Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 12:1-29

EWARE NỌ E RIẸ EVA

  • Jesu họ Ọnọ o bi ru ẹrọwọ mai gbunu na (1-3)

    • Isẹri buobu nọ e wọhọ ẹgho (1)

  • Who rri ọwhọkuo Jihova vo ho (4-11)

  • Ru idhere nọ awọ rai ọ be nya liọ (12-17)

  • Ẹnyaze kẹle Jerusalẹm obọ odhiwu (18-29)

12  Fikiere, nọ ma wo isẹri buobu nọ e wọhọ ẹgho nọ e wariẹ omai họ na, joma gbolo owha ogbẹgbẹdẹ kpobi kufiẹ gbe uzioraha nọ ma re kie ro lọlọhọ na, re ma rọ ithihakọ dhẹ ohrẹ nọ a fihọ kẹ omai na,  nọ ma be tẹrovi Ọnọ ma rọ ẹkwoma riẹ wo ẹrọwọ gbe Ọnọ o bi ru ẹrọwọ mai gbunu na, Jesu. Fiki oghọghọ nọ a fihọ aro riẹ o thihakọ ure-oja,* ọ daezọ omovuọ họ, yọ enẹna ọ keria obọze agbara-uvie Ọghẹnẹ.  Wha romatotọ roro kpahe ọnọ o thihakọ ẹpoviẹ ọgaga otiọye evaọ obọ erahaizi nọ e jẹ wha enwoma se omobọ rai, re oma o gbẹ rrọ owhai hi nọ o rẹ rọ bẹ owhai no.  Evaọ ohọre rai wọso uzioraha yena, wha re họre te epanọ azẹ rai o ro hwẹ hẹ.  Yọ uduotahawọ nọ a jọ se owhai emọ na o thọrọ owhai ẹro no riẹriẹriẹ, onọ o ta nọ: “Ọmọ mẹ, who rri ọwhọkuo nọ o no obọ Jihova* ze vo ho, yọ o bẹ owhẹ no ho nọ ọ tẹ kpọ owhẹ họ;  keme ahwo nọ Jihova* o you ọ rẹ whọku, ẹhẹ, ọ rẹ fa* ohwo kpobi nọ ọ rehọ wọhọ ọmọ.”  O gwọlọ nọ wha re thihakọ keme oyena yọ abọjọ ọwhọkuo* nọ a be kẹ owhai. Ọghẹnẹ o bi yeri kugbe owhai wọhọ emọ riẹ. Kọ ọmọ jọ ọ rrọ nọ ọsẹ riẹ ọ rẹ whọku hu?  Rekọ otẹrọnọ ọwhọkuo nana o ri te owhai kpobi hi, kiyọ whai emọ omọfa, orọnikọ emọ riẹ hẹ.  Ofariẹ, esẹ nọ i yẹ omai a jẹ hae whọku omai, yọ ma jẹ kẹ ae adhẹẹ. Kọ ma gbẹ rehọ evawere romakpotọ viere kẹ Ọsẹ nọ ọ rehọ ẹzi ọfuafo salọ omai na re ma ruẹse jọ uzuazọ? 10  Esẹ mai a jẹ whọku omai omoke wọhọ epanọ u kiehọ evaọ aro rai, rekọ ọ be whọku omai rọkẹ erere mai re ma sae jọ ọrẹri wọhọ ọyomariẹ. 11  Evaọ uzẹme, ọwhọkuo ọvo ọ riẹ hẹ nọ o wọhọ nọ o rẹ kẹ evawere evaọ okioke nọ a rọ kẹe, ukpoye o rẹ da; rekọ uwhremu na, o re ru ahwo nọ o wuhrẹ no mọ ubi udhedhẹ orọ ẹrẹreokie. 12  Fikiere, jọ wha ru abọ nọ e rrọ otọ whrọze na ga je ru ighilawọ nọ e ga ha na ga, 13  jẹ hai ru idhere nọ awọ rai ọ be nya liọ, re abọ-oma na nọ ọ ko na o gbe no ẹta ha, ukpoye, u ve kpo ruẹrẹhọ. 