Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Hibru 11:1-40

EWARE NỌ E RIẸ EVA

  • Otofa ẹrọwọ (1, 2)

  • Iriruo ahwo nọ a wo ẹrọwọ (3-40)

    • Ababọ ẹrọwọ a rẹ sai ru Ọghẹnẹ eva were he (6)

11  Ẹrọwọ họ imuẹro inọ oware nọ a bi rẹro riẹ o te via, gbe oware nọ o kẹ imuẹro ivevẹ inọ eware nọ a rẹ ruẹ hẹ e ginẹ rrọ.  Fikinọ ahwo oke anwae a wo oghẹrẹ ẹrọwọ nana Ọghẹnẹ o dhesẹ via nọ ọ jẹ rai rehọ.  Ma rọ fiki ẹrọwọ vuhumu nọ ẹkwoma ẹme Ọghẹnẹ a rọ ruẹrẹ eware nọ e rrọ ehrugbakpọ* na họ, fikiere eware nọ a rẹ ruẹ na e romavia no eware nọ a rẹ ruẹ hẹ ze.  Fiki ẹrọwọ, Ebẹle o dhe idhe kẹ Ọghẹnẹ onọ u wo aghare vi orọ Keni, yọ a rọ fiki ẹrọwọ yena se isẹri kpahe iẹe inọ o kiẹrẹe, keme Ọghẹnẹ ọ jẹ ekẹ riẹ rehọ, yọ dede nọ o whu no, ọ gbẹ be ta ẹme ẹkwoma ẹrọwọ riẹ.  Fiki ẹrọwọ, a rehọ Enọk vrẹ re o gbe whu uwhu oja ha, yọ a gbẹ jọ oria ovo ruẹ e riẹ hẹ keme Ọghẹnẹ ọ rehọ e riẹ vrẹ no; keme taure a tẹ te rehọ iẹe vrẹ, a se isẹri kpahe iẹe nọ o ru Ọghẹnẹ eva were ziezi.  Ofariẹ, ababọ ẹrọwọ ohwo ọ rẹ sai ru Ọghẹnẹ eva were ziezi hi, keme ohwo kpobi nọ o bi bru Ọghẹnẹ ze ọ rẹ rọwo nọ ọ rrọ gbe nọ ọ rẹ hwosa kẹ enọ e be rọ ajọwha gwọlọ iẹe.  Fiki ẹrọwọ, nọ Ọghẹnẹ ọ kẹ Noa unuovẹvẹ kpahe eware nọ a re ruẹ hẹ, o dhesẹ nọ o wo ozodhẹ Ọghẹnẹ, o te ku okọ re ọ ruẹsi siwi uviuwou riẹ; yọ ọ rọ ẹkwoma ẹrọwọ riẹ dhesẹ nọ akpọ na ọ reabe, a tẹ rọ fiki ẹrọwọ nọ o wo kuenu kẹe nọ o kiẹrẹe.  Fiki ẹrọwọ, okenọ a se Abraham, o yoẹme ẹkwoma ekpohọ oria nọ ọ te rọ reuku; ọ nya dede nọ ọ riẹ obonọ o je kpohọ họ.  Fiki ẹrọwọ ọ rria wọhọ ọrara evaọ ẹkwotọ eyaa na wọhọ ohwo nọ ọ rrọ orẹwho ofa, ọ jẹ rria iwou-udhu yọ Aiziki avọ Jekọp a jọ kugbei, enọ a gbẹ ya eyaa ọvona kẹ. 10  Keme ọ jẹ hẹrẹ okpẹwho nọ o wo uvi otọhotọ, onọ Ọghẹnẹ ọ ma omaa riẹ jẹ bọ. 11  Fiki ẹrọwọ, a kẹ Sera ogaga nọ o ro dihọ, dede nọ ọ kpako vrẹ ọmọ-oyẹ no, keme o rri Ọnọ ọ ya eyaa na inọ o re ru ẹme riẹ gba. 12  Fiki onana, a rọ ẹkwoma ọzae ọvo, ọnọ ọ wọhọ ohwo nọ o whu no yẹ emọ nọ i bu wọhọ isi obehru, je bu wọhọ uwẹkpẹ akotọ abade nọ a rẹ sai kele mu hu. 13  Ahwo nana kpobi a whu avọ ẹrọwọ, dede nọ a ruẹ orugba eyaa na ha; rekọ a ruẹ e rai evaọ ugbo a te dede ai rehọ je whowho via nọ ae yọ erara gbe enọ e be rria ubroke evaọ otọ na. 14  Keme enọ e be ta enẹ, a bi dhesẹ via nọ a be rọ ajọwha gwọlọ oria nọ o te jọ orọ obọrai. 15  Ghele na, o hae jọnọ a jẹ kareghẹhọ oria nọ a no ze na, a hai ti wo uvẹ nọ a re ro zihe. 16  Rekọ a be daoma re a wo oria nọ o mai woma, koyehọ, onọ u wobọ kugbe obọ odhiwu. Fikiere, oma rai o be vuọ Ọghẹnẹ hẹ re a sei Ọghẹnẹ rai, keme ọ ruẹrẹ okpẹwho fihọ kẹ ai no. 17  Fiki ẹrọwọ, nọ a dawo Abraham, ọ jẹ te rọ Aiziki dhe idhe, ọzae nọ ọ rọ evawere dede eyaa na rehọ na ọ jẹ te rọ ọmọ ọvo riẹ dhe idhe no, 18  dede nọ a ta kẹe no vẹre inọ: “Oma Aiziki ọnọ a ti se ọmọ* ra o ti no ze.” 19  Rekọ o wo iroro nọ Ọghẹnẹ ọ rẹ sae kpare iẹe no uwhu ze, yọ o gine woi tobọ no uwhu ze, onọ o jọ oware oriruo. 