ọghẹnẹ ziezi. 17  Wha yoẹme kẹ enọ e be kpọ eware evaọ udevie rai jẹ romakpotọ kẹ ae, keme a be sẹro rai,* yọ a ti gu epanọ a ru te, re a sai ru onana avọ oghọghọ orọnikọ unuofiẹ hẹ, keme oyena o rẹ wha enwoma se owhai. 18  Wha gbẹ hae lẹ roro omai, keme u mu omai ẹro nọ ma wo obruoziẹ-iroro ọfuafo jẹ gwọlọ ru eware kpobi avọ oruọzewọ. 19  Rekọ mẹ be tuduhọ owhai awọ gaga inọ wha lẹ re a sai zihe omẹ se owhai vẹrẹ. 20  Jọ Ọghẹnẹ udhedhẹ na nọ ọ kpare othuru-igodẹ ologbo ọrọ igodẹ na no uwhu ze, Olori mai Jesu nọ o wo azẹ ọvọ ebẹdẹ bẹdẹ na, 21  ọ kẹ owhai eware iwoma kpobi nọ wha re ro ru oreva riẹ. Ọ be rọ ẹkwoma Jesu Kristi jọ oma mai ru iruo nọ e rẹ were iẹe ziezi. Jọ oruaro u tei bẹdẹ bẹdẹ. Ami. 22  Whaọ inievo, mẹ be tuduhọ owhai awọ nọ wha rọ odiri gaviezọ kẹ eme uduotahawọ nana, keme ileta ekpẹkpẹ me kere se owhai na. 23  Mẹ gwọlọ nọ wha riẹ nọ a siobọno Timoti oniọvo mai no. Ọ tẹ kake nyaze, ma te gbẹ nyaze te ruẹ owhai. 24  Wha yere ahwo kpobi nọ a be kpọ eware evaọ udevie rai gbe erezi na kpobi kẹ omẹ. Inievo nọ e rrọ Itali a bi yere owhai. 25  Jọ Ọghẹnẹ o dhesẹ uwowou ulogbo riẹ kẹ owhai kpobi ẹsikpobi.

Oruvẹ-Obotọ

Hayo “ewoma nọ a re ru kẹ erara.”
Evaọ Griki, “enọ e rrọ ekarọ.”
Hayo o sae jọ nọ, “wọhọ ẹsenọ wha be ruẹ uye kugbe ae.”
Rri oria Otofa Eme, “Ọfariẹ-ogbe.”
Rri oria Otofa Eme.
Hayo “uzuazọ rai.”