Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Galesha 1:1-24

EWARE NỌ E RIẸ EVA

  • Uyere (1-5)

  • Usi uwoma ofa o riẹ hẹ (6-9)

  • Usi uwoma nọ Pọl ọ ta u no obọ Ọghẹnẹ ze (10-12)

  • Ekurẹriẹ Pọl gbe iruẹru riẹ evaọ oke emuhọ (13-24)

1  Mẹ Pọl yọ ukọ, orọnọ ahwo jọ a rehọ omẹ mu hu, yọ orọnọ ẹkwoma ohwo jọ a rọ rehọ omẹ mu hu, rekọ enọ e rehọ omẹ mu họ Jesu Kristi gbe Ọghẹnẹ Ọsẹ na, ọnọ ọ kpare riẹ no uwhu ze,  mẹ avọ inievo na kpobi nọ e rrọ kugbe omẹ, ma bi kere se ikoko obọ Galesha:  Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.  Jesu o whu fiki izieraha mai re ọ ruẹsi siwi omai no uyero-akpọ* omuomu nana wọhọ epaọ oreva Ọghẹnẹ gbe Ọsẹ mai.  Jọ oruaro u tei bẹdẹ bẹdẹ. Ami.  U bi gbe omẹ unu inọ wha nwani muọ ọnọ ọ rọ ẹkwoma uwowou ulogbo Kristi se owhai na họ ẹnya seba no, wha tẹ be gaviezọ kẹ oghẹrẹ usi uwoma ofa jọ.  Orọnikọ usi uwoma ofa jọ o riẹ hẹ; rekọ otujọ a bi kpokpo owhai jẹ be gwọlọ rẹriẹ usi uwoma kpahe Kristi na.  Rekọ, o tẹ make rọnọ mai hayo ukọ-odhiwu jọ o whowho usi uwoma jọ kẹ owhai onọ u wo ohẹriẹ no onọ ma whowho kẹ owhai na, jọ uye u tei.  Wọhọ epanọ ma ta no vẹre na, mẹ be wariẹ ta nọ, Ohwo kpobi nọ o bi whowho usi uwoma jọ kẹ owhai onọ u wo ohẹriẹ no onọ wha rọwo na, jọ uye u tei. 10  Kọ ọjẹrehọ ahwo mẹ be gwọlọ manikọ ọrọ Ọghẹnẹ? Hayo kọ ahwo mẹ be gwọlọ ru eva were? Otẹrọnọ ahwo me gbe bi ru eva were, kiyọ mẹ ọrigbo Kristi hi. 11  Keme mẹ gwọlọ re wha riẹ, inievo, inọ usi uwoma nọ me whowho kẹ owhai na u no obọ ohwo-akpọ ze he; 12  keme orọnikọ ohwo-akpọ ọ rehọ e riẹ kẹ omẹ hẹ, yọ orọnọ ohwo jọ o wuhrẹ omẹ hẹ, rekọ Jesu Kristi o dhesẹ i rie via kẹ omẹ. 13  Wha yo kpahe uruemu nọ me wo vẹre okenọ mẹ jọ egagọ ahwo Ju, inọ me je kpokpo ukoko Ọghẹnẹ gaga jẹ gwọlọ raha iẹe muotọ; 14  yọ me je wo ẹnyaharo evaọ egagọ ahwo Ju vi ehwa mẹ buobu evaọ orẹwho mẹ, keme me wo ajọwha kẹ iruemu-anwae esẹ mẹ vi ai. 15  Rekọ nọ Ọghẹnẹ, ọnọ o ru nọ a ro yẹ omẹ, je se omẹ fiki uwowou ulogbo riẹ, ọ gwọlọ nọ 16  ọ rẹ rọ ẹkwoma mẹ dhesẹ Ọmọ riẹ via, re mẹ sai whowho usi uwoma kpahe iẹe kẹ erẹwho na, mẹ nyae nọ mi ohwo-akpọ* ọvuọvo okioke yena ha; 17  yọ me kpobọ Jerusalẹm bru enọ e rrọ ikọ no taure me te ti zihe ruọ ukọ họ, rekọ me kpobọ Arebia, kẹsena me te zihe kpohọ Damaskọs. 18  Nọ ikpe esa e vrẹ no, me te kpobọ Jerusalẹm nyae ruẹ Sifas,* yọ mẹ jọ kugbei edẹ ikpegbisoi. 19  Rekọ mẹ ruẹ ikọ edekọ họ, ajokpaọ Jemis oniọvo Olori na. 20  Kpahe eware nọ me bi kere se owhai na, mẹ be ta kẹ owhai evaọ aro Ọghẹnẹ inọ mẹ be ta ọrue he. 21  Kẹsena me te no etẹe kpohọ ibrotọ Siria gbe Silisia. 22  Rekọ ikoko Ileleikristi nọ e rrọ Judia a riẹ omẹ evaọ ovao ha. 23  A je yo kpahe omẹ ọvo inọ: “Ọzae nọ o je kpokpo omai vẹre na o bi whowho usi uwoma na enẹna kpahe egagọ nọ ọ jẹ raha no na.” 24  Fikiere a te mu Ọghẹnẹ họ ejiri fiki mẹ.

Oruvẹ-Obotọ

Rri oria Otofa Eme.
Evaọ Griki, “uwo gbe azẹ.”
Nọ a re je se Pita.