20  Fiki ẹrọwọ re, Aiziki ọ ghale Jekọp avọ Esọ, ọ ta kpahe epanọ eware e te jọ kẹ ae. 21  Fiki ẹrọwọ, nọ Jekọp ọ kẹle uwhu no, ọ ghale emezae Josẹf ọvuọvo je guzou kpotọ gọ Ọghẹnẹ avọ ọkpọ nọ o kru rọ tha omariẹ. 22  Fiki ẹrọwọ, nọ Josẹf ọ kẹle uwhu no, ọ ta nọ emọ Izrẹl a ti no Ijipti, ọ tẹ vuẹ ae* oware nọ a re ru kpahe igbenwa* riẹ. 23  Fiki ẹrọwọ, ọsẹgboni Mosis a ko riẹ dhere emerae esa nọ a yẹi no, keme a ruẹ nọ ọmọ na o wo erru yọ a dhozọ uzi ovie na ha. 24  Fiki ẹrọwọ, nọ Mosis ọ rro te ohwo no, ọ rọwo nọ a sei ọmọzae ọmọtẹ Fẹro ho, 25  ọ salọ nọ a rẹ lahiẹ iẹe kugbe ahwo Ọghẹnẹ ukpenọ o re wo omaweromẹ ubroke ọrọ uzioraha, 26  keme o rri ekela nọ i te rie fikinọ ọ rrọ Ọnọ A Wholo* na wọhọ efe nọ o rro vi efe Ijipti, keme ọ tẹrovi osohwa na. 27  Fiki ẹrọwọ o no Ijipti, orọnikọ ọ jẹ dhozọ ofu ovie na ha, keme o dikihẹ ga ẹsikpobi wọhọ ẹsenọ ọ be ruẹ Ọnọ a rẹ ruẹ hẹ na. 28  Fiki ẹrọwọ o ru Ehaa Ọnyavrẹ na jẹ frẹ azẹ na, re okpikpakpe na o gbe kpe* emọ ọsosuọ rai hi. 29  Fiki ẹrọwọ, a nya Abade Ọwawae na vrẹ wọhọ epaọ otọ oyaya, rekọ nọ ahwo Ijipti a nya ruọ iẹe, ame na o te ruru ai. 30  Fiki ẹrọwọ, igbẹhẹ Jẹriko i kie nọ ahwo na a nya igbẹhẹ na wariẹ họ edẹ ihrẹ no. 31  Fiki ẹrọwọ, Rehab ogberẹ na o lele otu aghẹmeeyo na whu hu, keme o dede ekiotọ na rehọ ziezi. 32  Kọ eme ọfa mẹ rẹ sae ta? Keme oke u ti te he otẹrọnọ mẹ rẹ ta kpahe Gidiọn, Barak, Samsin, Jẹfta, Devidi jegbe Samuẹle avọ eruẹaro efa. 33  Fiki ẹrọwọ a fi ivie kparobọ, a wha ẹrẹreokie ze, a ya eyaa kẹ ae, a ruru enu ikpohrokpo, 34  a raha ogaga erae, a vabọ no akọ ọgbọdọ, dede nọ a ga ha a ru rai jọ egba, a jọ egba evaọ ẹmo, a fi egbaẹmo nọ e wọ ohọre ze kparobọ. 35  Eyae i dede ahwo rai nọ a kpare no uwhu ze rehọ, rekọ a gboja kẹ ezae efa fikinọ a vro ẹrọwọ rai hi re a ruẹsi siobọno ai, a ru onana re a sai wo uvi ẹkparomatha na tobọ. 36  Ẹhẹ, a se ejọ ẹkoko jẹ fa ae, tube viere dede, a rọ egbregba kare ejọ je fi ai họ uwou-odi. 37  A rọ itho fi ai, a dawo e rai, a bẹre rai ewẹ ivẹ,* a rọ ọgbọdọ kpe ai, a jẹ hai ku oviẹ-igodẹ gbe oviẹ-ewe họ, a ruẹ uye ọbẹwẹ, ukpokpoma, a gboja kẹ ae; 38  a woma vi ahwo nọ a rẹ jọ oghẹrẹ akpọ nana. A je ghoro evaọ idhude gbe igbehru gbe ighogho-itho gbe egọdọ otọakpọ na. 39  Yọ dede nọ a ta ẹme ezi kpahe ahwo nana kpobi fiki ẹrọwọ rai, a ruẹ orugba eyaa na ha, 40  keme Ọghẹnẹ o wo oware jọ nọ o mai woma họ iroro kẹ omai, re a gbe ru ae jọ gbagba siọ omai ba ha.

Oruvẹ-Obotọ

Hayo “uyero-akpọ sa-sa.”
Evaọ Griki, “ubi.”
Hayo “kẹ ujaje.”
Hayo “ukio.”
Evaọ Griki, “Kristi.”
Evaọ Griki, “rọ obọ te.”
Hayo “bẹre rai abava.”