14  Wha daoma lele ahwo kpobi rria dhedhẹ, jẹ jọ ọrẹri,* keme ababọ onana ohwo ọvo ọ sae ruẹ Olori na ha. 15  Wha fiẹrohọ otọ ziezi re wha gbẹ jọ udevie rai wo ohwo ọvo ho nọ Ọghẹnẹ o re dhesẹ uwowou ulogbo riẹ kẹ hẹ, re owọ-ure enua ovo o seba evi lahwe onọ o rẹ wha ẹbẹbẹ ze je gbe ibuobu ku; 16  je fiẹrohọ otọ re wha ruẹ nọ ohwo ọvo ọ rrọ udevie rai nọ o bi gbe-ọfariẹ* hẹ hayo ohwo nọ o se eware nọ e rrọ ọrẹri gboja ha, wọhọ Esọ, ọnọ o siobọno ọkwa ọmọ-ọkpako nọ ọ jọ fiki emu ẹsiẹvo. 17  Keme wha riẹ nọ uwhremu na nọ ọ jẹ gwọlọ nọ o re wo oghale na, a rọwo kẹe he; keme dede nọ ọ viẹ gaga re ọsẹ riẹ o nwene iroro, oviẹ riẹ u nwene oware ovo ho. 18  Orọnikọ ugbehru nọ a rẹ sae rọ obọ te oye wha nyaze kẹle he, onọ erae e be jọ to, nọ ẹgho ọlala gbe ebi ọlala gbe ofou ọgaga e rrọ, 19  nọ a jọ yo edo ọgba gbe uvou nọ o be ta ẹme, onọ ahwo na a yo a tẹ jẹ lẹ nọ jọ a gbẹ ta ẹme kẹ ae vrẹ ere he. 20  Keme ozọ u mu rai gaga fiki ujaje na, inọ: “Makọ arao dede ọ tẹ rọ oma te ugbehru na, a rẹ rọ itho fi ei kpe.” 21  Eware nọ e jẹ romavia na i muozọ gaga te epanọ Mosis ọ rọ ta nọ: “Ozọ u bi mu omẹ, me te je bi nuhu.” 22  Rekọ wha nyaze kẹle Ugbehru Zayọn gbe okpẹwho Ọghẹnẹ nọ ọ rrọ uzuazọ na, Jerusalẹm obọ odhiwu, gbe ikọ-odhiwu gbidi gbidi 23  nọ i kokohọ, gbe ukoko ọmọ ọsosuọ na nọ a kere edẹ rai họ obọ odhiwu no, gbe Ọghẹnẹ nọ ọ rrọ Obruoziẹ ahwo kpobi, gbe uzuazọ ikiẹrẹe na nọ a rọ ẹzi salọ nọ a ru gbagba no, 24  gbe Jesu obruthe ọvọ ọkpokpọ, gbe azẹ nọ a frẹ ku omai na, nọ o be ta ẹme evaọ edhere nọ o woma vi azẹ Ebẹle. 25  Wha daoma ruẹ nọ wha gaviezọ* kẹ ọnọ ọ be ta ẹme na. Keme otẹrọnọ enọ e gaviezọ họ rọkẹ ọnọ ọ jẹ kẹ unuovẹvẹ Ọghẹnẹ evaọ otọakpọ a sae vabọ họ, ma rẹ sae vabọ vievie he otẹrọnọ ma kiuke ku ọnọ ọ be ta ẹme no obọ odhiwu ze na. 26  Evaọ oke yena, uvou riẹ u nuhu otọakpọ na, rekọ enẹna ọ ya eyaa no inọ: “Me ti nuhu otọakpọ na ẹsiẹvo ọfa, yọ orọnikọ otọakpọ na ọvo ho, rekọ te odhiwu na.” 27  Whaọ ẹme na “ẹsiẹvo ọfa” u dhesẹ esino eware nọ o bi nuhu na, eware nọ e rrọ iruo-abọ amọfa, re eware nọ o nuhu hu e ruẹsi kiọkọ. 28  Fikiere, nọ orọnọ ma ti wo Uvie nọ a rẹ sai nuhu hu na, joma gbe wo uwowou ulogbo Ọghẹnẹ, onọ ma rẹ sae rọ ẹkwoma riẹ gọ Ọghẹnẹ evaọ edhere nọ ọ rẹ jẹrehọ, avọ ozodhẹ Ọghẹnẹ gbe ọwhewhe. 29  Keme Ọghẹnẹ mai yọ erae nọ e rẹ to oware muotọ.

Oruvẹ-Obotọ

Rri oria Otofa Eme.
Rri oria Otofa Eme.
Rri oria Otofa Eme.
Hayo “rọ uye kẹ.”
Hayo “ewuhrẹ.”
Hayo “fuafo.”
Rri oria Otofa Eme, “Ọfariẹ-ogbe.”
Hayo “gu inoma ha; dhesẹ orivo ho.”